Miti Mânec 39:2-12

²No nâŋguŋ erâ dâŋemâc jupo; eme izi jauŋ mi bacnuwec, maŋʒâic‐nane ɋârâŋkewec.

³Maŋnaneo hâhâwic fusucmarâ fome manatâc qâtâc epe ʒocsâko ʒacnuwec. Ehame dâŋ ʒiŋuc mupo:

⁴“Wofuŋ, dameŋ tatara‐nanere manasupe, â dameŋ‐nane sâcticne hone jaŋgeŋkepe, juju‐nane ratâmirekac i mana tarape.

⁵Manakic, go jara dameŋ‐nane bembeŋne mac bâfuameŋ, â juju dameŋ‐nane i honetec arictac tinac eekac, ine hâcne ŋic sasawa juju‐nâŋec i nokafere sâc.

⁶Jâmbomac, ŋiczi nâkumuc tinac rac warec eekac, wemo wiac mo fârinere ojowa sâko fuaekac? Ŋiczi wiac hure hemârec eekac i mozi rauckeocmu?

⁷“Eme, Wofuŋ, ʒi wemo wiacte woŋec jukopac? Mamanac‐nane gorao fokac.

⁸Kiŋ bahac‐naneonec bataracnuc, eme mutucne jaŋe mu ruruc mi enarenʒepieŋ.

⁹No dâŋemâc jukopac, micnane mi aŋkekopac. Wemocte? Goki iŋuc fua‐nareocte mumeŋ i!

¹⁰Go tagi râe‐naremeŋ i nowac roc; megere tâpiri wânʒâŋzi omaecnukac.

¹¹Goki ŋic moc sâqocnere haneckehuc bâtiŋnecmu, eme eri‐ticne i bobojacte eri iŋucne omaeocmu; jâmbomac, ŋic e nokafe sawa.

¹²“O Wofuŋ, nunumu‐nane manac, wiwira‐nanere hazec râec, ʒâŋeuc‐nane honehuc qâoma mi ec! No gorao ŋicmanac fisihuc gowarukopac, kâcɋenefâc‐nane sasawa jaŋere sâc mafa jukopac.