Hacutjin Casahmi Apóstol 8

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Hane Saulo ne, hacuaha cachuya rë me xi cuatjin catsiquehen cha xi cuacun jan Esteban. Ha nixtin hya ni ne, cavetsihin catsujyihiya tjengui xuta xi matitjun jan yëjë xuta ladu rë Jesús cojo cjuahngatacun ngajan Jerusalén. Hya xi camá ne, yëjë xuta ladu rë Jesús jan ne, cafë cavitsojo me táha ladu tsëhë distritu Judea cojo distritu Samaria. Suvá sa apóstol xi tsajin cavitsojo xu me.

²Hane ngujo cha xi faharcun jain rë Nina ne, cavinchaniji cha nima Esteban, hacuaha jemu cajihnda xu cha tsëhë nima.

³Peru Saulo ne, cavetsihin catsujyihiya tjengui me xuta ladu rë Jesús cojo cjuahngatacun. Quiji cavisehen xu me ndava xuta xi cuacun jan, cajuvëjne me cavaxë me sa chjuun sa xihin, quijicani me ndavaya. Vëhë xi cuatjin cavitsojo xuta jan.

⁴Quihndë ne, xuta xi cavitsojo tsëhë Jerusalén jan ne, catsujyihiya casua xu me camachaya rë xuta cjuandajyihi xi chja tsëhë Jesucristu.

⁵Hane Felipe ne, quiji xu me ngu nandya táha distritu Samaria, hane ngajan casua me camachaya rë xuta ta ha cafehe me xi catsingatju Nina xi cuaxëtje naja.

⁶Hane xi cavisiñuju xuta cjua xi cachja Felipe cojo xi cavutsejen me cjuarcun xi casahmi me ne, jemu ndaja cavetaharcu me cjua xi cachja Felipe jan.

⁷Jemu cjín xuta xi hincha xitsehen xahasen rë me ne, camandaja xu me. Hisca cajindaya xitsehen jan hora xi cavetjuxin. Hacuaha jemu cjín xuta xi cahme yojo rë me cojo cjín sa xuta xi rengun me ne, camandaja xu me.

⁸Vëhë xi xuta nandya vëhë ne, jercu ndaja camá xu rë me.

⁹Peru ngu cha xi hmí rë Simón ne, ha quitahá cha ngajan, tisahmi xu cha cjuasurqui. Hane yëjë xuta distritu Samaria ne, jemu quijircun rë me xi casahmi cha. Hacuaha cachja xu suvá cha xi jemu jyë hnga cha cojo cjuatacun rë cha.

¹⁰Yëjë xuta Samaria jan, sa quihndi sa changá me ne, jemu ndaja cavetaharcu xu me tsëhë cha Simón jan. Hisca cachja xu me tsëhë cha cuitjin: ―‍Cha vihi ne, hacui cha xi tjin rë ngahñu rë Nina, ngahñu xi hmí rë ngahñu jyë. ―‍Cuatjin cachja xuta jan.

¹¹Vëhë xi jemu ndaja cavetaharcu xu xuta tsëhë cha ta, tsëhë xi ha jemu jyë nixtin xi casahmi cha xi quijircun rë xuta tsëhë cjuasurqui xi casahmi cha.

¹²Peru hya xi camacjain rë xuta tsëhë Felipe, hya xi casua me camachaya rë xuta tsëhë cjuandajyihi xi chja xi cuinduva Nina sahmi me gubiernu hacuaha cojo cjuandajyihi xi chja tsëhë Jesucristu ne, caxtenda xu me, sa chjuun sa xihin me.

¹³Hacuaha hisca cha Simón jan ne, camacjain xu rë cha tsëhë Felipe. Hane xi cavatju caxtenda cha ne, sehe catsihñu cha yojo rë cha cojo Felipe. Hane xi cavutsejen cha yëjë cjuarcun yehe xi jima ne, jemu quijircun rë cha.

¹⁴Hya xi camachaya rë apóstol xi siu ngajan Jerusalén xi xuta Samaria ne, camacjain xu rë me cjua rë Nina ne, catsingatju me Pedru cojo Juan quijitjengui rë xuta jan.

¹⁵Hya xi cafehe jo apóstol jan ngajan ne, casahmi xu me oración tsëhë xuta jan cojo sa xi sacú rë me Hasen rë Nina.

¹⁶Cuatjin casahmi me ta, tsëhë xi hisca xi ngu xuta jan ne, cjëë cuinduva xu Hasen rë Nina cuisehen xahasen rë me. Suvá ni ñihi rë Nai naja Jesús caseyanangui hora xi caxtenda me.

¹⁷Ngajan xi Pedru cojo Juan ne, cavisanetsja me xuta Samaria jan, sehe cavisehen xu Hasen rë Nina cahntsua xahasen rë me.

¹⁸Xi cavëë cha Simón xi casacu rë xuta jan Hasen rë Nina ngatsë rë xi cavisanetsja apóstol jan me ne, meje sua xu cha me tujún,

¹⁹hacuaha cuitjin cachja xu cha cojo rë me: ―‍Tuhun ná cjuatacun vëhë, cojo sa xi tu yo ni xi cuisanentsa ne, sacú rë Hasen rë Nina. ―‍Cuatjin cachja cha.

²⁰Ngajan xi Pedru ne, cuitjin cafayangui xu me: ―‍¡Tujún riji ne, catjë tangun cojo ri! ta, tsëhë xi caningatehetacuin xi cjuandaja rë Nina ne, cuma chaha rë cojo tujún.

²¹Ngaye ne, satiin camahani ri xa vëhë ta, tsëhë xi hacuiin tyjahi xahasen riji xcun Nina.

²²Nindeye cjuatacun riji. Tejñixin cjuatsehen riji vë. Hacuaha chjahye rë Nina cjuandaja rë me, há tsinchataain me ngaye tsëhë cjuatacun xi jiya ngajñi rë cjuatacun riji.

²³Ngahan ne, vacun ná xi ngaye ne, cuma ngaye ngu xuta xi ngundiyaxa ni tsihñu me yojo rë me cojo cjuatsehen. ―‍Cuatjin cafayangui Pedru.

²⁴Ngajan xi cha Simón ne, cuitjin cafehya xu cha: ―‍Nihñu favor ne, chjahyun rë Nina ngatsë naha cojo sa xi hisca xi ngu cjua xi canújun vë ne, cuatjuun cuma. ―‍Cuatjin cafehya cha.

²⁵Hya xi camá ne, Pedru cojo Juan ne, xi cavatju cachja xu me cojo xuta Samaria jan cjua xi chja tsëhë Nai naja ne, cavuya quiji nga me ngajan Jerusalén. Peru yëjë ni nandya xi vatju me hacutjin cjui me jingunduju ni ndiya ngajan distritu Samaria ne, ha cuatjin cachja sa me cjuandajyihi jan cojo xuta.

²⁶Camá nga ngu nixtin xi ngu ángel tsëhë Nina ne, cachja cojo Felipe ngajan Jerusalén cuitjin: ―‍Tihinjni ndiya Gaza. ―‍Cuatjin cachja ángel. Ndiya vëhë ne, vatju ngajan ngu xín camahani tsëhë nandya.

²⁷Ngajan xi cavetju xu Felipe, quiji me. Hane ndiya cjui me ne, cavechútaha xu me ngu xutaxa rë nación Etiópia, ngu xihin xindë xi fahacuenda yëjë cjuanchina rë na xi matitjun tsëhë yëjë xuta Etiópia jan. Xihin jan ne, quiji me ngajan Jerusalén xi cjuaharcun me Nina.

²⁸Hane xi cavuya tife me nangui rë me ne, jiya me carreta rë me cjue me, táha tivutaya me xujun rë Nina xi catsihindu profeta Isaías.

²⁹Ngajan xi cachja xu Hasen rë Nina cojo Felipe cuitjin: ―‍Tihinvehe hiscan cjui carreta xi cuajyihi vë, nihñitanguin cojo. ―‍Cuatjin cachja Hasen rë Nina.

³⁰Ngajan xi cuatjin casahmi Felipe. Xi tu camatiña me hiscan cjui carreta jan ne, cahndë xu me xi cjua rë xujun xi catsihindu profeta Isaías ne, vëhë tivutaya me xi jiya carreta jan. Sehe cavinenguise Felipe me cuitjin: ―‍¿Há vijnercun cjua xi tichutayun vë? ―‍Cuatjin cavinenguise Felipe.

³¹Ngajan xi cuitjin cafayangui xu me: ―‍Ngahan ne, vijniircú ta, tsëhë xi tsajin yo cuicuya ná. ―‍Cuatjin cafayangui me. Sehe ngajan xi cachja xu me cojo Felipe xi cuisehen cuejñatangun xu me cojo rë me.

³²Tivutaya me xujun rë Nina hiscan xi chja cuitjin: Sacuaha ficojo xuta ngu chu tsánga xi tsiquehen me chu ne, cuatjin cjuecojo xuta me; hacuaha sacuaha jindayaain ngu hnditsánga hora xi secun chu xcun me xi cuejnu rë chu ne, cuatjin tsajin camahani mé xi cuichja me hora xi secun me xcun me xi cjuahataha rë me.

³³Sahmichuva xuta me, hacuaha tsichoho xuta cjuandaja xi cuma rë me; Tsajin cuichja xuta tsëhë quihndi rë me ta, casacuiin rë me tsëhë xi cjuahñu xi casacu rë me nguehe ngasunhndë ne, quijicanii rë me. Vëhë cjua rë Nina xi tivutaya xihin jan.

³⁴Hya xi camá ne, sehe cafinenguise me cojo Felipe cuitjin: ―‍Xi má nuju ne, ¿yo tsëhë xi cuatjin chja profeta vë? ¿Há tsëhë suvá me ne?, o há tsajin ne, ¿há tsëhë jingu sa xuta? ―‍Cuatjin cafinenguise me.

³⁵Ngajan xi Felipe ne, cavetsihin me cojo cjua rë Nina xi tivutaya xihin jan, hane casua xu me camachaya rë xihin jan yëjë ni cjuandajyihi xi chja tsëhë Jesús.

³⁶Xi cjui me ndiya ne, cavechú xu me hiscan jiya ngu nandá. Ngajan xi chja xihin jan cojo Felipe cuitjin: ―‍Chutsujun ni. Nguehe jiya ngu nandá. ¿Há cumaji xtenda ngahan? ―‍Cuatjin cachja xihin jan.

³⁷Ngajan xi cachja xu Felipe cojo rë me cuitjin: ―‍Sa xi nguñaja xahasen nuju xi macjain nuju ne, cuma. ―‍Cuatjin cachja Felipe. Hane xihin xi cuajyihi jan ne, cuitjin cafayangui me: ―‍Macjain ná xi Jesucristu ne, hacui jain me xi Quihndi rë Nina me. ―‍Cuatjin cafayangui me.

³⁸Hya xi camá ne, cachja xu xihin jan cojo cha xi ficojo carreta xi secunhñu cha cojo, hane sehe cavitujne me cojo Felipe, sehe quiji catsijo me xcun nandá, hane caxtenda xu xihin jan.

³⁹Xi cavetju me tsëhë nandá ne, Hasen rë Nina ne, ngutjen quijicojo xu rë Felipe. Hane xihin jan ne, ha quihndë cavuyaain cavëë rë Felipe ta, cavuya cafaha me ndiya rë me cafe me cojo cjuasua.

⁴⁰Hya xi camá ne, cavechú Felipe nandya Azoto. Hane xi cavetju me ngajan ne, jima ngu nandya xi cavatju me ne, ha cuatjin casua me camachaya rë xuta cjuandajyihi xi chja tsëhë Jesucristu hisca xi cafehe me nandya Cesarea.