Mbouŋ to Yes Israela 39:2-12

²Tovenen napoon avog, ve nasavia saveeŋ eta maau. Natatan taug, ve neneeŋag moghon. Eemoghon nagham ŋgar naol ila ila le lolog ipazaagh ghou naghaze nasaav.

³Pasa, nagham ŋgar naol kat, le tiou imoz ghou. Tauto irau neneeŋag muul maau, ve naghason Maaron naghaze:

⁴“Yoova, upaghazoŋan ghou. Ndaman tiou piiz to inepneep sone? Pale ŋeez o namaat ve nasob pa taan? Uul ghou leso naghilaal naghaze: Mala maau pale nepooŋ tiou to taan isob.

⁵Yom ughur leg sawa tuku moghon pa naneep izi taan. Sawa to nepooŋ tiou izi taan, nene inimale mbeb sorok ila matam. Onoon kat, tamtoghon tisob to taan nepooŋadi, nene inimale yaghuraad to ivot ila avood. Tineep ris ve tisob. Irau taghita di muul maau.

⁶Tamtoghon tilaghlaagh pa uraat naol. Eemoghon nepooŋadi, nene tuku inimale ai yavyaava to ighaze ndag izila, nene taghita muul maau. Matadi inim naol, ve tilala tinimnim pa uraat tighaze tindou ledi mbeb katindi. Eemoghon tirab taudi sorok. Pasa, tikankaan pa sei to pale iyou mbeb todi tonowen.

⁷Yoova, sa mbeb to pale naghur matag pani pa iuul ghou? Mbeb eta maau. You naghur matag payom moghon.

⁸You nazoor aliŋam ve nagham sosor. Upul sosor tiou isob, ve ugham mulin ghou pa pataŋani to sosor tiou. Pa vene, yes kankanooŋa to tiwatag ghom maau ne, tipiyaav saveeŋ velegiiŋ payou.

⁹Aazne, you neneeŋag moghon. Irau saveeŋ eta ivot ila avog maau. Pasa, yom taum to ugham pataŋani tonene ivot payou.

¹⁰Maaron, uŋgal matag iraua! Nimam ighanghan ghou le tapirig isob wa.

¹¹Ighaze tamtoghon tigham ŋgar samia, yom uyaan di, ve ulos di pa upasaluŋgan di. Ve mbeb todi popoia to lolodi pani kat, yom uwaghamun di inimale up iwaghamun uli. Nene inimale you nasavia ila wa. Yei tamtoghon to taan ninim mbeb sorok. Nineep rismoghon ve nisob, ninimale yaghuramai to ivotvot ila avomai.

¹²Yoova, upoon taliŋam pa taŋiiz tiou malep. Ughur taliŋam payou, ulooŋ suŋuuŋ tiou tonene, ve uul ghou. Pasa, sawa tiou to naneep izi taan, nene mala maau. Sawa tuku to naneep izi taan tonene, you naneep nanim loom payom, nanimale nditimbug tisob.