Maleko 9:32-43

³²Na Yesu saha ye hedehededeidi ta, yona hekahekatao wa nige se nuwatulobai. Iyamo nige se henamaiyei, matawuwuna ede se matausi.

³³Na kabo se lage Kapelenauma unai. Siya numa hesau kalona unai, na Yesu ye henamaiyedi ye wane, “Komiu saha kwa hetahetala keda ne unai?”

³⁴Siya nige kalinadi, matawuwuna keda wa unai se bom se henahenamaiꞌuyoidi luwadi ne unai kaiteya kabo yodi bada.

³⁵Yesu ye tulidobi na Saudoudoi-labui wa ye yoganedi na ye wane, “Yaubada matanaena kaiteya tamowai ye henuwa bena ye baguna, taba ye lau ye mulitamolosi, yo ye hemala heyayai tauhaina mamohoi.”

³⁶Na kabo Yesu ye kabilau wawaya gagilina hesau nimana unai. Ye kabihetolo matadiyena na ye labasiyama na ye wane,

³⁷“Taba kaiteya wawaya gagilina hesau doha teina ye yogaisini yau hesaguwai, meta hinage yau ye yogaisinigau. Yo kaiteya ye yogaisinigau meta hinage tauhetamaligau ye yogaisini.”

³⁸Na Yowane ye hededelau Yesu unai ye wane, “Tanuwaga, tamowai hesau ka kita yaluwa yababadi tamowai udiyedi ye hededehepesadi kowa hesamwai. Na ka hededelau unai taba ye kaiyawasi, matawuwuna iya nige kada kaha hesau.”

³⁹Yesu ye wane, “Tabu kwa hekahekaiyawasi, matawuwuna kaiteya laulaugigibwali ye ginauli yau hesaguwai, iya taba nige gonowana ye hededeheyababagau tenem huyana ne unai.

⁴⁰Kaiteya nige ye guduguduida, iya meta kada kaha hesau.

⁴¹Ya hededemamohoi: Kaiteya waila kaputina ye leyawa yau hesaguwai matawuwuna kowa Keliso yona, unai kainauya kabo ye hai.”

⁴²“Ena tamowai hesau tausunumaegau hesau doha teina wawaya gagilina ta ye woyapwanoli na yababa ye ginauli, taba ye namwa mo weku lakilakina gadonawai se kau, na se tuudobiyei gabwawai, na kabo Yaubada yona hekamkamna ye lobai.

⁴³Ena nimam hesau ye woyahesuwalago na yababa ku ginauli, ku bolihai. Ye namwa mo nimam kesega unai mauli nige kana siga ku hai, na kabo ma nimalabulabuim na ku lau kaiwa kalakalasina nige kana siga unai.