Psalms 90:3-17

³Ni balsam se ana kariimet aking kupkup ko geragasan; ale balsam, “Nina kariimet ko gue, nina kueral ale ali ko aralko!”

⁴1000 yia mu nika ikia loagara te mu kowarkalal suanta se tairate nama menaso iwita; agi sor ko bitua kari tirom sor bitaruwoso se tairate ukiso iwitatala.

⁵Agi kariimet ipingisan ale tairate nungamili sapa namoso iwita, ni nanga sarumu warsam. Agi diri turomola wakala yawara beteso ale ulaloso,

⁶bare bainga ningi mu kusuga namoso iwitatala.

⁷Nika gemang magara mu tama kuamili iwita nanga lakumam, se ana ninguru nguangasan.

⁸Ni anananga kiwem memek mu suen la ari sapasam, ale anananga memek yumura la betesan mu agotala ari sapasam.

⁹Anananga bagara ali imi te mu nika gemang magara bowa ningi baga lagasan; ale nanga nangamang bataga se niara mu ago eng kua namasan.

¹⁰Ana yia 70 iwita ko bagasan, se bo sail tagiso mu yia 80 taso; bare yia suen la mu ningi mu yaman ikup karogo la, se yia mu tairate menaso se ana mena namasan.

¹¹Awiri nika gemang magara mu ko iki saparukko terong? Mena. Nika gemang magara ko sokel mu aora biya, se ana mu ko iki se nika nguanganakko.

¹²Ana tom maiya biya ali imi te me baganakko; mu ko ni ninguru nanga kasuru se, ana mu te ikia ningo nuam tanakko.

¹³O Yawe, tom awila nunguningkiri nika gemang magara anirukko? Ana nika kariimet gemang lila nangaruko.

¹⁴Ni turomola pempem ka kua nangara ko munan mu te, nanga sangaruko; se mu te ana marak baga se mu, wur ilu se amilmil kisu se laganakko.

¹⁵Ana tom suen biya ikup nangaru lagerem, uwutatala aitak amilmil nangaruko; ana yia suen biya baga maguwu lagaman, uwutatala aitak mu amilmil karogo baga se laganakko.

¹⁶Aitak nika ura bibiya sokel karogo mu, ana nika kariimet nanga kasuruko; ale nika sokel aora garagar nikim karogo mu, anananga kuriang imas ago nunga kasuruko.

¹⁷O Biya, ni anananga Kaem, ka gemang lila nangaruko; se anananga ura mel kasik la betesan mu ningo la aratukko; butata marak sokel tui se aratu nangarukko.