Sam 39:2-12

²Guana poka meke lopu kulu si rau; tiṉitoṉa leadi ba lopu zama ni tugo rau, ba noma lala nana tu sa qua tinalotaṉa.

³Mamata hola sa buloqu koari na qua tinalotaṉa, totoso balabala sisigiti i rau si noma lala nana tu sa qua tinasuna, ke zama vura si rau,

⁴“Zihova, Mu va gilana nau sa rane pana mate si rau. Vea gele gua sa qua tinoa? Mu va gilana nau Goi sa vinabetona sa qua tinoa.

⁵Tavete va visavisa hola i Goi sari na qua rane, sa ginelena sa qua tinoa si guana loketoṉa mo koa Goi, meke sari hopeke tinoa tadi na tie si guana padana keke siniṉo mo koa Goi,

⁶guana maqomaqo pa rimata mo doduru nana tinoa. Loke laedi sari nana tinavete. Omunu varigara ni sa sari na tinagotago, ba lopu gilania sa sapu esei kote tago hobei.

⁷Ego, Baṉara, na sa pule si kote aqa nia rau? Koa Agoi mo si raṉe atu rau.

⁸Mu va sare au koa ri doduru qua sineke tinarae, madi lopu va sisire nau rina tie duviduvilidi.

⁹Maqu lopu kulu si rau guana tie pokaqu, ura Agoi tu vata evaṉia sa qua tinasigiti hie.

¹⁰Mu lopu va kilasa pule au, ura tata mabubulu ni rau sari na Mua kinomiti.

¹¹Pana tubehia Goi sa tie pa Mua ginegese koari nana sinea, si guana kikiti pu gani pani saripu gua qetu hola ni na tie. Hinokara, sa tinoa tana tie si guana keke siniṉo mo.

¹²Zihova, Mu avosia sa qua vinaravara, mamu mae toka nau pana tepa atu Igo rau; mamu avosia sa qua kinabo. Ura guana tie karovoqu mo si rau kekeṉoṉo gua rina tiatamaqu, sapu va toga au Goi pa keke totoso papakana mo.