Los Hechos 8

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Saulo tipa'a tecaxu jiƚpiya, ticua: “Ne', tima'anƚe Esteban”. Hualca lan xanuc' pe naihuejcopá locuxepa ȽanDios itaina'me licuerpo Esteban, emunatsa. Acueca' juaiconapa liƚpihuotsoqueya. Iƚne ƚitiné ihuetsoquim'mola' juaiconapa lapimaye nomana' Jerusalén, iƚne lefot'ƚepola' ȽanDios. Jahuay ica'ne'moƚtsi, iye'me ni petsi al distrito Judea jouc'a ƚamats' Samaria. Ma le'a lan apóstole imanenca Jerusalén.

³Saulo tixtuc'ola' juaiconapa lapimaye. Ti'noƚila', tequifila' lan xanuc' jouc'a lacaƚ'no', ti'nicola' lacarza.

⁴Ni petsi litsepa iƚne lapimaye nica'nepoƚtsi uya'a'me Lataiqui' loya'apa iƚe al c'a lixpic'epa ȽanDios.

⁵Felipe ipanni jiƚpe Jerusalén, i'hua'ma anuli liƚya' ƚamats' Samaria. Jiƚpe uya'a'ma: “Jesús copa'a cal Cristo, ȽanDios ƚi'Huijf'epa”.

⁶Lan xanuc' efot'ƚepoƚtsi iquimf'e'me locuapa Felipe. Ixim'me Felipe mi'ay al cueca' to lo'epa ȽanDios. Jahuay iƚniya ipo'no'me cuenna juaiconapa litaiqui' Felipe.

⁷Jiƚpe liƚya' ixaƚcona'mola' axpela' lafcualƚay, iƚne litsufai'ila' contahue. Mipalcu lontahue tija'ayi ujfxi. Axpela' luhuaƚqueya lan xanuc' jouc'a lan coxo ixaƚcona'mola'.

⁸Toƚta'a juaiconapa ixoj'ma quileta lan xanuc' nomana' jiƚpiya.

⁹Maƚpe liƚya' tipa'a anuli cal brujo cuftine Simón. I'epa al cueca'. Tifel'mila' jahuay lan xanuc' nomana' ƚamats' Samaria. Timila': ―Iya' a'i ni naitsi xans. Iya' ninCueca'.

¹⁰Jahuay iquimf'e'me, lan xanuc' ts'iƚ'hueca jouc'a lan xanuc' pe aiquiƚ'hueca. Ticuayi: ―Ma ȽanDios, iƚque cal Cuecaj Candios, ƚinca ummepa iƚca'a cal xans. Toƚta'a ti'ay al cueca'.

¹¹Joupa ixhuaita axpe' mut'ƚa cal brujo ti'hua ti'ay lipixcay xans. Lan xanuc' ixinc'nepá, joupa ifel'mipola', tihuejyi.

¹²Iƚne nepenufpá litaiqui' Felipe epo'im'mola', lan xanuc' jouc'a lacaƚ'no'. Felipe uya'a'ma Lataiqui' loya'apa iƚe al c'a lixpic'epa ȽanDios. Tu'ila' te co'iya mitsuflaiyacu pe locuxeyopa ȽanDios. Tu'ila' naitsi Jesús, iƚque cal Cristo.

¹³Simón jouc'a epenufpa litaiqui' Felipe, epo'im'me. Lijoupa lepo'impa iyejmale'me Felipe. Iximpa al cueca' lo'epa Felipe, to lo'epa ȽanDios. Liximpa toƚta'a, tocomma tipailo lipicuejma'.

¹⁴Lan apóstole nomana' Jerusalén icuej'me: “Lan xanuc' nomana' ƚamats' Samaria epenufpá litaiqui' ȽanDios”. Ummem'mola' liƚf'as apóstole Pedro y Juan tiyeƚe jiƚpiya.

¹⁵Iye'me, icuaitsa pe lomana' lapimaye nepenufpá litaiqui' ȽanDios. Jiƚpe ijoc'i'me ȽanDios, ixahue'e'me tepi'itsola' cal Espíritu Santo.

¹⁶Iƚne lun Samaria joupa inespá: “Jesús aƚPoujna”. Joupa epo'impola'. Aiquilepenufi cal Espíritu Santo. Iƚque aiquimuya pe lomana'.

¹⁷Lan apóstole lijoupa lijoc'ipa ȽanDios ipo'nof'i'me liƚmane ƚiƚjuac iƚniya lun Samaria. Iƚne epenuf'me cal Espíritu Santo.

¹⁸Simón iximpola' li'epa lan apóstole, iximpola' lipo'nof'ipa liƚmane ƚiƚjuac iƚniya lapimaye, iximpola' epenufpá cal Espíritu Santo. Liximpa toƚta'a li'ipa, icufi'mola' quiƚtomí lan apóstole,

¹⁹timila': ―Capi'i'molhuo' coƚtomí. Aipic'a ca'eƚa' ma to lonƚ'epa imanc'. Lapi'iƚa' caimane. Tijouƚa' ja'ni capo'nof'iƚa' laimane anuli cal xans, iƚque tepi'im'me cal Espíritu Santo.

²⁰Pedro timi: ―Ima' tecanitso' jouc'a lotomí. Tocua to'naco'ma iƚe locupa ȽanDios.

²¹Ima' aimi'iya motsufaiya laƚpenic'. Ailopa'a capi'iyaco' ȽanDios. Iƚque timetsaicohuo' a'ij ƚijca lopicuejma'. Aimetenƚma.

²²Ima' mixcay xans. Toxhuej'menanni. Tojoc'iƚa' ȽanDios. Toxa'hueƚa' ja'ni ti'i'ma tiƚonc'e'e'mo' lojunac', timenc'e'ecotso' lofcuapa jiƚpe lopicuejma'.

²³Iya' quimetsaicohuo' lo'ejma'. Ima' pangay to'ehuale laic'. Lixcay lopicuejma' joupa ifi'epo'. Aimi'iya mo'eya al c'a.

²⁴Simón italai'e'ma, timi: ―Imanc' toƚjoc'iƚe ƚaƚPoujna, toƚsahue'eƚe aimaƚ'i'ma to laƚmipa.

²⁵Jiƚpe liƚya' lan apóstole uya'a'me te ts'i'ic' liximpa, te ts'i'ic' licuejpa mipa'a Jesús fa'a li'a ƚamats'. Uya'a'me litaiqui' ƚaƚPoujna. Lijou'ma ipailinamma, tiyeyi lane Jerusalén. Miyeyi lane titsulfoƚaiyi axpela' ƚiƚpiƚeloƚya' lun samaritano, tuya'ayi Lataiqui', iƚe loya'apa al c'a lixpic'epa ȽanDios.

²⁶Pe lopa'a Felipe imaxcaitsi anuli ƚepaluc ƚaƚPoujna, timi: ―Totsahuenni. To'huaƚa' al sur, iƚe lane co'huayomma Jerusalén lotsepa Gaza. Lane pangay quimuc'o'. Ailopa'a quiƚya'.

²⁷Felipe itsahuenni, ipanni. I'hua'ma ma to limipa ƚapaluc quema'a. Maƚe lane ti'hua anuli cal xans ƚas Etiopía. Iƚque ts'ipenic', ticuxe jahuay ƚi'huexi ƚipoujna. Iƚque ƚipoujna ƚincuxepa aca'no' cuftine Candace, ticuxe ƚamats' Etiopía. Cal xans joupa itsehuo'ma al cueca' xoute' lopa'a Jerusalén, jiƚpe exc'onƚingaihuo'ma ȽanDios. Itsiya ipainamma cotsenapa, i'huanapa Etiopía.

²⁸Ticusc'o licarro, tixhue liniƚpa lije'e cal profeta Isaías.

²⁹Cal Espíritu Santo ipalaic'o'ma Felipe, timi: ―To'huaƚa' pe lo'huapa al carro. Aimanaj'moxi.

³⁰Felipe inu'ma, i'huajcotsi al carro. Icuej'ma cal xans tixhue liniƚpa cal profeta Isaías. Timi: ―Iƚe al je'e lofxhuepa, ¿te tocuec'e?

³¹Timi: ―¿Te co'iya cacuec'eya? Ailopa'a naƚmuc'iya. Ixa'hue'ma Felipe tif'ajla' al carro, ticutsoƚaiƚe huejnca.

³²Al Paxi Liniƚingiya loxhuepa ticua: Ma to milecom'me anuli ƚa'hua moƚ tima'anna, ma toƚta'a ilecom'me iƚque cal xans. Metec'em'me ƚipimi cal moƚ, iƚque aimija'e', iƚque cal xans jouc'a aiquija'e'. Ailopa'a quimipola' iƚne liteƚ'mi'me.

³³Etets'i'me, ailopa'a notoc'iya. ¿Ja'ni jifa'a li'a ƚamats' tipa'a anuli qui'hua? A'i, ailopa'a. Nulemma etec'oyenni lipitine.

³⁴Ts'ipenic' icuis'e'ma Felipe, timi: ―Alu'iƚa'. ¿Naitsi conescopa cal profeta? ¿Te tipalaicoyoxi quituca' o tipalaijma ocuena?

³⁵Felipe italai'e'ma, uhuaƚ'ma iƚe lataiqui'. Lijou'ma xonca u'i'ma Lataiqui' loya'apa iƚe al c'a lixpic'epa ȽanDios. Inesco'ma Jesús.

³⁶Mipalaiyi ti'hua tinu al carro. Icuaitsa pe lopa'a laja'. Ts'ipenic' timi Felipe: ―Toxinƚa'. Jifa'a tipa'a laja'. Aipic'a ima' lapo'iƚa'. ¿Te ti'i'ma?

³⁷Felipe timi: ―Ja'ni jahuay ƚomunxajma' to'huaiyinge Jesús, ti'i'ma. Ts'ipenic' italai'e'ma, timi: ―Iya' ƚinca ca'huaiyinge Jesucristo. Iƚque i'Hua ȽanDios.

³⁸Icuxe'ma ecaxu'ma al carro. Imulunca loquexi'. Itsuflai'me laja'. Felipe epo'i'ma ts'ipenic'.

³⁹Ipalnanca laja', if'ajlina'me ƚamats', cal Espíritu Santo ileco'ma Felipe. Ts'ipenic' aiquixingona'ma. Uyaina'ma tixoqui queta.

⁴⁰Felipe iximpoxi icuaita jiƚpe liƚya' cuftine Azoto. I'hua'ma lane lotsepa liƚya' Cesarea. Jahuay ƚiƚeloƚya' pe loyaicopa tuya'e' Lataiqui' loya'apa iƚe al c'a lixpic'epa ȽanDios. Icuaitsi Cesarea.