Salmo 90:3-17

³Mabalin mo ay ibaga sin ipogaw ta mantaoli da sin tapok ay say napoan da.

⁴Din sinlibo ay tawen en sik-a et kaman sin-agew anggoy di kaando na. Kaman ed kogaban ay nalabas ono din kaseyepan mi si owat piga ay oras.

⁵Mabalin ay pap-engem din biyag mi sina. Maiarig sin iitaw ay sinkaattikan et mamaga ono kaman logam ay tomobo sin agsapa.

⁶Gomabay et mansabong da, ngem mo malabi, malaylay ya mango da.

⁷Palaloy egyat mi sin bonget mo, matey kami begew sin dosa ay inkeddeng mo.

⁸Inpailam am-in ay basbasol mi sin sangoanam, olay din naitatabon ay inpaksaw mi et inpabelam.

⁹Begew sin bonget mo, omaptik di biyag mis nan daga, din tawen mi et kaman dagem ay si awni et mamaga.

¹⁰Pitopolo ay tawen di kaandon di biyag mis na. Mo mabikas kami, emey ay otsinta. Ngem olay mo intoy kaando na, pag ligat di iali da. Sinkaattikan yan mapap-eng di biyag mi et pag kamin mamaga.

¹¹Maga pay laeng di namadas sin am-in ay dosa ay inkeddeng mo, magay inmegyat ay kosto begew sin palalo ay bonget mo.

¹²Isonga ipabigbig mo ngarud en dakamis na din kinaaptik di biyag mis nan daga ta say lomaing kami ay mangosal ay kosto sin am-in ay timpo ay indawat mo.

¹³Pig-an pay di kabayag di omibobongetam? Maseg-ang ka koma ay Diyos en dakami ay baam.

¹⁴Inag-agew koma ay mapnek kami sin komakaman ay layad mo ta say naragsak kami ay mankankanta sin kawada mi ay matmatago.

¹⁵Paad-adoem abe di agew ay en mi panlaylaydan ay kaman din kaandon di timpo ay en mi nanligligatan.

¹⁶Ipailam din panakabalin mo en dakami ay baam ya sin kapototan mi din nakaskasdaaw ay pigsam.

¹⁷Yahweh ay Diyos mi, maseg-ang ka ta bindisyonam dakami ta say mayat di pantongpalan di am-in ay am-amagen mi.