Godigo Nogi Ugwaba Sabo Tęąbi Po Wabo Buku Dabe 143:1-12

¹Te Devitgo asęani balia po me deli dao. Genuai Bidi, eno homugo nago te eno gedu haluasa po wabo odomainu homu ebao. Te eno gela waboba nago olo muao. Nage doloba pelama, tama nago sesemane sogo mu po wabo da, iya, nago eno gedu haluasa po wabo odao, tau sao.

²Te nago po tųde te ena naga sę bidi me dagaligio. Magi baso meni, te mena bidi me deligo te nago gedude magi dwai sę me ebeo.

³Te eno boi bidigo te ena pobeasa bilama, tama ena aiyaba mu elalualio. Agai ena te be hulia sai pesageba kalabus elama, tama ena polobadu isai bidi tiwai gana yalio.

⁴Tama tialima, eno homu kolesaga te dolobaso, tama eno haliga te sęgę mu elalubadi geani.

⁵Megi da, eno te polobadu pedelali nai dabeba homu kone ma ebao. Tama eno te nago yali sę dabe, me te nago wiegi yai sę dabeba te eno homu kone ma ebao.

⁶Eno nogo si ugwaba siyu, gedu haluasa po nageba weyu, tama eno homu noma ogwa waigo te nage wei mu elama, te bidigo dogoni wa selama, tama aga te wę nogone mu ebo tiwai ebao.

⁷Genuai Bidi, nago eno gedu haluasa po polo odao. Magi baso meni, te eno konealubo homu te dolali. Nage enade geme me duala sigio, tiyu ena isilama, te ena isali bidi dabego pesageba pidalio.

⁸Eno konealubo homu nageba muani. Tialima, eno homugo te tigidali sogo kigamu nago eno homu te nago ena godolo ebo kolesagade ma homu kone palomainu ilao. Eno gedu haluasa po nageba naga wabo dao. Tama tiyu, nago enaba te sunumi ola mobaso, te eno wali paibao.

⁹Genuai Bidi, ena nageba asiyu, te nago ena tonalumainu ebao. Nago ena te eno boi bidi dabego nogode ma sao.

¹⁰Nage eno God da, eno homugo te nago ena bugagia ola momainu homu eyu, te eno nago homu wali pabo homu ebao. Eno homugo te nago homu mobo bidigo ena bugagia wiegi yai ilimainu homu elama, tama ena te wiegi yai sunumiba pabo dodolumainu ebo dao.

¹¹Genuai Bidi, nago ena ma sao, te nago po dąų walali tiwai gilama yao. Nage doloba pai bidi mu da, tama tiyu te nago nogi aiyaba pidali weyu, te tigidali sęgę enaba pedalubode te nago ena ma sao.

¹²Nago ena tigidali sogo wei mu ebo dao, tama te kolesaga ebo sia sogobeo. Tama nago te boi bidi dabe, me te ena dolabo bidi dabe ela muao, magi baso meni, ena te nago sę bidi bidibaso, te tama tiao.