1Ma lau sêli aweŋ sa kêtu gêŋ masiŋa jakêsô Apômtau taŋasuŋ. Apômtau gêŋô biŋ tau e têtac ŋandaŋ kêsa. Ma Apômtaunê ja gelom aŋga êsêac ŋalêlôm e geŋ gamêŋ, taŋ sê bec kêsêpŋa naŋ, ŋamagê su.
2Go lau têtaŋ gêdêŋ Mose ma Mose keteŋ Apômtau, tec ja gêmac.
3Êsêac sêsam gamêŋ tonaŋ gebe Tabera gebe Apômtaunê ja gelom aŋga êsêac ŋalêlôm.
4Lau jaba, taŋ sêwiŋ lau Israel naŋ, têtu meloc gwada ma lau Israel têtaŋ kêtiam amboac tonaŋgeŋ ma sêsôm gebe “Ojae, asa êkêŋ gwada êndêŋ aêac taniŋ.
5Aêac taêŋ gêjam i, taŋ taeŋ ŋaômageŋ aŋga gamêŋ Aiguptuŋa naŋ, ma katim to meleŋ ma laki to anian ma lomboc.
6Mago galoc nêŋ ôliŋwalô gêbacnê. Gêŋ ŋajam teŋ gêc atom. Mateŋ gê mana tageŋ.”
7Mana tau kêtôm mêcgauc ma ŋalaŋô kêtôm uc ŋatêkwi, taŋ ŋajaŋa kêsa naŋ.
8Lau sêsêlêŋ-sêsêlêŋ ma sejoŋ gêŋ tau sa jasêlêsa popoc me sepeŋ kêsêp toŋtoŋ. Go seno kêsêp ku ma sêpac polom tapa-tapa. Gêŋ tau ŋasaê kêtôm polom tapa-tapa, taŋ sêpac ŋa ŋalêsi naŋ.
9Gêdêŋ gêbêc maniŋ kêsêp nêŋ gamêŋ becŋa ma mana kêsêp gêwiŋ.
10Mose gêŋô launêŋ gôlôac têtaŋ gêdêŋ-gêdêŋgeŋ sêŋgôŋ nêŋ bec ŋasacgêdô, tec Apômtau têtac ŋandaŋ kêsa ŋanô ma Mose gêlic sec amboac tonaŋgeŋ.
11Go Mose kêsôm gêdêŋ Apômtau gebe “Aôm gôgôm nêm sakiŋwaga sec kêtu asageŋŋa. Ma aê gajac matamanô ŋajam atom kêtu asageŋŋa, tec kôkêŋ lau samob tonec nêŋ gêŋwapac kêkôniŋ aê.
12Aê kakêkam lau samob tonaŋ e kakôc êsêac me, tec aôm kôsôm gêdêŋ aê gebe ‘Ôsip êsêac sa êtôm jaomwagao kêsip ŋapalê dedec, taŋ gênôm su naŋ, ma ôkêŋ êsêac sêna gamêŋ, taŋ aê katôc lemoc, gebe jakêŋ êndêŋ tameŋi naŋ.’ Amboac tonaŋ me.
13Aê jakôc gwada aŋga ondoc, gebe jakêŋ êndêŋ lau tonec sêniŋ. Êsêac têtaŋ gêdêŋ aê ma sêsôm gebe ‘Ôkêŋ gwada êndêŋ aêac aniŋmaŋ.’
14Aê taucgeŋ jaôc lau samob tonaŋ nêŋ gêŋwapac jatôm atom, gebe ŋawapac sec.
15Mago aôm embe taêm ênam gebe ôŋgôm aê amboac tonaŋ, naŋgo ônac aê êndu, go jajala gebe gajac matamanô ŋajam ma jalic gêŋwapac, taŋ êtap aê sa naŋ, atom.”
16Ma Apômtau kêsôm gêdêŋ Mose gebe “Ôjaliŋ ŋoc lau 70 sa aŋga lau Israel nêŋ laumata, taŋ kôjala êsêac têtu launêŋ laumata to gejobwaga. Ôwê êsêac sêna lômbec ma ôndênaŋ êsêac sêkô tônê sêwiŋ aôm.
17Su, go aê jasêp jawac ma janam biŋgalôm jawiŋ aôm. Go jakôc ŋalau, taŋ kêpi aôm naŋ, ŋagêdo su ma jakêŋ elom êsêac ma êsêac sêôc launêŋ gêŋwapac sêwiŋ aôm, gebe aôm taômgeŋ ôc gêŋwapac tau êtiam atom.
18“Go ôsôm êndêŋ lau gebe ‘Anam dabuŋ taôm êtu eleŋŋa, go atap gwada sa, gebe amac ataŋ kêsô Apômtau taŋasuŋ gebe “Asa oc êkêŋ gwada êndêŋ aêac aniŋ. Aŋga Aiguptu tec amoa ŋajamgen.” Kêtu tonaŋŋa Apômtau êkêŋ gwada êndêŋ amac aniŋ.
19Eŋ êkêŋ gwada bêc tageŋ me luagêc me lemeŋ teŋ me 10 me 20 atom,
20amac aniŋ gwada ajôŋ samuc teŋ e ôlim ŋakam êsa ma nêm ŋalêlôm êli amac. Biŋ tonaŋ êtap amac sa gebe atiŋ Apômtau, tec gêmoa gêwiŋ amac nec, su ma ataŋ to asôm gêdêŋ eŋ gebe “Aêac awi Aiguptu siŋ kêtu asageŋŋa.” ’”
21Ma Mose kêsôm gebe “Aê gamoa gawiŋ siŋwaga 600,000 ma aôm kôsôm gebe ‘Aê oc jakêŋ gwada êndêŋ amac aniŋ êtôm ajôŋ samuc teŋ.’
22Êsêac sêmbuc domba to bulimakao e êtôm êsêac me. Me i gwêcŋa samob sêpi tageŋ, go êtôm êsêac me.”
23Mago Apômtau kêsôm gêdêŋ Mose gebe “Amboac ondoc, Apômtau lêma kêtu dambê me. Galoc aôm oc ôlic gebe ŋoc biŋ, taŋ gajac mata gêdêŋ aôm naŋ, oc ŋanô me masi.”
24Go Mose kêsa gêja ma kêsôm Apômtaunê biŋ gêdêŋ lau, ma kêjaliŋ lau 70 sa aŋga lau Israel nêŋ laumata ma kêdênaŋ êsêac sêkô sêgi lômbec auc.
25Su, go Apômtau kêsêp gêmêŋ totaogeŋ mêŋkêsôm biŋ gêdêŋ Mose ma kêkôc ŋalau, taŋ kêpi Mose naŋ, ŋagêdô su, ma kêkêŋ gelom laumata 70. Ŋalau gelom êsêac e sep tageŋ seoc biŋ lasê ŋapaŋ.
26Ma ŋac luagêc gacgeŋ sêmoa gamêŋ becŋa. Ŋac teŋ nê ŋaê Eldad, ma teŋ nê Medad. Ma ŋalau gelom êsêagêc gêwiŋ. Êsêagêcnêŋ ŋaê kêsêp laumatanêŋ ŋaêmôkê gêwiŋ, tageŋ êsêagêc sêsa lômbec sêja sêwiŋ atom. Mago êsêagêc seoc biŋ lasê sêmoa gamêŋ becŋa.
27Ma ŋapalê teŋ kêlêti gêdêŋ Mose gêja ma kêsôm gêdêŋ eŋ gebe “Eldad agêc Medad seoc biŋ lasê sêmoa gamêŋ becŋa.”
28Go Mosenê sakiŋwaga Nun latu Josua, taŋ Mose kêjaliŋ eŋ sa gêwiŋ laumata naŋ, kêsôm gebe “O ŋoc ŋatau Mose, ônac jao biŋ tau êndêŋ êsêagêc.”
29Mago Mose kêsôm gêdêŋ eŋ gebe “Aôm gobe ômêtôc êsêagêc ôjô aê su me. Aê gabe Apômtau êkêŋ nê Ŋalau êpi nê lau samob e samob seoc biŋ lasê.”
30Su, go Mose to lau Israel nêŋ laumata sêmu sêja gamêŋ kêtiam.
31Go Apômtau kêkêŋ mu kêsêlêŋ ma kejoŋ kêmbico aŋga gwêc gêmêŋ. Mu tau kêpalip kêmbico kêsêp gamêŋ becŋa e gêjam gamêŋ, taŋ kêgi gamêŋ becŋa naŋ, auc samucgeŋ. Lau embe sêsêlêŋ oc samuc teŋ sêmu sêsa me oc samuc teŋ sêmu sêsô, oc têtap kêmbico sa ŋapaŋ. Kêmbico sêŋgôŋ tauŋ ŋaô-ŋaô e ŋadani kêtôm kêdabiŋ meta samuc teŋ luagêc.
32Tec lau dêdi gêdêŋ bêc tonaŋ ma sejoŋ kêmbico oc samuc ma gêbêc samuc ma ŋageleŋ oc samucgeŋ kêtiam. Lau, taŋ sejoŋ sêjac ŋawae atom naŋ, têtap gadob 10 sa. Êsêac têta gêŋ tau e gêjam naŋ gamêŋ becŋa auc gebe ŋakeleŋ êsa.
33Êsêac sêsac gwada tau e têdaŋgôŋ su atom, ma Apômtau têtac ŋandaŋ kêsa gêdêŋ lau tau, tec gêjac êsêac ŋa gêmac kapôêŋ teŋ.
34Kêtu tonaŋŋa sêsam gamêŋ tonaŋ gebe Kibrot-Hatawa, gebe sêsuŋ lau mateŋ katu gwadaŋa aŋga tonaŋ.
35Êsêac dêdi aŋga Kibrot-Hatawa ma sêlêlêŋ sêja Hasarot. Ma êsêac sêmoa Hasarot tau.
