Marku 9:32-43

³²Nanso ayo khayeewehile nuulumo nne, ni yanamoova unkoha.

³³Yahophiya uKafarnaum, ni, anari uwaani, Yesu ahaakoha: Mwavanyihanani mphironi?

³⁴Yahomaalaca, nlattu mphironi yanavanyihana ayayoru, wiira tipani ri muulupale mwaale.

³⁵Unkomaka, Yesu aheehana owiitthuca awe khumi na eeli ni ahaahimerya: Ntthu aphavelaka ukhala muulupale, eepanke mwankani mwaatthu, ni akhale nrumeyi a atthu othene.

³⁶Ni ankusaka mwanamwane, ahomweesa iriyari aya, ahommarela ni aheerela:

³⁷Ntthu nomwaakhela mwanamwane toko ula mwancina naka, nokaakhela Miyano, ni ntthu nokaakhela Mi, khankaakhela Mi, nanso Ule kirumile.

³⁸Yohani ahonhimerya: Mwalimu, nihomoona ntthu oomolaka macini mwancina naa, ni ntthu ule khannitthara, ni nihomwaateliha.

³⁹Yesu ahaahimerya: Nhimwaatelihe, nlattu khaawo nopanka cotikhineeha mwancina naka phukaapa mi nenna nna.

⁴⁰Ntthu hinoniina, nawiraana ni hi.

⁴¹Ntthu novahani ikoopu yo maasi wiira mmurye nlattu wokhala owiitthuca awe Kristu, khweeli, kinawuhimeryani, khankela ahalelaka itthuvo awe mena vakani.

⁴²Ntthu nohala unkosiha mmoca mwaasinamwane ala ankikupali Mi, fatari atthukeleliye nsiko mmo nsilo noosileliya ni avonyeriye mpaharini.

⁴³Ntata naa nookosihaka, uthikile. Unareera ukela wokumini ni ntata noopahuwa, wahohiyana ukhalana matata oomeli ni urwaa umooroni oohinttiphyaa.