1Na irie tara, magimaong Sol la menamua Stiven ga uvara. Tie, iruo kubama la namurit dalap a ga mirie. Pa non ekelesiap am Iesu la maiavia tongan Stiven ga mela memua na una ga mitara meliba aime. Urie, na uriet la, giginanim ula kanu la teiara ga betieng na taun Ierusalem ga maiop teip ga magaulap la naganmeng ira Iesu. Karorap am Iesu la makirarameng kan inamaniap mila naganmeng ira Iesu. Are ratmat ga ekelesiap am Iesu la igomeng ga mela tomat na mirie napup ganam na provins Iudaia ga na provins Samaria. Pa Apostolop la man maionama kan tie Ierusalem.
3Tie, Sol la mitara mamarani la man makiraraong inamaniap la naganmeng ira Iesu. Are ratmat ga ume ula uobu na mirie luguap ganam narit narit ga malagiong teip ga magaulap ga ula uabuam na luguan o arubu.
4Urie, miruo ekelesiap am Iesu la igomeng ara ga melar tapmat na mirier napup ganam ga man baismeng o bais ula muru, na pialap la maionama mana.
5Tie, Filip la ula na non taun la iot na provins Samaria ga baisong o ties mai teip ga magaulap ga maulo a Iesu irie Karisito la ina malagiong teip ga magaulap.
6Papot ma teip ga magaulap la mepto ties ang Filip ga magimameng non ara kagup onim na panbinim la makosarong. Are ratmat ga iruo gar ma teip ga magaulap la menavam kigip ma maset ga man mepto ties ang Filip.
7Urie, papot ma teip ga magaulap la ame muranap mila kiram la maiot mana. Are ratmat ga tiesong Filip maranit ga makalaong ga miruo muranap mila kiram la kukupmeng kan kirat ga mamaiolai teip ga magaulap ga igomeng. Ga papot ma teip ga magaulap la memanim kilalap ga kibap are la mevara ra, o kibap ma la kiram, la ina gat mamuriraong.
8Are tiruo ga na urio taun teip ga magaulap la tevurusmeng migat.
9Tie, una urio taun la iot na provins Samaria la unama non migana, bonim a Simon. Irie la buat makosarong non ara non ara tavukup o kakarabunim gare sanga, are ratmat ga teip ga magaulap ganam onim na provins Samaria la mime turupmiaba ga maialo bonim ula kanu aun. Ga irie kan la ume tevien gare ro, “Turuo migana ila kakani migat.”
10Pa inamaniap la ame bop ga teip ga magaulap la tale memaning bop, miruo teip ga magaulap ganam la mime ties gare ro, “Iriro migana, irie la amaning non kukunim ula kanu, meivo kukunim ang Morowa.” Teip ga magaulap la mime ties gare ro ga mime omeuluan ties ang.
11A tara ila laklage, ume akosarong Simon iruo tavuk o kakarabunim ga mime turupmaiaba aime, are ratmat ga mime omeuluan ties ang.
12Pa muo Filip ga baisong o bais ula muru a Morowa la namo ualeng maset mabuo teip ga magaulap ganam. Ga baisong a Iesu, irie Karisito. Filip la baisong o urio ties me maun teip ga magaulap na urie taun, ga naganmeng iro urio ties. Ga papot ma teip ga magaulap gat la naganmeng ira Iesu, ga uavariam Filip.
13Urie, Simon gat la naganong iro urio bais ang Filip. Are ratmat ga oula nuvietiap ga ume busit auluan Filip. Ga ume magima kagup onim na panbinim ga pagap o turupnuabap la ume makosar Filip ga ume turupuaba maset.
14Tie, Apostolop la maionama Ierusalem la mepto urio ties la omela ra Samariap ties ang Morowa, ga ait a iruo la ula betong na taun Ierusalem. Are tatmat ga asagameng Petro ga Ioanes, ga lila mai miruo Samariap.
15Lila ga betliong na provins Samaria, pa lipto uriro ties la namo karuk kan a migana ba la aula Muranama Ila Babai kabirana ma miruo teip mila naganmeng ira Iesu. Karuk. Pa omelat nuvietiap na bonim a Iesu Ila Kani. Are ratmat ga Petro ga Ioanes la okosarliong marik me ai Morowa meba alang Muranama ang maun.
17Tie, Apostolopien la liabuam kilalap lie bo bugabip ma miriro inamaniap ga amela Muranama Ila Babai.
18Urie, Simon la legimaong Apostolopien la akosarliong iruo tavuk o unuabuap ma kilalap bo bugabip ma, ga amela Muranama Ila Babai. Ga ula uaram kakepup ga namo alam liun.
19Ga muo li ga ugama, “Non ara kukunim la iot meun. Are ratmat ga eba talam mirio kakepup meun ga eba malang urie kukunim toun. Ga leba tama tabung kilan tuo bo bugam a migana ba, eva eba aala gat Muranama Ila Babai.”
20Pa Petro la upulo ties ang ga ugama, “Pagap la ume ualam Morowa agarit maun inamaniap, miruo la agatnung ga nuga mauneng ma kakepup, a? Eva miruo kakepup la eba mela saikmeng na iou o kit ga nunuo!
21Miriro dalap nuo, mirie la tale puvuvum na irap a Morowa. Are ratmat ga tale kan puonung meba nonang na ubi ang Morowa la okosarpang. Karuk kan migat!
22Magimarung papot ma dalap mila kiram la dakmeng ira nuo. Ga tavuk ila kakorikong la novisong maranit migat. Are ratmat ga oigornala agat nung ga anolaing iruo tavuk ila kire. Ga mariknang me ai Ila Kani meba oduratang kirinim ieng urio agat ula kiro la iot na dalap nuo.”
24Aulo Petro gare ro ga ugama Simon lime, “Toagamalie ga okosarmang marik me ai Ila Kani meba tale betang iruo paga ila kire ira ruo la tomalo a ga tokiraraang.”
25Tie, Apostolopien la baisliong mai teip ga magaulap o ties ang Ila Kani. Na tara la no ra urio ubi, ina terigiliong me Ierusalem. Ga na alang la man bais liong o bais ula muru na papot ma pialap na provins Samaria.
26Urie, tubiat non angelo ang Ila Kani la aulo Filip gare ro, “Tenara ga nala na nap o Saut ga nala betnang na urie alang la oiolai taun Ierusalem ga ila betieng todang na taun Gasa.” Urio alang, la iba me na nap o kimanam la karuk ma inamaniap.
27Tiesong ara angelo gare ro, tie teuara Filip ga ula betong na urie alang, ga agimaong iruo migana onim na kantri Itiopia. Irie migana ila kani na gavaman ga ume gat uale mabuo kakepup ganam ga non pagap iam Kandesi, urie orong ula magabun maiong kantri Itiopia. Urie, la orong ula magabun Kandesi. Iruo migana, irie migana la apakapmeiara ga ait tavuk maiang Iudaiap ga naganong ira Morowa. Are ratmat ga ula na taun Ierusalem me lotu ga namor ina terigiang me na kantri ang.
28Ga na tara la unama iruo migana onim Itiopia bo karis, man uario babam la omirong unuli Aisaia tinan ga man ovasong.
29Are ratmat ga aulo Muranama Ila Babai Filip gare ro, “Nala anoping irobu karis, ga namung kagarat ai.”
30Urie, ibirong Filip me kagarat ai karis. Ga upta iruo migana la man ovasong ties ang unuli Aisaia. Irio nap o ties ang unli Aisaia la man avasong la are ro, “Iruo migana, iriro la alagimeng teip meba menamung ga aving, garet la alagimeng sipsip na pianam meba menamung ga aving. Pa man pamuieng it nanam a gare sipsip la maiovam teip kavurup a. Maiabua na ties ga meinia kan migat ga okosarmeng ties o kakarabunim ira a ga oitmaiamu ninimiap ang, ga tale gat unama na kimanam. Are ratmat ga karuk kan a migana ba la eba oauluan.” Are ratmat ga upto Filip uriro ties ga amarikong iruo migana onim Itiopia ga ugama, “O migana ila kani, atabo anit muana o urie ties la man ovasnung, a?” Pa ugama irio migana, “Karuk. Pa la karuk a migana ba la puoong meba tosingala a muana o urio ties, are mani ga puorung meba orera.” Are ratmat ga amarikong Filip meba ala nakap bo karis ga onang ga irie.
34Tie, iruo migana onim na kantri Itiopia la amarikong Filip ga ugama, “Urio ties ang unuli, tiesieng aime aga ga okosarong urio ties? Atabo tiesieng kan aime, o atabo tiesieng aime non kan migana?”
35Are ratmat ga ovaikong Filip muana o urio ties, puaro iro urio ties ang Aisaia la tiesieng aime Iesu.
36Man tiesliong, urie muor betong karis kagarat u non kin. Pa ugama iruo migana ila kani, “Ogimanang! Kin urobu! Titot la tuga orala nuvietiap. Atabo onoun paga ba alang ga eba tale orala nuvietiap? Karuk.”
38Are ratmat ga migana ila kani la aulo migana o ubi ga adusong hos. Ga Filip ga iruo migana ila kani onim Itiopia la telinie bo karis ga lila lourup na kin. Ga uavaria Filip.
39Urie, oliolai kin ga lila nakap. Pa talet kagat ga Muranama ang Ila Kakani la alagiong Filip ga ula na non nap. Ga iruo migana ila kani la tale gat agimaong Filip. Pa teuba maset ga ouluan urie alang ga ula lakuan ang.
40Pa iriro Filip, alagiong Muranama Ila Babai ga ula betong na taun Asdot. Ga ula na mirie taunup ga man baisong o bais ula mumuru aime Iesu ga ila puoieng na taun Sisaria.
