Psalms 50:5-23

⁵“Aninga kariimet, aninga ma nunga balem se ani agarak tama bita aisa ko den kaloman, mu nunga aural se taimon angama te biguwumonko,” maso.

⁶Se taiti gomang lilim mu noko munan ningo dirkiriyam mu balu pagarso, mu awuk, nu kota nu tutera kari.

⁷“O aninga kariimet, iki sagaral se ani balikko! O Israel, ani den te ninga bitirikko. Ani Kaem, nenenga Kaem.

⁸Ani nenenga tama bita aisa mu ko me iningisam; pempem tama bita aisisan mu yawarakala kani saposo.

⁹Ani nenenga bulmakau kari agi goat por ningi bagasan mu ko me balsam tala.

¹⁰Mu awuk, nio yalek se mel suen la giarum ningi mu se, bulmakau mel motongar kuting suen la te no giwasan, mu am aninga tala, se ani anape ko umu ko ninga isuekko?

¹¹Ani inangnang suen la giarum ningi binga geragasan mu am nunga ikia la; se kusiska se madar ugigi guringi bagasan mu yam aninga tala.

¹²Ani ali kari iwita se na ko kuerik, mu ani anape ko nenenga manikko? Ali lilim la se mel suen la awote mu ani ko kotam.

¹³O ani pa nengerak bulmakau nunguning nasam e? Ani goat ko gue me nasam tala, mena.

¹⁴Buta se, ani Kaem Kalel Biya agarak den kaloman uwutata beteralko; tama bita aisisan iwitatala, nengemang motam lilim la aisal ale amilmil te aip patawuralko.

¹⁵Ale ikup kam ningi mu aninga aural, se ani ninga sangaru taik se nina ani aip biya aisalko.”

¹⁶Bare nina munan memek betera ko kariimet mu Kaem iwita nenenga ko balso: “Awiri kuring te nina aninga munan den mu ninimi karogo tutia gurugu lagasan? Ale anape ko den ani agarak kaloman mu nigiring guang te la balu lagasan?

¹⁷Nina aninga den biriruwusan, ale to nibiring ko betesan.

¹⁸Nina tere kari nongorak sorasan, ale kari imet karogo, agi imet kari karogo mu nunga tagisan ale nongorak nasan gisan.

¹⁹Nenenga nigiring te den kawel se den memek arataso.

²⁰Nina nengeta ninga launuria nunga nunup te den kawel balsan, ale nenenga gue suan nubiring ko nunga balu maguwusan.

²¹Nina uwuta bitakasan se ani den bo me balukasam, se nina ani nenenga bo iwita aga ikikasan. Bare aitak ani den te ninga betesam ale den te ninguru ninga atumekko.

²²“Nina kariimet nibiring ani aisisan, mu aninga den ikial ale giris palagalko! Mena mu, ani ninga batutumurek se katir katir kaparal se kariimet bo ninga sangukko mena.

²³Ikialko. Kariimet tama bita aisa iwita nongomang ningi nunguning te amilmil aisisan, mu ani aip biya aisisan, ale ani te nunga sangaru taikko lage kuring kagorsan.”