Kap 64:2-9

²Amɨn yokwi nak aŋupbal ak do pasulɨkon da gen yaŋ paŋkosit aŋ. Aŋek nak nɨt do muwukgaŋ, do kɨlano aŋaki yo yokwi dɨma aŋ namni.

³Geni uŋun geni tepmɨsi. Emat agak sɨba da yaŋ mandaŋ namaŋ. Amɨn da amɨn do tɨlak aŋek obip paŋɨlɨkgaŋ, uŋun da tɨlak geni emarɨ toŋ baŋ nak paŋɨlɨk namaŋ.

⁴Uŋun pasɨl egek amɨn kɨlegɨ do obip yamaŋgaŋ. Uŋun dɨma pasolgoŋ, do tepmɨsi yamaŋgaŋ.

⁵Iyɨ paŋteban ak do aŋpak yokwi uŋun aŋ. Amɨn dɨwarɨ yokwalni do pat yopmaŋek gen yaŋ yoŋ, “Amɨn kɨnda da nin arɨpmɨ dɨma nindakdɨsak.”

⁶Aŋpak yokwi ak do gen yaŋ paŋteban aŋek yaŋ yoŋ, “Aŋpak yokwi kɨnda ak do dakon nandak nandak tagɨsi amaŋ. Yo uŋun akdamaŋ uŋun amɨn kɨnda da arɨpmɨ dɨma kaŋ nandaŋyo asak.” Amɨn dakon but nandak nandakyo arɨpmɨ dɨma nandaneŋ. Uŋun pasɨlɨsi.

⁷Mani Piŋkop da iyɨ dakon gobɨŋ baŋ yamaŋ yomdɨsak. Aŋakwan uŋudon gɨn wuda madepsi noman tokdaŋ.

⁸Amɨn dɨwarɨ paŋupbal ak do yawit, do Piŋkop da paŋupbal akdɨsak. Amɨn morap uŋun pɨndatni amɨn da jɨkgo yokwisi yanjaŋ yomɨŋek wɨnda kwakwal aŋ yomdaŋ.

⁹Mɨŋat amɨn morap kɨsi Piŋkop do pasoldaŋ. Aŋek Piŋkop da yo uŋun asak uŋun do yokdaŋ, ae uŋun do nandaŋ egɨpdaŋ.