Psalms 80:4-18

⁴O Yawe, Kaem Sokel Garagar, awuk? Ni ana nika kariimet nanga aira wosenga ko yam buta gemang maga lagarukko e?

⁵Ni namononge mu inang ko iwita nangarem se nokasan, ale namononge yu mu bagun biya wore te iwita kuring aratam se nangarem se nokasan.

⁶Ni ana balu maguwura ko mel bo iwita nanga beterem, se sor saki nangimik duap te mu nanga balu maguwusan.

⁷O Kaem Sokel Garagar, gemang nangaru ale nanga sangaru toko; nanga sangaru se girakala ningo bagaman uwuta aking baganakko.

⁸Girakala ni Egypt sor te tam waen bo taem ale karogo tairem; ni sor saki nunga karem parusuwurem ale ali mu te tam waen mu aguwem.

⁹Ni ko kuwim nungem burangerem ale aguwem, se yager ali tam ale palengam ali sor ira saparam.

¹⁰Ko tamarum mu duruk bibiya nunga ira kaluwuram, se kower suen biya mu tam aora sida mu nunga ira saparam.

¹¹Se ko kower palengam namawaram Gagi Biya Mediterranean tam, ale namawaram Yu Biya Euphrates tam tala.

¹²Bare awuk se ni kar waen ningam lautam wore parusuwurem, se kariimet lage mu karo se mu ko nunguning gisan a?

¹³Se buruk diwang ira parusuwusan se inangnang, madar, ugigi se anapeya suen la aratasan ale no gilingisan.

¹⁴O Kaem Sokel Garagar, ni duruk wonong te baga se, loager se tai kaparuk se tam waen mu aking ko ari iki ale bitaruko!

¹⁵Ni keta kiting te tam mu aguwem, ale bituem se tam ningo ko aragam. Buta se tair ale bitaruko!

¹⁶Kager kari memek kauman batutumuman ale tama beteman se kaniram; se ni tair ale gemang memek te nunga maguwurko!

¹⁷Bare ana kariimet ni keta nika ma balem, ale keta nunga bituem se gue pagam, wore tai nanga sangaru ale nanga bitaruko.

¹⁸Uwuta mu asele ana udagi te me ka betenakko. Marak iru nangaru se ana pempem nip patawu se laganakko.