Psalms 31:13-20

¹³Kari memek abiring ko munakasan mu ani ikisam; nuna ani nguangara bo karogo aisimonko karogo kaesan; ale den ningi aga betemon ale aga momon se kuerikko karogo kaesan.

¹⁴Bare Yawe, ani nikate la ira sanami lagasam; ale balsam, “Ni aninga Kaem,” masam.

¹⁵Ani ni kiting te pempem la bagasam; ni kari memek aninga momonko aga karowasan umu nuguting te aga bataguru toko.

¹⁶Ani nika ura kari, se ni gemang aisuko; nika kua aisa ko munan yawara mu te aga sangaru toko.

¹⁷Yawe, ani nika arusam, ni kari memek me nungarki sager se dolara aisimonko; ni nuna dolara ikup memek ningi nunga waru se, kua paranga mutim ningi namamon ale sor kutek maukko.

¹⁸Nuna kawel kari, nunumi patawusan ale nusupuling lagoso se kariimet ningo diram mu nunga den dolara balsan. Ni nuguring kalo se sisirokko!

¹⁹O Yawe, ni kariimikiri saki nongoma te, kariimet ni bowa ningi nagu tai yumusan mu nika mel ningo ningo nungem mu nungaru gurugusam.

²⁰Ale kimik duap te nunga kaluwusam, se kari nunga bita maguwumonko den kalosan mu me ta nunga bita maguwumonko, ale kari den te nunga atumumonko mu nunga maguwumonko me terong tala.