Salmos 143:1-12

¹David isquirbishan alabansa. Tayta Dios, mañacaycämushäta wiyaycamay. Ruwacaycämushäta wiyaycuy ari. Yanapaycamay ari. Gamga allimi canqui. Aunishayquitaga cumlinquimi.

²Gampa ñaupayquichöga manami pipis juchaynäga canchu. Chayno captin nogataga ama jusgaycamaychu ari.

³Chiquimajcunaga gaticachaycäman. Pampaman lagacajpämi ñitiramasha. Wañojcuna pamparaycashanno chacaychönöna cawanätami munan.

⁴Fiyupa llaquishami caycä. Yarpachacuycaptillämi shongöpis aburrïru ricacusha.

⁵Unaycunapaj yarpärëmi. Milagrucunata rurashayquipäpis yarpärë.

⁶Gam cajmanmi macyaraycämö. Gamtaga shuyaraycä chaqui allpa yacunaycajnömi. Selah

⁷Tayta Dios, juclla yanapaycamay ari. Jämaynëpis ushacaycannachaj. Ama cachaycamaychu. Cachaycamaptiquega wañojcunanönachari cashaj.

⁸Nogaga gammanmi yäracamö. Chaymi musyachimay tutapaga cuyamashayquita. Nogaga imata yarpashätapis gamtami willapä. Chaymi tantiyaycachimay imano goyänäpäpis.

⁹Nogaga chapämänayquipaj gammanmi yäracamö. Chiquimajcunapita salbaycamay ari Tayta Dios.

¹⁰Tantiyachimay gam munashayquino cawanäpaj. Gammi Tayta Diosnë canqui. Espirituyqui yanapämächun ari allillata ruranäpaj.

¹¹Tayta Dios rispitasha canayqui-raycu cawachimay ari. Allita ruraj cashpayqui fiyupa llaquicuycajta jorgaycamay ari.

¹²Aunishayquita cumlej cashpayqui, llapan chiquimajcunata illgarachiy. Noga sirbishojniqui caycaptëga llapan conträcunata ushacächiy ari.