Psalms 89:1-18

¹(Ezra ko gue te kari Ethan ko wur) O Yawe, ani pempem nika kua ana nangara ko munan mu ko wur iluwekko; ani nika den bala ale diram la karo tuata mu ko munan mu ko pempem balu se lagarikko.

²Ani ko ikisam, nika kua ana nangara ko munan mu kumik menara mena; se nika den kaola ale diram la karo tuata ko munan mu, taiti gomang iwita pempem la anirukko.

³Ni iwita balem, “Ani kari bo angamang tuem ale atumukirem wore ilak den kalem, aga ura kari David ilak den iwita kalem,

⁴‘Nika gue te la pempem bo king ko aratu se lagamonko; ani nika kuriang gue luan udagi maiya biya mu ninguru nunga bituekko.’ ”

⁵O Yawe, taiti gomang te nika kiting kiwol suen la nika balu pagorsan, se engel alo duruk wonong te bolala la nika den bala ale diram la karo tuata ko munan mu ko nip patawusan.

⁶Taiti gomang te mel bo ta nika iwita mena; engel bibiya ni kerak wete bagara wore bo ni kerak arerem mena tala.

⁷Engel bibiya laili nunguningkiri, nika laturu guruga ale ni kerak bagara, mu nika ninguru nguangasan, mu awuk, ni keta suanta kualala biya bagasam.

⁸O Yawe, ni Kaem Sokel Garagar, bo sokel ago nika iwita mena; nika den suen la mu diram la karo tusam.

⁹Ni gagi lilim la bitaruwasam; ale tom ko tamun bibiya duruk iwita barasoso mu ni lila awusam ale malin tusam.

¹⁰Ni gagi ko mel memek Rahab ko sokel menawurem; iwitatala, nika sokel aora garagar mu te kager kari memek nunga menawurem.

¹¹Duruk wonong se ali imi mu am nika la; ni keta ali imi se mel suen la awote mu nungem.

¹²Ni keta koma worem te basuso mu nungem, ale aking te nama kaposo mu nungem tala. Se duruk ilagala Tabor se Hermon mu wur te amilmil kisisan.

¹³Ni yam sokel garagar! Nika sokel mu yam aromemek se kalel biya!

¹⁴Ni kiwem ningo diram se tutera ningo mu nika barim, te ira sanamasam; ni ka munan me gurugusam patawusam, mena, nika kariimet ninguru nunga kuesam, ale ka den nunga manem mu diram la karo tusam.

¹⁵Yawe, kariimet nika nip patawusan ale nika munan yawara mu ko nikim ningi kerak kapetasan mu amilmilamonko.

¹⁶Kariimet imitang mu ni ko ko pempem irua amilmil te bagasan, ale nika munan ningo mu ko ka nip patawusan.

¹⁷Mu awuk, ni ka nikim se ka sokel aora garagar mu te nanga sangorsam; nika gemang motam nangara ko munan mu te nanga king nup biya tuem.

¹⁸O Yawe, ni keta anananga karem bagasam; ni Israel ko Kaem Laili, se ni keta king ana nangarem.