Psalms 119:128-168

¹²⁸Nunguningta, nika den mu aninga kiti guruguso, se kiwem kawel suen la mu ani me ta ko kuesam.

¹²⁹Nika den suen la mu yawarakala; buta se ani karo tusam.

¹³⁰Nika den apusan mu nikim nangarso, ale kariimet den umu me ko ikia ta wore ikia sinar nungarso.

¹³¹Ani nika den ninguru ko iki kutuwurekko angamang nia lagoso.

¹³²Kema gurugu ale gemang lila aisuko; kariimet awiriya nika kuesan mu ni uwutata nongote betesam.

¹³³Nika den te aninga aolak diram la kiti gurugu se kiwem memek bo ta ani me aga kiarukko.

¹³⁴Kariimet memek alo nuguting te aga sangaru to se ani nika den karo tuekko.

¹³⁵Kema gurugu ale gemang motam ani ka ura kari aisu ale nika den aga kasuruko.

¹³⁶Aninga amononge mu yu ko kapawoso, mu awuk, kariimet nika karo tua ko den me karo tusan.

¹³⁷O Yawe, ni mu ningo dirkiriyam nunguningkiri, se nika den mu diram la.

¹³⁸Nika den suen la nangarem mu am ningo diram, se anananga ningo ko mel biya nunguningkiri, kari bo ko suwik saparukko mel bo mena.

¹³⁹Angamang magara mu tama ko kaniwoso, mu awuk, kager kari memek nika den mu mel yam ko betesan.

¹⁴⁰Ni ka den mu me gurugusam patawusam se ani arigem mu am ningo, se yawara nunguningkiri; se ani nika ura kari ninguru ko kuesam.

¹⁴¹Ani mu kituwura se agarki maguwusan, bare ani nika den mu me ta ko angamili saposo.

¹⁴²Nika ningo dirkiriyam la bagara ko munan mu kumik menara mena, se nika karo tua ko den mu den nunguning.

¹⁴³Ikup aga iram se angamang daung daung maso, bare nika den mu ani amilmil aisiso.

¹⁴⁴Nika den mu ningo dirkiriyam la pempem aniso; aninga ikia sinar awur se ani te bagarikko.

¹⁴⁵O Yawe, angamang motam lilim te ka arusam; agiring ilup se nika den karo tuekko.

¹⁴⁶Ani nikate aisam, aga sangaru to se ani nika den karo tuekko.

¹⁴⁷Ani worem me bausa la barasasam ale nika saonga ko aisam; aninga amotam mu nika den te la loaga lagasam.

¹⁴⁸Ani tirom mu amotam anira mena, am marak laga se nika den ko iki gurugu lagasam.

¹⁴⁹O Yawe, nika kua nangara mu ko munan yawara mu te agiring ilupko; nika den te daiga bagara ningo aisuko.

¹⁵⁰Kariimet kiwem memek te aga bita maguwumonko mu tai angimik aman, nuna nika karo tua ko den mu me karo tusan.

¹⁵¹Bare Yawe, ni ani agarak pingi baga se aga sangorsam, se nika den suen la mu nunguning la.

¹⁵²Ani ulengkala la nika den mu ari ko ikiem, mu ni girakala la beterem se nukuri ago butata anirukko.

¹⁵³Ani ikup yaman ningi bagasam ewere arik ale aga sangaru toko, mu awuk, ani nika karo tua ko den mu me ko angamili saposo.

¹⁵⁴Kari memek nuguting te aga sangaru to ale ka den te balem uwutata aga bitaruko.

¹⁵⁵Memek bitawara alo mu nika den me karo tusan, buta se ni me nunga sangaru toko.

¹⁵⁶O Yawe, nika gemang lila mu mel aromemek; ka den te balem uwutata aga bitaruko.

¹⁵⁷Aninga bita maguwura ko kariimet alo mu suen biya, se aga bita maguwusan, bare ani nika den me ta abiring tusam.

¹⁵⁸Nika kariimet saki nika den nubiring tusan mu ko ninguru angamang magoso, mu awuk, nuna nika den me karo tusan.

¹⁵⁹O Yawe, ani nika den ko kuesam mu ni ko ikisam, buta se ago ko kuar ale aga bitaruko.

¹⁶⁰Nika den suen la mu am nunguning la; nika munan den ningo dirkiriyam la mu kumik menara mena.

¹⁶¹Kari supuling memek alo aga bita maguwusan mu kumik duap bo mena, bare ani nika den ko suanta nguangasam.

¹⁶²Ani nika den ko aisam amilmilasam, o kari bo mel bo ningo arigiso ale iruso ko amilmiloso iwita.

¹⁶³Ani kawel ko munan mu me ko kuesam ale biriruwusam, bare ani nika karo tua ko den mu ko kuesam.

¹⁶⁴Ani nika den ningo dirkiriyam mu ko, woremkalal suanta mu, tom suen biya ko amilmil kisisam.

¹⁶⁵Kariimet nika karo tua ko den ko ninguru kuesan mu nongomang lila te bagasan, se tareng memek bo te me ta dagulamonko, mena.

¹⁶⁶O Yawe, ani ni aga sangaru toko kimikam la loaga se, nika den karo tui se baga lagasam.

¹⁶⁷Nika den mu yawara se ani karo tusam, mu awuk, ani tawun biya ko kuesam.

¹⁶⁸Ani nika den karo tusam, mu awuk, ni aninga kiwem mu ari ko iki sapasam.