Mareko 9:13-33

¹³Eliare ine ʒiŋuc ŋazakopac: E biac fisirâ juhame jaŋe wiac kosa ecnembiŋ. Miti papiao ere qâreŋkekicne iŋuc hâcne ecnembiŋ.”

¹⁴Tikionec waha‐fârerâ motec gâcne jaŋerao fisirâ honembiŋ: Ŋic mâretec orâŋ‐joparâ domahapie miti qaqazu tucne motec jaŋehec mu qaqatarac embiŋ.

¹⁵Eme ŋic sasawa jaŋe Jesu honerâ izia fâfârerâ ra bâfuarâ mu ʒeri ecnembiŋ.

¹⁶Eme eki wio‐jarewec, “Wemo wiacte mu qaqatarac eŋgopieŋ?”

¹⁷Mume ŋic jaŋeraonec moczi fuarâ ʒiŋuc âzâcnewec: “Qaqazu, ŋokâ‐nane demoŋ nâŋguŋnezi ecneme gorao bawarekopac.

¹⁸Motec e demoŋzi dameŋ sâc rorâ ba suriŋ ecneme mic sofororocne wefume mic kikihotac kihuc me kikene râŋgeŋkeekac. Eme motecfâcge jaŋe jâpecneniŋte jazape eipiembieŋ.”

¹⁹Mume Jesuzi ʒiŋuc jazawec: “O ŋic mamanasiŋ tâmiric ŋoŋe, no ŋoŋehec hati jurâ ju ehuc âsi qataŋ eŋarepemu me? Motec norao bawareniŋ.”

²⁰Mume motec erao barapie demoŋzi Jesu honerâ motec rârec bârârec ecneme me kikene jâjâwâckeme mâreŋko qarâ risimbiŋne qahuc fome mic sofororocne wefuwec.

²¹Eme Jesuzi motec mamac‐ticne wiocnerâ muwec, “Wiac i wezimucne fuacnewec?” Mume ŋiczi ʒiŋuc âzâcnewec: “I ɋieoa fuacnewec.

²²Demoŋ e motec sipirickeocte wemo afecne ʒocko â opâo tuŋkeme huhuc domaekac. Go ine tâpiri fogarekacko nâhere buge sâqoreme bafic‐nâfoc.”

²³Iŋuc muhuc wâsickeme Jesuzi ʒiŋuc âzâcnewec: “Tâpirire mukicte mupe manac, moc e mamanasiŋhec juocmuo wiac sasawa eene efâreocmu.”

²⁴Âzâcneme izia motecte mamaczi kâcɋene wirahuc muwec, “No manasiŋgukopac, go gahac mamanasiŋ‐nane gegec dodocne basanaŋke‐narec!”

²⁵Eme ŋic mâretec fisi sâqorehuc domapie honec‐joparâ demoŋ jâpehuc muwec, “Demoŋ qepoŋ nâŋguŋne go gazape, wefurâ wiserâ rac, erâ mocwâc mi risie ware huzemec!”

²⁶Mume demoŋzi kâcɋene owackehuc motec heunuckerâ âte tuŋkeme qarâ hâmocne tinac fowec. Fohame ŋic jaŋe honerâ mumbiŋ, “Hâmo‐jâmbâŋkejec.”

²⁷Iŋuc muhapie Jesuzi motec menao rorâ bafahareme domawec.

²⁸Eme Jesu e ficko feme motec jaŋe bucko wiocnerâ mumbiŋ, “Nâŋe wemocte jâpenaŋte eipiembeneŋ?”

²⁹Mupie jazawec, “Demoŋ iŋucne jaŋe wiac moczi mâcne, mâc nunumuzi jâpec‐jopazo.”

³⁰Eme jaŋe hae mâreŋ i beherâ Galilaia mâreŋ fotâcnerâ rambiŋ. Ine ŋic jaŋe biŋe‐ticne mananʒipiŋte kamierâ rambiŋ.

³¹Rahuc motecfâcne ʒiŋuc hâcne muhuc jaza qazuc ewec: “Ŋic Fâri Wâtuŋne e ŋic jaŋere meo feme qapie hâmorâ ʒoaŋ gie bapa jahec â moc eha fahareocmu.”

³²Iŋuc muhuc jazame dâŋticne kâuc barâ indiŋkeniŋte memeŋgaruc embiŋ.

³³Eme raku Kafanaum haeo fisimbiŋ. Fisirâ ficko ferâ motecfâcne indiŋ‐joparâ muwec, “Hatao wemo wiacte muc manac embieŋ?”