Mark 9:32-43

³²Umu oo unnepu gi nakasopedakwatoo, pana umu ooka tu tubengakwuna-ma sua'e.

³³Ka mu tunakatzimodu ka Capernaum-wi petugase, ka nobe-kwi'yoona soo Te Pabe'e mee mu tubenga, “Hekwitu mu nehane mu ka kemmana?”

³⁴Mu Te Pabe'e nakatzimodu yise gi ka Te Pabe'e nanekwegea, ka numu ooonakwa besa-kwitu nehanena, “Soo tooe haga umu-nagatu ka mu ooonakwa besa'yoona oosoo ka Te Naa-baatoo mooe meakoo.”

³⁵Soo Te Pabe'e yise no'oko mu tunakatzimodu nabatoo bise meeoo mu netamma, “Soo tooe haga tooe numu-kobena soo nadatsungadu, sakwa no'oko numu sumu-nakwi'yoona numu tummatzino.”

³⁶Soo Te Pabe'e yise tuutsekoo tuha'akoo umu-baatoo bise, meeoo mu netamma,

³⁷“Mu ka tuutsekoo tuha'akoo nu-koobatoo besa soobedyana, mu tookwa nuka besa sobedya tuwazoo.”

³⁸Soo John ka Te Pabe'e meeoo netamma, “Ka nana ka tsoapa nematzagakwunidu, numme poonne. Tooe oosoo nana gi numme ume nakatzimodu-matu pana u nanea-ma ka tsoapa nematzagakwuni. Numme yise meeoo oo netamma, ‘U sakwa gi ka Te Pabe'e nanea-ma ka tsoapa nematzagakwunipana,’ ” mee.

³⁹Soo Te Pabe'e meeoo mu netamma, “Mu sakwa uga gi meeoo oo netammapana. Oosoo ka e nanea-ma ka tsoapa nematzagakwunikwuse oosoo tookwa gi e nekwohonekwu.

⁴⁰Oosoo besa e tummatza'e.

⁴¹Tooe haga tooe ka e naka'oedyukuna tooe umu nuka tummatzidu bamagase sapa nu mu sukwe sootuhi meakwu.”

⁴²Soo Te Pabe'e yise ka mu tunakatzimodu meeoo netamma, “Gi besa soo tooe haga tooe ka nuga dooamu ka gi togekoo podo mu tunedyooena. Nu sakwa puu sukwe badya'e, gi yise ka gi togekoo mu Te Naa dooamu tunedyooe.

⁴³Nu sakwa e mi sukwe tseka'a, gi ka suda namanedu mahane. Besa'yoo tooe ka sumuoosoo mi-geana Te Naa-baa petugase, gi waahoo mi-geana, ka niwunu-kwitoo wue. Nu sakwa e kuku sukwe tseka'agwuuni, gi ka gi togekoo podo mea. Besa'yoo tooe ka sumuoosoo kuku-gana ka Te Naa-baa petugase, gi waahoo kuku-gana ka niwunu-kwitoo wue. Nu sakwa tuwow e pooe sukwe tsepata, gi ka gi togekoo poonnena. Besa'yoo tooe ka sumuoosoo pooegeana ka Te Naa-baa petugase, gi waahoo pooegeana niwunu-kwitoo wue, owetuoo ooosapa nidabedu gi nimakwudu. Mu wo'abe yise ooosapa mu tookoo soo'adape.