Mbouŋ to Yes Israela 72:2-18

²Ve iŋgabiiz poian tamtoghon tiom, ve igharaat saveeŋ todi itaghon ŋgar deŋia. Ve iyoon pa yes mbolaaŋa ve yes to ledi izadi maau ne, ve iuul di pa pataŋani todi.

³Nighaze nepooŋ poia ivot irau lolooz tisob to ndug tonene. Ve ndug mbuŋa mbuŋa tighita anoŋa to ŋgar deŋia.

⁴Ugham kinik tiei iyoon pa yes to ledi izadi maau ne, ve iparab ariaŋa padi. Ve yes to mbolaaŋ igham di ne, ye irau iuul di. Eemoghon yes to titatan tamtoghon ve tighurghur pataŋani padi, ye irau itatan di le tapiridi isob kat, ghoro poia.

⁵Maaron, tamtoghon tiom pale timatughez payom ve titaghon ŋgar tiom itaghoni taghoni gha ila, tinimale ndag ve kaiyo to tineep irau sawa isob.

⁶Nighaze kinik tiei iuul tamtoghon tineep pooi, inimale uman to itap izi ila uum, ve ipambees taan, ve igham aniiŋ titub pooi.

⁷Sawa to ye iŋgin ghei, nighaze ŋgar deŋia ve ŋgar luuma ivotvot inim tiina. Leso tamtoghon tineep pooi ila ila le irau sawa isob, ve taghita kaiyo muul maau.

⁸Kinik tiei pale iŋgin ndug tiina kat. Te dige eez pale inim ŋgat pani, ve ivool ila pa te dige ite. Ve ya Euprates pale inim ŋgat pani, ve ila ila le irau taan dige to naol ne.

⁹Yes to tineep izi ndug balim, pale tinim ve tiput aghedi pani. Ve koia pale titap tizi ila mata, ve tighan ghavuur to taan. Pasa, tirau mbeb eta muul maau.

¹⁰Ve yes kinik to Tarsis yesŋa kinik to tineep tirau mutu tisob pale tinim, ve tigham mbeb popoia pida pa kinik tiei, ve tipaiti. Yes kinik to tiŋgin taan suruvu to Arabia ve Etiopia ne paam, pale tinim, ve tigham mbeb popoia pani. Leso tipatooŋ taudi tighaze yes pale tineep ila samba.

¹¹Nighaze kinik tisob tinim tiput aghedi pa kinik tiei, ve tineep ila samba. Ndug ndug timbees pani, ghoro poia.

¹²Pasa, sawa to yes mbolaaŋa tipoii pa ulaaŋ, ye ilooŋ taŋiiz todi. Ve yes to tineep sami, ve ledi ulaaŋa eta maau, ye iuluul di pa pataŋani todi.

¹³Ye lolo isamin yes mbolaaŋa ve yes to tapiridi isob, ve ighamgham mulin di pa pataŋani todi. Leso tineep pooi.

¹⁴Ighaze tamtoghon titatan di ve tiwaghamun di, ye iyondyood padi, ve ighamgham mulin di ila koiadi tonowen nimadi. Pasa, ye lolo padi kat. Tovenen irau imbatut di, ve siŋ todi imaliŋ sorok ne maau.

¹⁵Maaron, upalot kinik tiei. Leso ineep mala izi taan. Yes Arabia pale tigham le yaam gol to ŋgalaaŋa kat. Ve sawa isob, tamtoghon pale tighur kinik tiei ila suŋuuŋ todi, ve tighason Maaron pa ipaloti, ve ighur poia toni iza toni.

¹⁶Maaron, ugham aniiŋ katindi tivot ila taan tiei le irau uum tiei to lolooz we. Ve wit anoŋa katindi tivot, ve ayadi kalkalia ilala inimnim, tinimale yes Lebanon todi. Ve tamtoghon tovene paam. Nighaze ndug tiei tisob timasa tinim naol, tinimale kikiliiŋ to isaas izala taan pogho.

¹⁷Kinik tiei, iza pale inepneep tovene itaghoni taghoni gha ila! Iza tiina pale ineep irau sawa isob, inimale ndag to moghon moghon ighazghaaz. Pasa, ye pale inim ataam pa ndug ndug, leso poia to Maaron iza todi. Ndug ndug pale tighita kinik tiei, ve tipaiti tighaze poia to Maaron ineep tomani.

¹⁸Tapait Yoova! Ye Maaron to iit Israela! Ye moghon to ighamgham uraat gharatooŋadi tintina. Uraat tonenen, ite kat.