Los Hechos 8

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Saulo guque̱' tuze nen benne' ca' belutie̱' Esteban. Lu zra ná'queze gulezú lawe̱' dxelau zi' xuzre̱' benne' ca' dxeléajle̱'e̱ chee̱ Jesús, benne' ca' zaj zre̱'e̱ xe̱zre Jerusalén. Xúgute̱' belexase dínnaje̱' ca naca xe̱zre ca' zaj nababa Judea, ne xe̱zre ca' zaj nababa Samaria. Benne' gubáz ca' belexegá'ane̱' xe̱zre Jerusalén na'.

²Bal-la benne' ca' zaj naque̱' chee̱ Dios bulucache̱' Esteban na', ne gulebézrele̱'e̱ chee̱'.

³Dxácate̱ na' Saulo dxenáu zi' xuzre̱' benne' ca' dxeléajle̱'e̱ chee̱ Jesús, na' guxú'e̱ tu tu xu'u chee̱ cheajxrube xue̱' benne' ca', ne cheajlu'e̱ le̱' lizre xia.

⁴Benne' ca' chee̱ Cristo, benne' buluzrúnnuje̱' Jerusalén, buluchálaje̱' dizra' chawe' chee̱ Jesús gátete̱ze na' zjaque̱'.

⁵Felipe, tue̱' benne' ca', guxíaje̱' tu xe̱zre naga nababa Samaria, na' guzú lawe̱' dxuchálajle̱ne̱' benne' ca' ca naca chee̱ Cristo.

⁶Benne' ca' zaj nazrague̱' belén xánnene̱' ca da dxuchalaj Felipe, ne belelé'equezne̱' ca naca xel-la' waca ca' da dxune̱'.

⁷Benne' zan, benne' zaj xu'e̱ be' xriwe̱' belexexaque̱', na' be' xriwe̱' ca' belexedxúaj na lu xichaj lázrdau benne' ca', dxelebezre xa'a na, na' benne' zan benne' zaj zua zri ni'a ne̱'e̱, ne benne' zrinnaj ca' belexexaque̱'.

⁸Ca'an guca, gulebéle̱'e̱ xúgute̱ benne' ca' lu xe̱zre na'.

⁹Zua na' tu benne' le̱' Simón, nédxute̱ guque̱' benne' wazrá', ne guzí xe̱'e̱ benne' Samaria ca', dxenné̱' naque̱' tu benne' szren.

¹⁰Xúgute̱' belén xánnene̱' chee̱', benne' cazraze ca', ne benne' blau ca', gulenné̱': ―Benne' nigá nape̱' xel-la' szren chee̱ Dios.

¹¹Gulape̱' le̱' ba lá'ana lawe' da lu xel-la' wazrá' chee̱' na' guzí xe̱'e̱ benne' ca' zane' iza.

¹²Gate guléajle̱'e̱ chee̱ dizra' chawe' da dxuchalaj Felipe ca dxenná bea Dios, ne ca naca chee̱ La Jesucristo, xúgute̱', benne' biu, ne nu'ula ca', beledxúe̱' nisa.

¹³Cá'anqueze Simón na' guxéajle̱'e̱ chee̱ Jesús, ne gudxúe̱' nisa, na' guzú lawe̱' zéajle̱ne̱' Felipe, na' dxexebánene̱' ca naca xel-la' waca da za xabáa da dxun Felipe.

¹⁴Gate benne' gubáz ca' chee̱ Jesús, benne' zaj zre̱'e̱ Jerusalén, belenne̱' gulezí' lu na' benne' Samaria ca' xrtizra' Dios, na' gulesel-le̱' Pedro ne Juan na'.

¹⁵Gate belezrine̱' na', na' belenabe̱' law Dios chee̱ benne' Samaria ca' dxeléajle̱'e̱ chee̱ Jesús chee̱ xelezí'e̱ Be' Lá'azxa.

¹⁶Quebe ne xida Be' Lá'azxa súale̱ne̱' netú benne' ca'. Tuze beledxúaze̱' nisa lu La Xránadxu Jesús.

¹⁷Nadxa Pedro ne Juan buluzé̱ ne̱'e̱ lawe' benne' ca', na' gulezí'e̱ Be' Lá'azxa.

¹⁸Gate ble'e Simón bla' Be' Lá'azxa gate gubáz ca' buluzé̱ ne̱'e̱ benne' ca', na' guca lazre̱' gunézruje̱' gubáz ca' dumí,

¹⁹gunné̱': ―Le gunna neda' xel-la' waca nigá chee̱ gate guzéa' na'a lawe' nútete̱ze benne', na' si'e̱ Be' Lá'azxa.

²⁰Nadxa guzre Pedro le̱': ―Wabía xi' dumí chiu' na' nen lue' lawe' da dxéquenu' wazéquenu' ga'u nen dumí ca da dxúnnaze Dios.

²¹Quebe naca chiu', ne quebe napu' lataj lu da nigá lawe' da quebe naca xrlátaje xichaj lázrda'u lau Dios.

²²Bsan ca naca da cale̱la chiu' nigá, ne guta' xue Dios chee̱ gunite lawe̱' chiu' ca da gúquenu' lu xichaj lázrda'u.

²³Dxeque be'eda' nazrate̱ xichaj lázrda'u da cale̱la, na' da cale̱la na' nuchéaj na lue'.

²⁴Na' beche̱be Simón: ―Le gata' xue Xránadxu chia' neda', chee̱ quebe gaca chia' ca da gunnáu'.

²⁵Ca gudé belexeche̱be̱' chee̱ Jesús, ne buluchálaje̱' dizra' chee̱ Dios, na' benne' gubáz ca' buluzenne̱' bénneache dizra' chawe' chee̱ Jesús lu xé̱zredu ca' zaj nababa Samaria, na' ca gudé na' belexezrine̱' Jerusalén.

²⁶Gudé na' guzre tu gubáz chee̱ xabáa chee̱ Xránadxu Felipe: ―Guxasa, guxíaj chalá'a naga dxedé gubizra beu' zaga ca', naga zrua neza chee̱ Jerusalén da zeaj xe̱zre Gaza, da dxedé na le̱'e̱ xixre' lawe' lataj.

²⁷Felipe guxase̱', na' guzé̱'e̱ zéaje̱', na' la neza na' bezrague̱' tu benne' Etiopía. Benne' nigá naque̱' wizre, ne naque̱' benne' szren xu'u lu ne'e̱ xel-la' gunní'a chee̱ Candace, nu'ula na' dxenná bé'ene̱' xe̱zr la xu Etiopía. Ba guxíaj benne' nigá Jerusalén chee̱ be̱ lá'ane̱' Dios.

²⁸Na'a zexíaje̱' Etiopía na', dxe'e̱ lu carreta chee̱' da dxelecá'a bzrina', ne dxulabe̱' xiche naga zaj naxúaj xrtizra' Isaías, benne' bchálaje̱' waláz chee̱ Dios.

²⁹Nadxa gunná Be' Lá'azxa, guzre̱' Felipe: ―Gubiga gagu cuita carreta na'.

³⁰Gate gubiga Felipe na' benne̱' dxulaba bénnea' xiche chee̱ Isaías, na' bche̱be̱' le̱': ―¿Dxéajni'inu' ca naca da dxulabu'?

³¹Benne' biu na' guzre̱' le̱': ―¿Ájazra gaca chéajni'ida' che quebe nu chilá' guzéajni'i neda'? Na' guzre̱' Felipe cuene̱' cué'le̱ne̱' le̱'.

³²Naga dxulabe̱' lu xiche chee̱ Dios dxenná na caní: Beleché̱'e̱ Le̱' naga gatie̱' ca tu zríla'dau', na' ca zrila' na' dxátaba' zrize lau benne' ca' dxuluchibe̱' zraba', ca' bé̱nqueze Le̱', quebe bi gunné̱'.

³³Bulucá'ana ditje̱' Le̱', ne quebe belú'e̱ lataj nu guchi'a chee̱', ne quebe nu gaca guchálaje̱' ca naca chee̱ zri'ine zre sue̱', lawe' da belutie̱' Le̱'.

³⁴Na' benne' Etiopía na' bche̱be̱' Felipe: ―Gunná, ¿nuzra chee̱ dxenná benne' nigá, cheé̱queze̱' na', che chee̱ xetú benne' xula?

³⁵Nadxa guzú lau Felipe bzéajni'ine̱' le̱' ca naca naga dxulabe̱', ne bchálajle̱ne̱' le̱' dizra' chawe' ca naca chee̱ Jesús.

³⁶Gate guledée̱' tu naga de̱ nisa, na' gunná benne' Etiopía na': ―Nigá de̱ nisa. ¿Quebe gaca chua' nisa, zra?

³⁷Felipe guzre̱' le̱': ―Che dxéajle̱'u dute̱ lázrda'u, waca. Benne' na' beche̱be̱': ―Dxéajle̱'a naca Jesucristo Zri'ine Dios.

³⁸Nadxa gunná bé'ene̱' guleza carreta na', na' dxúpate̱' gulu'e̱ lu nisa, na' Felipe bchue̱' le̱' nisa.

³⁹Gate belexedxúaje̱' lu nisa na', na' Be' chee̱ Xránadxu beche̱'e̱ Felipe naga xula. Benne' Etiopía na' québedxa blé'ene̱' le̱', na' bexu'e̱ neza chee̱' dute̱ xel-la' dxebé.

⁴⁰Felipe na' guque bé'ene̱' ba zue̱' xe̱zre Azoto, na' gudée̱' tu tu xe̱zre dxuchálaje̱' dizra' chawe' ca naca chee̱ Jesús cadxa bezrine̱' Cesarea.