Números 28

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

¹Bab-Jehová, Moisésʼga sunmakded, ega sogded:

²“Israel-dulemarga igar be uko, ega be sogo: ‘Ibagan-maid-sekalaa anga-ibmar-ukleged anga ukoye. We-ibmar-ogumakar-uklegoed-yeer-yapandaedi anga an-masga gued.’ ”

³Bab-Jehová, Moisésʼga sogdebalid: “Israel-dulemarga be sogbalo: ‘Weyob soogi anga ibmar ogumakar be ukmaloye: Bane-bane degisadegu sibad-wawaad-sapingwagwad-warbo birgagwen-nikamalad bonisulidi be anga ukoye.

⁴Wakdar, we-sibad-wawaad-wargwen be oburgoed. Sedodi, baid be oburgwebaloed.

⁵Madubur-bur-nued nibiratar, olivo-gwalluba-mesa-omukuar be anga ukoed. We-olivo-gwallu bute-wargwen be ebugoed.

⁶Degisadegu, Bab-Jehová Sinaí-yargi na igar-uksadba ega ibmar-ogumakar uklemai guoed. We-ibmarde yeer-yapanne Bab-Jehová itodaed.

⁷Sibad-wawaad-irba bute-wargwen vino be ukoed. We-vinoʼde ibmar-ogumakar-ukleged-ailagi be eogoed.

⁸Sedogusale, sibad-wawaad-baid ogumakar be anga ukbaloed. Ibmar-gwagba-mesa be anga ukoed. Degine, igi wakdar vino-bute-wargwen aila-birgi-eogega be uksabali, deyob, be sedo ukbaloed. We-ibmarde, Bab-Jehováʼga-ibmar-ogumakar-uklegedid, yeer-yapanne Bab-Jehová itodaed.’ ”

⁹Bab-Jehová Moisésʼga sogdebalid: “Israel-dulemarga be soge: ‘Obunnoged-ibagindi, sibad-wawaad-sapingwagwad-warbo, birgagwen-nikamalad, bonisulidi, be anga ogumakar ukoye. Degine, vino egi-eolegega be ukbaloye. Madubur-nued nibirambe (10) olivo-gwalluba-mesa-omukuar anga be ukbaloye.

¹⁰We-ibmar-ogumakar-uklegedi, obunnoged-ibagi uklegedid. Ukinbali, bane-bane ibmar-ogumakar-ukleged be ukbaloed, degine, vino egi-eolegega-ebuleged be ukmarbaloed.’ ”

¹¹Bab-Jehová Moisésʼga sogdebalid: “Israel-dulemarga be sogo: ‘Gebe-nii-onodedgi, anga moli-bebe-nikad-sapingwagwad-walabo bonisulidi, sibad-wawaad-machered-wargwen bonisulidi, degi, sibad-wawaad-sapingwagwad-birgagwen-nikad bonisulidi, walagugle (7), ogumakar be anga ukoye.

¹²Degine, moli-bebe-nikad-iliba, madubur-nued nibirambe-gakatar (15) olivo-gwalluba-omukuar be anga ukoed. Sibad-wawaad-macheredgindi madubur-nued nibirambe (10) olivo-gwalluba-omukuar be anga ukoed.

¹³Degine, sibad-wawaad-birgagwen-nikad-ilibardi madubur-nued nibiratar, olivo-gwalluba-omukuar be anga ukoed. We-ibmar-ogumakar-uklegedi, yeer-yapanne Bab-Jehováʼga gued.

¹⁴E-vino-egi-eolegoed be ukbaloed: Moli-bebe-nikamalad-iliba, bute-warbo. Sibad-wawaad-machered-iliba, bute-wargwen-abala. Degi, sibad-wawaad-birgagwen-nikad-iliba, bute-wargwen. Weyobi birgagi nii-iliba ibmar-ogumakar be anga ukoed.

¹⁵” ’Nii-iliba-ibmar-ukleged-ukinbali, bane-bane-ibmar-ogumakar-ukleged be ukbaloed, degi, e-nis-egi-eoleged be ukbaloed. A-ukinbali, be-Bab-Dummad, bemarga isgued-osulogega sibad-wargwen Bab-Jehováʼga ogumakar be ukbaloed.’ ”

¹⁶Bab-Jehová Moisésʼga sogdebalid: “Israel-dulemarga be sogo: ‘Gebe-nii-onoded-ibambe-gakabakegi Bab-Jehováʼga Oburgwilegoenad-Iba nagudoye.

¹⁷A-bangine, iba-itoakwaa-onoleged be onodoye: Ibagugle (7) madu e-inasuli be gunnoed.

¹⁸Gebe-iba-onodoedgi bela an-nug-odummogega anse nonimaloed. Bipisaale, a-ibagi dule gwen arbaosulid.

¹⁹Bab-Jehováʼga ibmar ogumakar be ukoed. Wemar be ukoed: Moli-bebe-nikad-sapingwagwad, warbo. Sibad-wawaad-machered, wargwen. Degi, sibad-wawaad-birgagwen-nikad, walagugle (7). We-ibdurgan, bela bonisulid be ukoed.

²⁰Moli-bebe-nikad-irba, madubur-nued nibirambe-gakatar (15), olivo-gwalluba-omukuar be anga ukoed. Sibad-wawaad-machered-irba, madubur-nued nibirambe (10), olivo-gwalluba-omukuar be anga ukoed.

²¹Degine, sibad-wawaad-sapingwagwad-birgagwen-nikad-irbardi, madubur-nued nibiratar, olivo-gwalluba-omukuar be anga ukoed.

²²Degine, isgued-ulale, sibad-machered-wargwen ogumakar be ukbaloed, adi, bega isgued-nabogegar.

²³We-ibmarmala, bela be anga, wakdar-ibmar-ogumakar-ukleged-ukine ukoed.

²⁴” ’A-ukine, bane-bane ibagugle (7) weyobi masi, degi, ibmar soogi-ogumakar be anga ukoed. Wede, anga ibmar-yeer-yapannedga guedid. Gusgu ibmar-bane-bane-anga-uklegedi, degi, egi-eoleged-uklegedi uklebaloed.

²⁵Ibagugledgine (7), an-nug-odummogega anse bela bulakwaa nonimaloed. A-ibagine, bipisaale dule gwen arbaosulid.’ ”

²⁶Bab-Jehová, Moisésʼga sogdebalid: “Israel-dulemarga be sogo: ‘Gebe be ibmar-gwag-weedmalale, a-ibagine, ibmar-gwag-weleged-iba onodoed. A-ibagine, bipisaale dule gwen arbaosulid.

²⁷A-ibagi, ibmar-ogumakar yeer-yapanne-itogega be anga ukoed. Wemar be anga ukoed: Moli-bebe-nikad-sapingana, walabo. Sibad-wawaad-machered, wargwen. Degi, sibad-wawaad-sapingwagwad-birgagwen-nikamalad, walagugle (7)

²⁸Ibmar-ogumakar-uklegoed-irba, madubur-nued olivo-gwalluba-omukuar be anga ukoed. Moli-bebe-nikad-sapingwagwad-irba, madubur-nued nibirambe-gakatar (15), be anga ukoed. Degi, sibad-wawaad-machered-irba, madubur-nued nibirambe (10), be anga ukoed.

²⁹Degine, sibad-wawaad-sapingwagwad-birgagwen-nikamalad-irba, madubur-nued nibiratar, be anga ukoed.

³⁰Degine, be-isgued-ular bega isgued-nabogega sibad-machered-wargwen ogumakar be ukbaloed.

³¹” ’Bane-bane weyob be anga ukoed, vino-egi-eolemaloedse-bakar, be anga ukoed. Gusgu ibmar-bane-bane-anga-uklegedi, degi, egi-eoleged-uklegedi uklebaloed. Ibdurgan-be-anga-ukoedi, bonisulid be anga ukoed.’ ”