Mboe 143:1-12

¹Mboe ki Dabit O Yooba, leŋ suŋŋana tio ti mi uulu yo. Pa nu toto sua ku mbukŋana mi kamam mbulu ndeeŋeŋana men. Mi nu ta biibi tio. Tana ŋgun talŋom pa tiŋiizi tio mi muŋai yo.

²Nio mbesooŋo ku. Tana pamender yo pa sua pepe. Pa tomtom sa ndeeŋeŋana kat be imender su kerem uunu na som. Niam ta boozomen leyam uunu makiŋ.

³Re. Koŋ koi bizin tiketo yo mi tiparaama yo su toono kek. Mi tikam yo ma aŋbotmbot lela zugut biibi leleene, kembei zin wal ta timetmeete ta muŋgu kek na.

⁴Iŋgi leleŋ ipata, mi aŋmoto koŋ ma mburoŋ imap. Pa leŋ zaala sa mini som.

⁵Tana motoŋ ilala pa mbulu ta muŋgu kamam na. Nio aŋkamam ŋgar pa uraata bibip boozomen ta itum nomom ikamam na.

⁶Mi aŋwit nomoŋ mi aŋsuŋu. Nio leleŋ pu ilip, kembei tomtom ta miri i ma ŋgureene ikerekere. Nio iŋgi kembei toono ta ka yok somŋana mi izza pa yaŋ.

⁷O Yooba, leŋ suŋŋana tio ti, mi loŋa mar uulu yo. Pa iŋgi mburoŋ imap kat. Turke motom pio pepe. Kokena aŋmeete mi aŋgaaba zin wal meeteŋan sula Andewa.

⁸Yooba, nio aŋpase pu tau. Sombe zoŋ ise, na so leŋ sua sa. Kam mbulu sa tabe iswe kembei muŋaiŋana ku imbotmbot se tio men. Mi patooŋo yo pa zaala tabe aŋto. Pa nio leleŋ pu mi aŋurur motoŋ pu be uulu yo.

⁹Yooba, tatke yo pa koŋ koi bizin naman. Menderkaala yo mi we ur pio be aŋke lela.

¹⁰Nu ta Anutu tio. Tana paute yo be aŋto kat mbulu ta nu lelem pa i. Itum Bubuŋom ambaiŋana ko ikam peeze pio. Naso aŋpa pa zaala keteeneŋana.

¹¹Yooba, nu zom biibi pa muŋaiŋana ku. Uulu yo be aŋbot motoŋ yaryaara. To mbulu ku ndeeŋeŋana mi tatke yo pa pataŋana ti.

¹²Mbulu ku ta toto sua ku mbukŋana mi urur lelem pa wal ku na, swe mini, mi kas koŋ koi bizin ma timap. Wal boozomen ta tiurur koi pio na, pambiriizi zin ma timap kat. Pa nio mbesooŋo ku tau.