1Stefano mau runirotaꞌaꞌe, Saulo ani mae ḡihiniro. Stefanoꞌa rudaroteꞌe madaḡano Ierusalema ekalesia azaḡa sausauze ruzeꞌeteꞌe haḡaiḡaniꞌa fureraro. Eꞌanoꞌo zeḡe niduꞌa zeḡe zeḡe edeḡano Iudea zu Samaria habaꞌa ferau onamiro, u apostolo azaḡaꞌe mene.
2Rehano Badiꞌa hubehune gubaneꞌeteꞌe azaḡa nuꞌe Stefano ahiri mae ḡuriro, ebu niaro zu zamaze are rudaro.
3Eꞌe zamaḡano Saulo ani neḡaneḡa diuḡadu, ohoze roḡae ahase buzadu ḡuꞌano ohozido, ebu ekalesia mae ḡuzuhe onamiro.
4Ekalesia azaḡa, Ierusalema neḡanonoꞌo ferarotaꞌaꞌe, habaꞌa habaꞌa onaminutene, Badiꞌa ḡoere haramido.
5Firifo ani Samaria habaꞌano ne ꞌahoga ovoadu, Keriso hari haramiro.
6Vaze ḡuḡuvaḡaniꞌa Firifo haramo igiro, zu Badiꞌa tahi gigiꞌa haḡaiḡa haḡaoga horonirotene, zeḡe niduꞌa Firifo haramo faifaine abito haro.
7Mazaḡa vine sauꞌa sauꞌaniꞌa, zeḡeꞌa ragano reinuteꞌe azaḡa ḡehaḡa mazaonoꞌo ḡihau bagaḡa huau ḡaniḡanauꞌenaꞌa buaudo. Ebu ahiꞌa mene haganinuteꞌe azaḡa zu oda sauꞌa azaḡa ḡehaḡaniꞌa manorido.
8Eꞌanoꞌo eꞌe neḡanoꞌe matuꞌu boroꞌa iriꞌaviro.
9Vaze ꞌahoga, niḡa Simona ani, Firifoꞌa ꞌizema onaogano eꞌe neḡano radiunu. Aniꞌe muri nu zamaḡano baidi zu naho gauḡa haḡaido, ebu Samaria azaḡa eꞌe horonirotene, zaguzagaudo. Ani aneꞌa bare “nihe boro” raenaꞌa, niḡa mae ḡihinido.
10Ebu Samaria azaḡa, zuhuꞌanonoꞌo onamo boro ḡonaga niduꞌa, ani ḡoere faifaine abito haunu, raenaꞌa, “Vaze ꞌadiꞌe Badiꞌa gigiꞌaniꞌa rana radu gigiꞌaḡa fureneꞌohe. Eꞌe badiꞌaḡaꞌe 'ḡihiꞌa' rae huneꞌeteꞌe.” reinu.
11Ani amahi baidi zu naho gauḡa haḡaadu, vaze zaguzaguzinuteꞌea, ani ḡoere ego haunu.
12Rehano Firifoꞌa Badiꞌaꞌa zuhiꞌaziꞌuma hariḡa manoḡa zu Iesu Keriso ni rae haramirotene, ze ani ḡoereꞌe hube rae ḡihiniro, ebu ohoze zu roḡae, bapatizo meiro.
13Ebu Simona ane zuni, eꞌe ḡoeꞌa mae ḡihinadu, bapatizo meiro, ebu Firifo hegote ragavinu. Zuni Firifoꞌa Badiꞌa tahi haḡaiḡa zu gigiꞌa haḡaiḡa boroboro haḡaoga horonidotene, zaguzagaudo.
14Samaria azaḡaniꞌa Badiꞌa ḡoere mae ḡihiniroteꞌe hariḡa, apostolo azaḡaniꞌa Ierusalema neḡano igirotene, Petero zu Ioaneꞌe Samaria azaḡa uꞌa tuḡuziro.
15Ebu ze eꞌea feurirotene, Samaria azaḡa veize kuraro, zeḡeꞌa Vine Zaḡoḡa mouga veize,
16mazaḡa Vine Zaḡoḡaniꞌe zeḡe zeḡe mazao ꞌize mene ovainu. Rehano zeꞌe Zuhiꞌa Boro Iesu niḡano bapatizo daꞌo meiro.
17Ebu Petero zu Ioaneꞌa ꞌevoreze zeḡe rana tirotene, zeꞌe Vine Zaḡoḡa meiro.
18Simona ani, apostolo azaḡaniꞌa ꞌevoreze vaze rana teadu, Vine Zaḡoḡa meiroteꞌe horonirotene, moni ziniꞌenaꞌa, ꞌahige reiro,
19raenaꞌa, “Eḡe zuni gigiꞌa eꞌe enoꞌi! Eḡe ꞌevorehe vaze rana titeꞌeba, zeḡe Vine Zaḡoḡa mouga.”
20Rehano Peteroꞌa naenaeninaꞌa, “Moniḡoꞌe ḡae teite rudau onamoꞌi! Ḡa Badiꞌa gigiꞌaꞌe moni hina hoitoga idaḡa rae zamareꞌe hehe?
21Badiꞌa gau ꞌadi zamaḡano niḡo oꞌoꞌa, mazaḡa ḡa zamaroneꞌe Badiꞌa ubumao mene duduḡa.
22Zamaḡo ḡihunadu haḡai sauꞌa aꞌe modoꞌi, ebu Zuhiꞌa Boro mazao umidoꞌi! Nougine Zuhiꞌa Boroꞌa ꞌuguḡa zamaroneḡa zamaḡoo meiroteꞌe, aḡutu modiꞌuma.
23Mazaḡa eḡeꞌa horoꞌeꞌetene, ḡa zamaꞌe ahiahi sauꞌaniꞌa irivaꞌeꞌohe, zu haḡai sauꞌaniꞌa zamaḡo obone tiꞌohe.”
24Ebu Simonaꞌa Petero zu Ioane umizeꞌenaꞌa, “Eḡe veize Zuhiꞌa Boro mazao kuranoꞌi, ḡaeꞌa rateꞌe ḡauḡaniꞌa eḡe mazao mene fureranoga veize!”
25Ebu Petero zu Ioaneꞌe, Zuhiꞌa Boroꞌa zeḡe ubumao haḡaidoteꞌe haḡaiḡa rae fureniro, zu Zuhiꞌa Boro ḡoere haramiro. Eꞌe enogano ze iḡunadu Samaria ne ḡehaḡano Badiꞌa hari manoḡa harame ragaveꞌenaꞌa, Ierusalema neḡa bare itiro.
26Zuhiꞌa Boro tuḡure vigaꞌa Firifo niro, raenaꞌa, “Iḡunadu Ierusalema neḡanonoꞌo Gaza neḡa ovoeꞌeteꞌe ibiḡa ḡuzu ovoroꞌi! Aꞌe haba bohaꞌa ibiḡa.”
27Eꞌanoꞌo ani iḡunadu eꞌe ibiḡano ovoirotene, Etiopia vazeḡa boro ꞌahoganiꞌa eꞌe ibiḡano ovoe radiuꞌenogano hidiro. Aniꞌe Etiopia kuiniḡa, Kanedake rae huneꞌeteꞌe veize gaueꞌeteꞌe vazeḡa zu oma arinuteꞌe vazeḡa. Ani kuini moni niduꞌa ḡianinu. Ani Badiꞌa mazao kuranoga rae Ierusalema neḡa itadu,
28bare ovoiroteꞌe zamaḡano. Aniꞌe hosiꞌa hutubeꞌeteꞌe kiuḡa zamaḡano ehoradu, peroveta vazeḡa, Isaia bukaḡa meꞌode radiunu.
29Eꞌe zamaḡano Vine Zaḡoḡaniꞌa Firifo niro, raenaꞌa, “Kiu ꞌomo uꞌa onamadu, eꞌe teite ḡiriu onamoꞌi!”
30Eꞌanoꞌo Firifoꞌa kiu uꞌa dure onamirotene, eꞌe vazeḡaniꞌa Isaia bukaḡa meꞌodeꞌenoga igiro. Eꞌanoꞌo Firifoꞌa ḡadinenaꞌa, “Ḡaꞌa meꞌodeꞌeteꞌe ḡoeꞌa hugaꞌe, edeḡa hehe?”
31Aneꞌa naenaeninaꞌa, “E hubehune mene idaḡa. Vaze ꞌahoganiꞌa ihohine ederiꞌuma.” ꞌOuge radu Firifo uminiro, ane teite kiu ranao ehoroga.
32Aneꞌa buka zaḡoḡa meꞌodirotaꞌaꞌe ꞌahiꞌeꞌe: “Aniꞌe matihi radu tutune onameꞌeteꞌe mamoeḡa teige, zu mamoe iguḡa variꞌeꞌeteꞌe vazeḡa ꞌevorao sifu radiuꞌeteꞌe mamoeḡa ubuga teige, mene ḡoeriro.
33Aniꞌe niḡa mae ovoeꞌenaꞌa, ḡuriro ḡoeꞌa hina kotaniro. Iniuꞌa ane mariga hariḡa rae fureniꞌuma? Rae furenogaꞌe mene idaḡa, mazaḡa ḡaboneḡa raha ꞌadaonoꞌo mae vaḡiniro ꞌahine.” (Isaia 53:7-8)
34Etiopia vazeḡaniꞌa Firifo ḡadinenaꞌa, “E ḡadimuꞌohe. Peroveta vazeḡaꞌe aneꞌa bare, ane hari raꞌe ga, vaze ꞌahoga hariḡa?”
35Eꞌanoꞌo Firifo ani, buka zaḡoḡa ḡoeꞌa, eꞌeanoꞌo ḡadaheniꞌenaꞌa, Iesu hari manoḡa ane veize rae fureniro.
36Ze ibio onameꞌegano, vu horoniro. Ebu Etiopia vazeḡaniꞌa raenaꞌa, “Ḡianoꞌi! Vu ꞌahiꞌeꞌe. E bapatizohine idaḡa hehe?”
37Aneꞌa naenaeninaꞌa, “Ḡaeꞌa zamaḡo niduꞌa hina Badiꞌa mazao fiine idaḡa.” Ebu Etiopia vazeḡaniꞌa raenaꞌa, “E, Iesu Kerisoꞌe Badiꞌa Ubuga rae, mae ḡihineꞌohe.”
38Ebu aneꞌa raenaꞌa, “Tena kiu tuoꞌi!” reiro. Ebu anianine kiuonoꞌo buanadu, vu zamaḡano ovoe edaro, ebu Firifoꞌa bapatizoniro.
39Zeḡeꞌa vuonoꞌo gaba tirirotene, Zuhiꞌa Boro Vine Zaḡoḡaniꞌa Firifo zogone mae vaḡiniro. Eꞌanoꞌo Etiopia vazeḡaꞌe Firifo mene bare horoniro, rehano ani matuꞌuḡeta bare onamiro.
40U Firifo ani Azoto neḡano feuriro, ebu ani eꞌe habaꞌano onameꞌenaꞌa, neḡaneḡa niduꞌao hari manoḡa haramido, onamo Kaisarea neḡano feuriro.
