Pisalem 31:13-20

¹³Au e longono nia leelee hagamoolee o ogu hagadaumee dogologowaahee. Di madagu gu i ogu daha! Digaula e haga noho di nadau hai dela belee hai baahi mai gi di au, belee daaligi au gii made.

¹⁴Gei au e hagadagadagagee hua adu gi di Goe, meenei Dimaadua, Kooe go dogu God!

¹⁵Goe e madamada humalia i di au i nia madagoaa huogodoo. Haga dagaloaha ina au gi daha mo ogu hagadaumee, gi daha mo digau ala e hagahuaidu au.

¹⁶Mmada mai gi dau dangada hai hegau deenei i di manawa dumaalia. Haga dagaloaha ina au gi do manawa aloho dee modu.

¹⁷Au e dangidangi adu gi di Goe, meenei Dimaadua. Goe hudee heia au gi langaadia. Heia digau huaidu gi langaadia, digaula gi hula hua deemuu gi lala gi tenua o digau mmade.

¹⁸Heia digau hai kai tilikai aalaa gii noho deemuu, digau hagamuamua huogodoo mo digau haga balumee dangada, digau ala e haga balumee digau ala e donu.

¹⁹E haga goboina huoloo go nia mee humalia ala e benebene Kooe ang gi digau ala e hagalaamua Goe! Digau huogodoo gu iloo bolo Goe e humalia huoloo, ge e benebene mo di abaaba hagahumalia digau ala e hagadagadagagee adu gi di Goe.

²⁰Goe e hagammuni digaula hagahumalia i mua o hadumada gi daha mo nia haganohonoho o nia daangada. Goe e hagammuni digaula gi lodo di gowaa humalia gi daha mo nia helekai huaidu o nadau hagadaumee.