NUMERA 20:7-16

⁷Lohiabada ese Mose ia hamaoroa, ia gwau,

⁸“Taravatu Maua ena vairanai ia noho itotohi do oi abia, bona oi bona Arona ese taunimanima do umui haboua. Vadaeni unai taunimanima edia vairanai, unai nadi badana do oi hereva henia, bona ranu be ia dekena amo do ia heau mai. Unai dekena amo oi ese ranu unai nadi badana dekena amo do oi abia, bona unai ranu be hebou taudia dekenai do oi henia, bona edia ubua gaudia dekenai do oi henia, do idia inua.”

⁹Vadaeni Mose ese itotohi ia abia, Lohiabada ia oda henia hegeregerena.

¹⁰Vadaeni Mose bona Arona ese Israela ena orea ibounai idia haboua, unai nadi badana ena vairana dekenai. Mose ese ia gwau henidia, ia gwau, “Kamonai lasi taudia e, umui kamonai, inai nadi dekena amo emui ranu do ai haheaua mai, a?”

¹¹Vadaeni Mose ese itotohi ia abia daekau, nadi ia botaia nega rua. Ranu be ia heau mai, bada herea. Vadaeni Israela taudia mai edia ubua gaudia danu ese ranu idia inua.

¹²To Lohiabada ese Mose bona Arona ia gwau henidia, ia gwau, “Umui ese lau dekenai umui abidadama henia lasi, bona lauegu siahu helagana Israela taudia edia vairanai umui gwauraia hedinarai lasi. Unai dainai umui ruaosi ese inai orea do umui hakaudia vareai lasi, lau ese lau henidia vadaeni tano dekenai.”

¹³Inai ranu ena ladana be Meriba, badina be unuseni Israela taudia ese Lohiabada dekenai idia maumau. Bona unuseni Lohiabada ese iena siahu helagana idia dekenai ia hedinarai henia.

¹⁴Mose ese Kadesi dekena amo iena hesiai taudia be Edoma ena king dekenai ia siaia. Idia gwau, “Inai hereva be oiemu tadina Israela dekena amo. Oi diba vadaeni ai dekenai idia vara hisihisi gaudia ibounai.

¹⁵Aiemai sene taudia Aigupito dekenai idia lao, unuseni nega daudau ai noho. Aigupito taudia ese ai dekenai bona aiemai sene taudia dekenai idia dagedage.

¹⁶Lohiabada dekenai ai taitai, vadaeni ia ese aiemai taitai ia kamonai, aneru ta ia siaia, bona Aigupito dekena amo ai ia hakaua mai. “Hari ai be Kadesi hanua, oiemu tano ena hetoa gabuna dekenai ai noho.