Kɔnti tife 24:16-25

¹⁶naxan Ala xui ramɛma, naxan Ala Xili Xungbe Kanyi xa laamatunyi toma, naxan fahaamui sɔtɔma Ala Xili Xungbe saabui ra.

¹⁷N fe toxi naxan fama rabade yare. N fe toxi naxan makuya yakɔsi ra. Tunbui nde fama tede kelife Yaxuba xa mixie ma. Mangɛ tɔnxuma nde fama kelide Isirayila ya ma. A Mowaba xun nakanama nɛ, a Seti xa die xa fe ɲɔnma nɛ.

¹⁸Edon xa fe goroma nɛ, Seyiri xa fe goroma nɛ, kɔnɔ Isirayila sɛnbɛ sɔtɔma nɛ.

¹⁹Mangɛ nde kelima Yaxuba xa mixie ya ma, naxan bekae sɔntɔma.»

²⁰Balami to Amalɛkikae to, a naxa yi masenyi ti: «Amalɛki si fisamante na nu a ra, kɔnɔ a raɲɔnyi, a bɔnɔma nɛ!»

²¹Balami to Kenikae to, a naxa yi masenyi ti: «Wo sabatide mabanbanxi, wo tɛɛ saxi fanye nan fari,

²²kɔnɔ Asuri fama nɛ wo xun nakanade, a wo findi geelimanie ra.»

²³Na tɛmui a naxa a xa masenyi xun dusu: «Nde nɔma kiside Ala xa ɲaxankatɛ ma?

²⁴Kunkuie fama nɛ kelife Kitimi, e nɔma nɛ Asuri nun Xeberi ra, kɔnɔ a raɲɔnyi, e fan xun nakanama nɛ.»

²⁵Na dangi xanbi, Balami naxa keli, a gbilen a xɔnyi. Balaki fan naxa keli naa.