Psalms 72:2-18

²Se nu munan ningo diram mu te nika kariimet nunga gi se, aking kariimet nungumik mel mena mu ninguru tala nunga bituokko.

³Se nika munan ningo diram se bagara ningo bitar se duruk bibiya se ali lilim la awote kaparukko, se kariimet te ningo bagamonko.

⁴Se king mu kariimet nungumik mel mena mu nubiring ko sanamaruk ale, kariimet nungumik wonong kawam mena mu nunga gi nu bowa nunga tugumok, ale awiriya kariimet kituwura uwuta mu nunga bita maguwuwasan, mu nu koma ko nunga maguwurokko.

⁵Se worem sige pempem nikim kapawasan iwita, kariimet ni ko ko nguanga se bowa ningi nip patawu se lagamonko.

⁶Tuwik ningo daguloso ale ningam yu tuso se inang yawarakala aragoso iwitatala, king umu uwutata baga se lagarukko.

⁷Tom nu king bagoso mu te mu kiwem ningo diram mu pempem la anirukko; sige nikinang kapa lagoso iwitatala, bagara ningo mu pempem la anirukko.

⁸Noko kuting mu maiya biya, gagi dun sang te se nama gagi dun sang te; se ko bitua ningo mu yu Euphrates te se nama ali lilim ko komasang te.

⁹Se sor garagarayam te bagara ko kariimet suen la nu bowa ningi bagamonko; kager kari nu ilak memek mu ko suwik duap ningi dagulomon ale kupkup namonko.

¹⁰Se sor Tarshish ko king se tual gotektek sang ko mu manga mel ningo ningo karogo tai tumonko. Sor Sheba se sor Seba ko king mu mel ningo ningo karogo tai tumonko.

¹¹Se king suen la nu koma te nubugura kulukurmon se kariimet sor suen la mu nu bowa ningi la bagamonko.

¹²Mu awuk, kariimet nungumik mel mena mu nu arumon, mu nu nunga nuguring iluwokko; se kariimet mel ko tukunangawasan bare nungumik saonga mena, mu nu kota nunga sangukko.

¹³Kariimet nungumik nosokel mena, se mel mena bagasan, mu gomang motam nungarukko; se kariimet nungumik mel mena bagasan, mu nunga giok ale nunga sangukko.

¹⁴Se kariimet saki nunga mosan maguwusan, mu nu nunga giok ale nunga sanguk ale ninguru nunga kuerukko.

¹⁵King mu pempem la baga lagarukkowo! Sor Sheba ko gold mu nu tumonko! Se kariimet nu ko ko Kaem aru ngatangarmon, ale balmon, “Kaem ko marak sokel pempem kumik kuali kapa lagarukko,” ma balmonko.

¹⁶Ali lilim la na inang sor magaruk, ale duruk luan mu inang muguri rice iwita mu karogo terong maukko; se ko tam muguri yaman nuam mu Lebanon ko tam muguri iwita nunguning kapamonko; se ko kariimet wonong bibiya ningi mu gue paguk ale sor suen biya te sirsir pauk maso iwita sor ira sapamonko.

¹⁷Se kariimet noko nup biya mu ko nungamili me ta saparukko, se noko kiwem ningo mu worem kani lagoso iwita, kani se lagarukko. Nu te ali sor suen la marak ningo tamon, ale noko nup patawu se lagamonko.

¹⁸Yawe, Israel ko Kaem, ko nup biya patawunakko! Yam nu kota kiwem bibiya beteso se arataso.