Nambas 24:18-24

¹⁸Im garra bidim im enamimob langa Idam, en im garra teikoba ola kantri blanga olabat. En detlot Isreil pipul garra jidan brabli strongbala.

¹⁹Detlot Isreil pipul garra pudumbut langa olabat, en binijimap detlot laswan pipul.” Lagijat na Beilam bin tok.

²⁰Afta na Beilam bin luk langa im drim detlot Amalekait pipul en imbin tok dijan speshalwan wed, “Amalek bin brabli strongbala langa detlot najalot pipul, bat im garra binij olagijawan na.”

²¹Wal langa im drim igin imbin luk detlot Kenait pipul, en imbin tok dijan speshalwan wed, “Det pleis weya yumob jidan im jis laiga strongbala nes weya yumob jidan seifwan ontop langa bigwan rok.

²²Bat yumob Kenait pipul garra gitkil wen detlot Asiriya solja garra deigimwei yumob prisana.”

²³En Beilam bin kipgon toktok dijan speshalwan wed, “Hu dislot pipul hu majurrumapbat miselp langa nowathwei?

²⁴Detlot enami garra kaman brom solwodasaid brom Saipras. Olabat garra bidim Asiriya en Iba, bat bambai detmob brom Saipras garra binijap olagijawan.” Lagijat na Beilam bin tok.