Psalms 77:6-20

⁶Ale aga wur tirom ilukasam mu ko angamin ares makaso. Tom ikia bitakasam mu agata aimi iwita isarukasam:

⁷“Kari Biya pa, buring gurugu aisam ta agi? Agi ago ko yam ikiwoso agi?

⁸Agi ko gomang ani kua aisuwaram mu menaram agi? Se agarak ikia kaolam mu dagulu namaram agi?

⁹Kaem pa, noko gomang lila mu ko kuamili saparam agi? Agi noko gomang memek mu noko gomang lila kuwim tam agi?”

¹⁰Bare angamin namara taira ningi iwita ikiem, “Kaem Kalel Biya yia suen biya ningi nanga sangaru lagaram, se ani mel umu te ira sanamasam.”

¹¹O Yawe, ani ni girakala mel bibiya beterem mu ko angamin ares maso; ani nika kiwem bibiya ni girakala bita lagerem mu aga ikia te taiso.

¹²Ani ni ura bibiya beterem mu ko iki gurugekko; ani nika kiwem bibiya suen la beterem mu ko angamin tugumekko.

¹³O anananga Kaem, nika kiwem suen la betesam mu laili biya. Kaem bo awuk wore noko nup biya nika iwita?

¹⁴Ni keta Kaem, ni mel duap duap sokel karogo betesam se arataso; nika sokel aora biya sor suen la ko kariimet nunga kasursam se arigisan.

¹⁵Nika kiting sokel aora garagar mu te ka kariimet nunga sangaru taem; ni Jacob se Joseph nunga nunumasari se taleng girigir nunga giem.

¹⁶O Kaem, yu bibiya karkaman; yu bibiya mu karkaman ale nguangakasan; gagi nukum du biya mu uririkiram.

¹⁷Tuwik taiti nuwi ningi wore kapakaso; taiti gomang te pure pagakaso; pure nikim biliwilik makaso ale gatu iwita nama taikaso.

¹⁸Pure nirung daula biya ningi aratukaso, se pure nikim ali sor lilim la nikim tuikaso; ali uririkikaso ale wanara ko kapakaso.

¹⁹Ni gagi tamun ningi aolak iluwem, ale gagi naung du biya mu batagem koma sang ko namerem, bare ka siwik molak me arigiman.

²⁰Ni ka kariimet sipsip iwita nunga giem; ni Moses, Aaron ilak nunga kari gira ko nunga awurem ale nongorak aolak iluwem.