Psalms 73:2-27

²Machane i chugur ni nge dabki pagan’ug; ma mich rog e chugur ni nge mul,

³ni bochan e awan’ug ngak e pi’in yad ba tolngan’ nap’an ni gguy ni pi’in kireb e bo’or ban’en rorad.

⁴Darir gafgowgad ko amith; bfel’ rogorad ndariy e m’ar rorad.

⁵Darir gafgowgad ni bod boch e girdi’; darir mada’ niged e oloboch ni bod boch e girdi’.

⁶Ere kar nunuwgad ko ufanthin ni bod ba kiy i churuwo’, ma farad yargal e ke mang mad ngorad;

⁷gumircha’rad e be thang’el e kireb riy nga but’, ma leam rorad e ke suguy e kireb nike m’ay i t’ar liyben rorad.

⁸Yad be moningnag boch e girdi’ ma yad be weliy e tin kireb; yad ba tolngan’ ma yad be puruy’nag rogon ni ngar gafgow niged boch e girdi’.

⁹Yad be yog murung’agen Got nu tharmiy nga dalib, ma yad be yog u fithik’ e ufanthin e tin ni nge rin’ e girdi’ nu fayleng,

¹⁰ya mus ngak e pi girdi’en Got ni kar chalgad ngorad kari mich u wun’rad urngin e tin yad be yog.

¹¹Be lungurad, “Dabi nang Got, en ni Th’abi Tolang e dabi nang!”

¹²Irera’ rogon e pi’in yad ba kireb! Pire’ ban’en rorad ma gubin ngiyal’ ni be mun daken!

¹³Gur mm’ay fan ni kug teg ni gub machalbog, ma dagur ngongliy ba denen?

¹⁴A Got, kam teg gu be gafgow ni kakadbul nge mada’ ko nep’; gubin e kadbul ni ga ma gechig nigeg!

¹⁵Fa’an mang e gog e tinir e thin, ma dab gu ngongol ni bod reb e girdi’ rom.

¹⁶Ere kar gu athamgiliy ni nggu nangfan e ren’ey, ma kaygi mo’maw’ ngog,

¹⁷nge taw ko ngiyal’ ni gu wan ngalan e Tempel rom. Ma aram mu gu nangfan e tin bayi buch rok e pi’in kireb.

¹⁸Rib mudugil ni kam tayrad ko yungi n’en nib tamasirgig, ma bay mu gagiyeg nagrad ngar mulgad nga fithik’ e riya’!

¹⁹Nthang owcherad u lan ta’ab talab; wenegan ni yib ngorad ko tomur e gafgow nib gel!

²⁰A Somol, yad bod ba lik’ay ni kadbul ma dariy; yira od ma ka ni pag talin.

²¹Nap’an nra mo’oy e leam rog, me maad’ad e tafnay rog,

²²ngiyal’nem e ug par ni gub manan’ ni bod ba gamanman; da ug nangfan e tin ni um rin’.

²³Ni yug aram rogon ni ug par nigub chugur ngom, ni ga be kol pa’ag.

²⁴Ga be pow’iyeg ko fonow ni ga be tay ngog, ma tomur e bay mu fekeg nga fithik’ e fla’ab ni aram e ka mu tolang nigeg.

²⁵Ku ba mang ban’en ni bay rog u tharmiy ya kemus ni gur? Fa’anra ga bay rog, ma mang e ren’en ni ku gu ra adag u fayleng?

²⁶Lanin’ug nge dowag e ra me’waer i yan, machane Got e ir gelngig; kari mus ni ir e nge yag ngog!

²⁷Pi’in kar n’iged gur e rib mudugil ni bay ra m’ad, ma bay mu thang owchen e pi’in ndarir yul’yul’gad ngom.