Proverbs 11:3-24

³Fa’anra gab manigil, ma yul’yul’ e be pow’iyem. Girdi’ ni dabyag i pag e taga’ ngorad e sasaliyab rorad e ra kireb nagrad.

⁴Fla’ab rom u fayleng e dariy angin ngom e rofen nra taw e yam’ ngom, machane yul’yul’ e rayag ni ayweg e yafos rom.

⁵Yul’yul’ e ra momnag e par rok be’ nib manigil, machane en nib kireb e ir tapgin e mul nra tay.

⁶Mat’aw e ra ayuweg e pi’in yul’yul’ ni dabi buch ban’en rorad, ma pi’in dabyag ni nge pagan’uy ngorad e ke m’agrad e chogow rorad.

⁷Nap’an nra yim’ e pi’in kireb’, me un e l’agan’ rorad ko yam’. Pagan’ ni ngan yuluy nga daken e pi fel’ rogon e ra yib i aw ndariy.

⁸Pi’in mat’aw e kan yororiyrad rok e oloboch; ma pi’in kireb e ra aw ngorad.

⁹Rayag ni nge kireb nigem e thin rok e girdi’ ni denang Got, machane gonop ko pi’in mat’aw e rayag ni aywegem.

¹⁰Ra felan’ bbinaw ko ngiyal’ nra fel’wa’athan e girdi’ ni yul’yul’, mra yim’ e girdi’ ni kireb mi yira tolul ngalang ko felfelan’.

¹¹Ra mon’og reb e binaw u nap’an nra athapeg e girdi’ ni yal’uw ni nge fel’, mra kireb reb e binaw ni bochan e thin rok e pi’in kireb e leam rorad.

¹²Rib balyang ni ngan weliy thibngin boch e girdi’. Fa’anra ba tamilang lanin’um, ma ga ra th’ab gulngam.

¹³Dariy be’ nib ta’ gun’gun’ nrayag ni nge pagan’uy ngak u ban’en nib mith, machane be’ nib yul’yul’ e ra pagan’uy ngaki.

¹⁴Ra kireb ba nam ni fa’anra dariy e fnow riy. Ra fel’ rogon ni fa’anra yo’or e pi tafanow riy

¹⁵Fa’anra mmicheg ni ngam thang e malfith rok ba milekag, ma ga ra kalngan’um riy. Kabfel’ ni dab mu og nigem ngay.

¹⁶Be’ ni bpin nib gol e yira tayfan, ma be’ ni bpin nib kireb pangin e ba thiyar. Girdi’ ni gamead e dariy bingyal’ nrayag e salpiy ngak, machane girdi’ ni gelfen e ra yo’or e salpiy rorad.

¹⁷Bfel’ ngom ni ga ra gol. Ma fa’anra damur runguy be’, ma kemus ni gur e ngam gafgow nigem.

¹⁸Girdi’ ni kireb e gathi rmayag ban’en ngorad, machane fa’anra ga ra rin’ e n’en ni bfel’, ma rib mich ni yira tow’ath nagem.

¹⁹Demturug be’ nike duwgiliy u wan’ ni nge rin’ e tin nib mat’aw mra par nib fos, ma en nike duwgiliy ni kireb e nge ngongliy e ra yim’.

²⁰I SOMOL e ma fananikay e pi’in kireb lanin’rad, ma bt’uf rok e pi’in yad ma ngongol ni bfel’.

²¹Ngari mich u wun’um ni girdi’ ni kireb e yira gechignag, ma pi’in mat’aw e yad ra thay riy.

²²Pidorang rok be’ ni bpin nde nang mat’won ban’en e bod ba luwaw nib gol u lan p’ethngun e babiy.

²³N’en ni ba’adag e girdi’ ni bfel’ e gubin ngiyal’ ma fel’ e ra yib riy; ma nap’an nrayag ngak e pi’in kireb e n’en ni yad be finey, ma gubin e girdi’ nra damumuw.

²⁴Boch e girdi’ e yad ma wereg e salpiy rorad nib puf pa’rad riy ma ku be fel’ rogonrad i yan. Ma boch e ba ta kol’ayuw ngay, ma ku be gel e gafgow rorad i yan.