Namba 24:16-25

¹⁶Ŋac, taŋ gêŋô Anôtônê biŋ to kêjala Lôlôc Ŋatau nê kauc ma gêlic gêŋ, taŋ Ŋaniniŋ Ŋatau geoc lasê naŋ, e gêu tau jagêc tomata gêmôbgeŋ atom naŋ, nê biŋ tonec.

¹⁷Aê galic ŋac tau, mago gêmoa galoc atom. Matoc gê eŋ, mago gêmoa ŋagala atom. Utitalata teŋ oc mêŋêpi aŋga Jakobnê, ma tôc gôliŋŋa teŋ mêŋêsa aŋga Israelnê. Ma tôc tau êtuc lau Moab teŋbeleŋ to êku Set latui samob tulu.

¹⁸Gamêŋ Edom oc êtu ênê gêŋ, ma eŋ êjaŋgo nê ŋacjo Seir nêŋ gamêŋ su, ma Israelnê ŋaclai êsa.

¹⁹Jakob ênam gôliŋ nê ŋacjo ma enseŋ lau, taŋ sêsêp siŋ sawa naŋ su.”

²⁰Gêdêŋ taŋ Bileam gêlic lau Amalek naŋ, gêôc awa sa ma kêsôm nê biŋ tonec gebe “Amalek kêtu lau tomôkê-tomôkê samob nêŋ ŋamata, mago êtu ŋamu eŋ oc ênaŋa.”

²¹Gêdêŋ taŋ eŋ gêlic lau Kain naŋ, eŋ gêôc awa sa ma kêsôm nê biŋ tonec gebe “O Kain, nêm gamêŋ, taŋ gôŋgôŋ naŋ, ŋajaŋa. Aôm gôjac nêm sac gêsac poc kapôêŋ ŋaô.

²²Mago ŋacjo oc senseŋ Kain su. Têm kêdabiŋ, go lau Asur sêwê aôm naôŋgôŋ kapoacwalô.”

²³Bileam gêôc awa sa kêtiam ma kêsôm nê biŋ tonec gebe “Ojae, Anôtô embe êŋgôm biŋ tonec ŋanô êsa, asa oc êmoa mata jali.

²⁴Waŋ oc êmêŋ aŋga Kitim, ma êsêac oc sêkôniŋ Asur to Eber tôŋ. Ma êsêac oc sênaŋa amboac tonaŋgeŋ.”

²⁵Go Bileam gêdi ma gêc gêmu gêja nê gamêŋ. Ma Balak gêc kêsa nê intênaŋa gêja amboac tonaŋgeŋ.