Salmo 50:5-23

⁵“Ayagan yo din napodno ay ipogaw ko,” kanana, “din nakitolag en sak-en babaen si datdaton da.”

⁶Din amin ay wadad daya, din kinalinteg Diyos di ipaneknek da, tan din mangokom et sisya.

⁷Kanan Diyos, “Dakayo ay Israelita ay ipogaw ko, dengngen yo din ipaneknek ko ay maikontra en dakayo, tan sak-en si Yahweh ay Diyos yo.

⁸Baken say panyamyamak en dakayo din datdaton yo ay kaman din kanayon ay idatdaton yo ay maipoo.

⁹Ngem adiak pay dedan kasapolan din bomaro ay baka yo ya kalding ay mapo en dakayo.

¹⁰Tan okak amin ay animal sin kada ya din wadas kadontodontog ay baka.

¹¹Okak abe amin ay mantaytayaw ya amin ay parsua sin payew.

¹²Mo kaspangarigan mandagaangak, baken dakayo di pangibagaak, tan din daga ya amin ay wadas labaw na yan okak.

¹³Ay siya mo mansidsidaak si bomaro ay baka? Din kalding yan adiak met inomen dada da.

¹⁴Say laydek ay daton yo din en kayo pan-iyamanan en sak-en ay Diyos ay kangatoan, siya abe sin panongtongpalan yo si amin ay ikari yo.

¹⁵Mankararag kayon sak-en sin timpon di ligat yo, isalakan kos dakayo et omidaydayaw kayon to.”

¹⁶Ngem sin mangam-amag si lawa, kanan Diyos Apo, “Magay lebbeng mo ay mangibagbaga sin bilbilin ko ya mangidaddad-at sin intolag ko,

¹⁷tan din pamagbagak yan kaliliget mo, din kalik yan adi kan ikaskaso.

¹⁸Mo way ilam si mangakew yan makigayyem ka ya makikadwa ka sin makikamkamalala.

¹⁹Nakasagana ka ay mankali si lawa ya pag etek di en ka ibagbaga.

²⁰Olay din kabsat mo yan palawlawaem sisya.

²¹In-giginek ko sin nangamagam sina yan kanam et en kamanak sik-a. Ngem ed wani, ibagak din basol mo et ilawlawag kon sik-a.

²²Nemnemen yo na, dakayo ay adi omikaskaso, tan mo maga, bisngibisngitek dakayo et magay makaisalakan en dakayo.

²³Din kosto ay daton ay pangdayaw yon sak-en et din panag-iyaman. Olay sino ay mantongpal en sak-en et enak isalakan.”