Psalms 139:3-17

³Ni aninga namara taira bagara aolak mu am ari ko iki sapasam.

⁴O Yawe, den ani agiring te aratukko, mu ni girisam ikiwasam se ani balsam.

⁵Ni ani amake ko, abiring ko, se abeta koma singsang bagasam, ale ka kiting te aga iramursam.

⁶Ni ani ninguru aga iki sapasam mu aningate mel aromemek, se ani ko iki saparikko me terong.

⁷Awiri nika Bur ko motam ko yumura ikiso? Ani aparete nagu namarik ale ni motam ko yumurekko?

⁸Ani taiti gomang te ta nama yumurek, bare ni mu te bagasam; aking gagi naung du biya ningi nama yumurek ta, wore ni mu te bagasam tala.

⁹Se ani binga nama worem bausa te, se nama gagi biya dun sang te ta wore,

¹⁰nika kiting te am aga ilu se aga kiti guruguwasam.

¹¹Ani ta balik, “Nikinang menaruk se tiromorom aga lautok ale aga ira kaluwurokko,” ma balik ta wore,

¹²tiromorom mu nika motam te am nikim la, mu awuk, tirom se kowarkalal mu nika motam te am koma suanta.

¹³Ni aninga angimik nuamur suen la nungem, ni ani ayam tuagu ningi la aga nungem burangerem.

¹⁴Se ni aninga nungem mu am duap bo, se ani ka nip patawusam; ani ninguru ikisam, nika ura suen la bita saperem mu ko balu kutuwurekko me terong.

¹⁵Tom ani aga ayam tuagu ningi yumura la lagawakasam, mu ni aninga angimik lilim mu ari ko ikiwakasam.

¹⁶Tom ani me bilangerem, am gue te bagerem la, ni aga ikiem, ale aga marak bagara tom mu bataguru beterem.

¹⁷O Kaem, nika ikia ani ago ko mu ulal biya se ani awuk ko iki saparikko? Nika ikia suen biya nunguningkiri,