Ola Saam 64:2-9

²Yu maindim mi brom detlot nogudwan plen blanga detlot nogudwan pipul. Olabat bigmob nogudwan pipul.

³Olabat yusum olabat tang blanga tok ola wed laik shapwan naif, en ola krulwan wed kamat jis laik ola poisinwan erro weya det hanta yusum.

⁴Olabat nomo bradin. Brabliwei dei spredimat ola laiyawan stori blanga ola gudbala pipul. Dei jis laik det hanta weya blandim miselp en shudum im erro.

⁵Olabat album gija blanga dum nogudbala plen. Olabat tok gija hau dei garra pudum ola trep blanga gudbala pipul. En olabat tok, “Nobodi kaan luk melabat. God du kaan luk melabat.”

⁶Olabat jidan en meigim plen blanga dum nogudbala ting en dei tok, “Wibin meigim brabli gudwan plen blanga dum.” Det hat en main blanga pipul im brabli difrinwan. Wi kaan sabi wanim dei jinggabat.

⁷Bat God garra shudum olabat garram ol im erro, en streidawei olabat garra gitkil.

⁸Im garra binijimap olabat blanga detlot nogud wed deibin tok. Detlot nogudbala wed weya deibin oldei toktok garra binijimap olabat. Ebribodi hu garra luk olabat garra sheikim olabat hed blanga mokimbat langa olabat.

⁹Olabat holot garra bradin. Dei garra jinggabat wanim God bin dum en dei garra tok blanga ola ting weya imbin dumbat.