Psalms 73:2-27

²Bare ani mu, sanami turutuwuwakasam; ani mu ali palenguk se dagulu namarikko iwita.

³Ko duap mu, ani nunumi patawura ko kariimet mu nungarkikasam ale nunga angamang magakaso, mu awuk, nuna memek bita se wore nunga daiga bagara mu am yawarakala.

⁴Nuna ikup mena, ningo la bagasan; ale nungumik kuera ikes mena se sokel ago la bagasan.

⁵Nuna kariimet sang ikup giwasan iwita, me ikup giwasan, mena. Nuna sokel ago se ningo la bagasan.

⁶Buta se nusupuling lagara ko munan mu kulolo balayam iwita nodogotak tugusan; ale kariimet sang nunga bita maguwura ko kiwem mu guang ningo iwita katasan.

⁷Nunga bagara ningo mu ko nomotam welang taiso; se nunumi te patawumonko ikia duap duap nunga moso.

⁸Nuna kariimet saki nunga gusirsan ale den memek nungumik ko balsan; nuna nunumi kalel biya betesan ale kariimet saki bala nguangara nungarsan.

⁹Nuna duruk wonong te bagakoyam nunumi betesan; ale nunga munak mu ali lilim bitarukoyam munakasan.

¹⁰Se kariimet karo nungarsan; mu nuna anapeya ko balsan mu am nungarsan.

¹¹Kariimet imitang balsan, “Kaem awuk ta ko ikiokko?” masan. Ale “Kaem Kalel Biya mu ko sinar aruk agi?” masan.

¹²Kariimet memek mu nunga kiwem mu uwutata; nuna ikup mena, pempem yawarakala baga se melmasak duap duap gemasan.

¹³Se awuk, ani aimi ko sinar taem ale ningo diram la baga lagasam imi ko ningo apoko? Ani memek bo me bita arigem imi ko ningo bo me arigekko agila?

¹⁴Tom suen biya turomola nama bainga ningi ani ikup gi lagasam; ale pempem turomola bu to lagasam.

¹⁵Bare ani uwuta balik, mu ani nika kariimet nunga bo iwita mena.

¹⁶Ani ikia mel suen la imi ninguru ko ikiekko ikia aga moa lagakaso, bare ikup biya nunguning.

¹⁷Bare tom ani nika temple ningi kasu nagu asele aga ikia sinararam, se kariimet memek tom udagi te memek nungumik te aratukko mu ani ko sinarerem.

¹⁸Nunguningta, ni sor palepalengam mu ningi nunga awur se palungurmon ale dagulomon eng am memek tamonkowo!

¹⁹Nuna tairatela memek biya arigimonko; memek bibiya nunga sarumu warukko.

²⁰O Kari Biya, tom ni barasu sanamir, mu nuna tairate mena namamonko; se nuna mu kari ipingira memek iluso ale turomola kuamili sapa namoso iwitatala, ni nunga kamili saparukko.

²¹Tom ani iki maguwukasam se angamang motam dagulukaso,

²²mu ani buruk kausik ko ngualara sipira iwita aimi bitakasam, ale ani ni ko ko ninguru me sinarakasam.

²³Bare ani pempem la ni kerak pingi bagasam; se ni ani agiting te aga ilusam.

²⁴Nika ikia sinar mu te aga bitarsam; ale tom udagi te mu ni ka sor nikim mu ningi aga aru toko.

²⁵Ni keta suanta ni aninga angamang motam, se ani anape karogo duruk wonong te se ali imi te ko kuerikko? Mena!

²⁶Aninga ikia se angimik mu sokel kaparuk agi wore, Kaem, ni keta suanta aninga sail se aga ikia nunguning ko duap, tom suen biya ko.

²⁷Nunguningta, arikaya nika betesan ale nika ko awar biya bagasan mu mena namamonko; awiriya ni diram la me karo kisisan, mu ni nunga maguwurko.