Markus 9:32-43

³²I uka ma ri longokilalea a pelegona ngava, pali ri mangenge ni nanea e Isu.

³³Ri lakea na tanga e Kapernaum. Na tahuna ri made na ruma tara, lakea e Isu i nana e huriki a murimuri vona, “A ra maki mu vata vona na dala?”

³⁴Pali ri mangaulu kunana, a vuhuna ri vanana vona na dala, ne rei ne ria i dagi hateka.

³⁵Lakea e Isu i made puru i gale lokovonga vona e huriki a murimuri ala ravulu a polona i rua, i taki ria, “E rei i ngaru ni muga, ge ia a iku, a vora ne huriki lobo.”

³⁶Muri i vakapesia na kurukurune ria a koma kiroko. I boko rikea, i taki ria,

³⁷“E rei a viri i tagui a koma kiroko maea na ragu, i tagui iau. E rei a viri i tagui iau, i taguia ra viri i rudu iau a valai.”

³⁸Muri e Ioanes i ta maea, “Mari ni tovo, mi masia tara bakovi i lili tala a hanitu na ramu, lakea mi takia nahea ge rata tabua a naro iea, a vuhuna i uka ma ia e turane hita.”

³⁹Pali e Isu i taki ria i ta maea, “Naha ni hatekakaria. I uka tara viri i rata a nivakasiri na ragu muri ge pagepolo ge ta hale nau.

⁴⁰A viri i uka ma i rata hale hita, ia e turane hita.

⁴¹A taki muholi mua, e rei a viri i habi a naru ne mua na ragu a vuhuna mua a tara ne Kristo, muholi hateka bara i bole a mapana.

⁴²“Pali e rei a viri ge ratea a koma kiroko maea, ra i luhoi tora iau, ge dili na naro hale, bara i kamumu hateka ni gi topi na lohona a kedo dagi, ni gi voro puru na utu, ge pasiri.

⁴³A limamu tara ge rata ioe go rata a rabu hale, o palakudua o vurokia, ma go puru na kanono i uka ma i mate kilala turana limamu i rua. I kamumu bara o tahoka a limamu i taku kunana, o bole a nimahuri vakaroro.