Rome 11:2-24

²Mara katamaninai God tuna mani Israel ivinesi da ina wawaya ma ke ita baresi. Giruma katamana konotai. Israel damsi i bera kubiine na peroveta Elaidiya ina weno God kurina iterei, ivona bo,

³“Bada, am peroperoveta ivi kiivunuwana ma am suwara kana kapukapuna kemasi ivi kiirikeyana. Ina kiku kava yawayawaku ma ipaparana da taku bade ina kiivunuku.”

⁴Ma God weni nakanani ivonapotei bo, “Kegha. Aku wawaya 7 tausan emakamakai. Ti na ke meyani da kokoitau Beil ita vokavakavari bo ita runome tovoni.”

⁵Ma karako na bade berana sago, God ina agabiibai irakata da wawaya viya ivineta da tota ina wawaya.

⁶Ina agabiibai kubiine na wawaya evinevinesi ma ke aviyavisina biibiina ti mani ita berai kubiine. Mikeda i bera kubiine ita vinesi na tuna ke agabiibai vaghata.

⁷Bera weni nakanani itupuwa. Israel peyarisi keta iekwekwai da God yavata iti nuwasago ma ibera kavai. God wawaya voviyavina kava ivinesi na ti kava ipanani. Ma viya na God ivivi kwatu na tinisi ipota.

⁸Ma giruma katamana evonavoneta bo, “God iberisi da ivi nuwawapawapisi ma ke kovokovoghina da ina kita bo ini yana da God damina ina viini. Ma karako ti na patana da nakanani emakamakai.”

⁹Ma Kiivavo David ivona bo, “Ina kamkamporaghamakai ma nani kamonai keberai da ku poko ina kona meyesi. Keberai da ini gampiirisi! Kovogha keveresi.

¹⁰Matasi kekiipotai da ke ina kita kiimatana. Nuwapoya ini kuputuwakiiyovu nonowesi.”

¹¹Nakanani na ani tarakiiyana bo, “Maranai Jiu damsi ivi gampiirisi na ipeku tuwanonowa bo?” Kegha taweyana! Ma Jiu damsi i berabero kubiine, God yawasa makamakii nonowina na kupuna damsi iveresi. Ma iveresi da Jiu damsi ita kitai da ita nuwakapiyesi.

¹²Jiu damsi Keriso ibarei kubiine na God ina vibiibiina ghamanakina ikiibau da wawaya peyarisi dobuwai iviiya. Jiu damsi ke iti tumaghana kubiine na God kupuna damsi ivi biibiinisi. Ma maranai Jiu damsi i nota ina virai ma ti bade ini tumaghana na dobuwai God ina vibiibiina ina rakata kirakai.

¹³Wekarakava na tami kupuna dami kurimi aisisiya. God ivineku da tami kubiimi avi aposol ma anotai da weni bigana ivereku na iyamna irakata kirakai.

¹⁴Tuna notanai na keta aekwekwai da dam turaku ina nuwakapiyemi ma ti bade God ini tumaghanei da ini yawasisi.

¹⁵Maranai God aku wawaya ibaresi na wawaya kudubisi dobuwai taraboga iveresi da tuna yavata vimakiiberowana ita voterei ma iti nuwasago. Ma mara sago God ina kayowana meyesi, tuna nakanani ma ti na raborabobosi ma nani maranai na ita yawasame.

¹⁶Mikeda parawa kukapuni ma kunona bedina God kusuwarei na nani parawina kudubina na bade vovokaravina, God rapenai. Ma mikeda oliv kiina ramramna na God kubiine kuna vonagubai na bade kiina kudubina ere ragharaghana na vovokaravina, God rapenai.

¹⁷Tami kupuna dami na nakanani ma oliv dipa kiina. Ma Israel na nakanani ma oliv vovonina. Ma God, oliv vovonina raghana itamogai ma oliv dipa raghana iviiya da gawarinai ivi kabai da iyanumapotai da tami nani oliv kiina ramramnai kami vavai koviiviiya.

¹⁸Tuna kubiine na nani kii ragharaghasi ivi tamogiiyana da ami taraboga iveremi na ke kona kitaoruwesi. Ke kona kayotata, tami na ragha kava. Tami kii ramramna vitana ke kota kavakavari, kii ramramna tami vitami ekavakavari.

¹⁹Ma mikeda wawaya sago ina kayotata bo, “Vaghina, ma kegha da raghana sago ivogiitawei na kaku gawara ivoviyaghari.”

²⁰Tuna na vonavaghata. Ma ti na Keriso ke ita vivitumaghanei kubiine da ivi vogiiyana, ma tam na am vitumaghana tepanai da nani gawarinai kemakamakai. Tuna kubiine ke kuna kayotata. Kegha, God kuna yabumanei.

²¹Jiu damsi na kii ragharaghana vaghata, ma kegha da God ke ita nuwaghanesi. Ma tam na kupuna wawayim, tuna kubiine ke kuna notai da ina nuwaghanem.

²²Kevi nuwanotanota da God na agabiibai wawayina ma bade wawaya bagibagina. Wawaya God ikawakiikiiyei na ti damsi kurisi nuwanuwana ipughu. Ma tam mara nonowa ina agabiibai kuni tumaghanei na nani agabiibiina kuna kita nonowei. Ma mikeda ina agabiibai kuna barei, tam bade ina kiiyaraghatawem.

²³Ma mikeda Jiu damsi vitumaghana ini karei na God ku kiina raghana ini kaba meyesi, iyamna tuna kovokovoghina da ina tere meyesi kii ku gawara.

²⁴Tam kupuna wawayim na nakanani ma oliv dipa raghana ita kiiyaraghatawei, ma kata notai da ke kovokovoghina da ku oliv vovonina iti kabim ma kegha da God iberai kubiim. Ma Jiu damsi na nakanani ma oliv vovonina ragharaghana, tuna kubiine na itekateka kirakai da God ku kiina ini kaba meyesi.