Text copied!
CopyCompare
Buk Baibel long tokples Motu - KOHELETE

KOHELETE 5

Help us?
Click on verse(s) to share them!
1Dirava ena dubu ai ba raka vareai negadia ai na aemu ba nari; ikamonaina totona ba raka kahira be namo, kavakava taudia edia boubou ḡaudia ihahelaḡadia na e hereaiamu, badina be idia na asi dibadia e kara dikamu.
2Udumu basine hereva haraga-haraga, bona lalomu na hereva ta igwauraina ai basine haraḡa Dirava vairanai; badina be Dirava na guba ai a oi na tanobada ai, una dainai emu hereva na bae gadoi.
3Badina be nihi na hekwarahi momo amo e varamu, bona hereva momo na kavakava tauna gadona amo.
4Dirava ba gwau hamata henia negana ai, anina ikarana ai basio halahe; badina be ia ese kavakava taudia se moalelaidiamu. Emu gwauhamata anina ba karaia.
5Basioma gwau hamata be namo, a ba gwau hamata bena anina basio karaia na dika.
6Udumu ba naria, kara dika ai basine hakaumu vareai; bona gwaukau tauna vairanai basioto “Na kerere”. Namona be dahaka Dirava ese eremu baine badulaia, bona imamu ḡaukaradia baine habuadia tari?
7Badina be nihi bae momo negadia ai, hereva asi anidia bae vara momo; a oi ese Dirava garina ba gari.
8Basileia ta ai ogoḡami taudia e hahisidiamu bona hahemaoro ḡoevaḡoeva bona ahu korikori e dadihaidiamu boma itaia negana ai basioma hoalaia; badina be herea tauna na herea-dae tauna henunai, bona idia raruosi daediai na herea mikamika taudia haida.
9A e birulaiamu tanona na pavapava ese baine biagua, una na namo.
10Moni e ura heniamu tauna ese moni baine abi, to lalona basine heḡereḡere; bona taḡa e ura heniamu tauna ese ena taḡa baine habadaia, to lalona basine heḡereḡere. Ina danu asi anina.
11Kohu bae momo, to iha oredia taudia danu bae hoho; bena kohu biaguna ese anidia basine abi, a matana amo baine itadia mo, ani?
12Ḡaukara tauna na bogana baine kunu eiava baine hitolo, to ena mahuta baine namo; a taḡa tauna na baine ani paru dainai basine mahuta diba.
13Dika badana ta guba henunai vada na itaia: taḡa tauna na ena taḡa igogosina ai e dika;
14hekwakwanai negana ai una taḡa e boio, bena ia na mai natuna, to imana e tuna.
15Sinana bogana amo ema heḡereḡerena ai ma bainela, ḡaḡaena ai, ema heḡereḡerena; ena hekwarahi danu asi anina, ḡau ta na imana ai basine laohaia.
16Ina danu dika badana ta: ema heḡereḡerena ai ma bainela; ia na lai iabina e hekwarahilaia,
17bona ena dina iboudiai na dibura bona lalo-hisihisi bona lalo-hekwarahi bona gorere bona tudaga lalodiai e ha-oredia, anina be dahaka?
18Vada na itaia, ina na namo bona heḡereḡere: taunimanima na btine aniani, bona baine inuinu, bona ena hekwarahi idoinai Dirava ese ena mauri dinadia oreoredia dina henunai vada e henia lalodiai baine moalelaia; badina be ia ahuna korikori bunai.

19Dirava ese taḡa bona kohu vada e henidia taudia iboudiai na siahu danu vada e henidia, bae moalelaidia, bona ahudia bae abi dae, bona edia hekwarahi ai bae moale; una na Dirava ena harihari ḡauna.
20Badina be idia ese edia mauri dinadia basie lalodia bada; badina be Dirava ese e hamoalediamu, bona una mo bae laloa bada.