Ola Saam 143:1-12

¹YAWEI, yu irrim main preya. Dumaji yu jidan trubala en raitwei, yu irrim main preya en ensim mi.

²Nomo jadjim mi, yu wekinmen, dumaji yu sabi nobodi iya jidan gudbala, najing.

³Main bedfren olabat bin tjeisimbat mi en deibin gajim mi. Deibin pudum mi langa dakwan jeil, en mi jidanbat jis laik detlot pipul hubin dai longtaim.

⁴Wal mi redi blanga gibap. Mi filim miselp brabli nogudbinji.

⁵Mi jinggabat ol detlot dei weya bin binij, en mi jinggabat ebrijing weya yubin dum.

⁶Mi lidimap main bingga blanga prei langa yu. Jis laik draiwan graun main spirit insaid jidan thestiwan blanga yu.

⁷Kwikbala na YAWEI, yu ensim main preya. Ai kaan dum enijing. Nomo libum mi iya miselp bambai mi dai en godan langa det pleis blanga ola dedbala pipul.

⁸Ebridei yu meigim mi jinggabat blanga yu filing weya yu laigim mi olagijawan, dumaji mi bilib langa yu. Main preya gowap langa yu. Yu shoum mi wujei blanga go.

⁹YAWEI mi kaman langa yu blanga kipum mi seif. Yu seibum mi brom main enami olabat.

¹⁰Yu na main God. Shoum mi wanim yu wandim mi blanga dum. Yu jidan gudbala langa mi en yu deigim mi langa det seifwan roud.

¹¹YAWEI, yu seibum mi jis laik yubin pramis. Garram yu gudwan filing yu seibum mi brom ol main trabul.

¹²YAWEI, dumaji yu laigim mi detmatj, yu binijimap ol main enami olabat, dumaji mi na yu wekinmen.