MAREK 9:2-41

²Pal o šov džives o Ježiš iľa peha le Peter, le Jakob the le Jan a sas korkore pro učo verchos. Ode pes anglal lende čerinďa.

³Leskere gada sas parne sar jiv – ajse parne, hoj ňič pre phuv len na kerďahas parneder.

⁴A sikaďa pes lenge o Eliaš the o Mojžiš a vakerenas le Ježišoha.

⁵Akor phenďa o Peter le Ježišoske: “Rajeja, mištes amenge hin kade! Keras trin stani – tuke jekh, le Mojžišoske jekh the le Eliašoske jekh.”

⁶O Peter na džanelas, so te phenel, bo igen predaranďile.

⁷Jekhvareste avľa e chmara, zaučharďa len a andral e chmara prevakerďa ke lende o hangos: “Kada hin miro Čhavo, saves kamav. Les šunen!”

⁸Takoj sar pes obdikhle, imar na dikhle paš peste ňikas, ča le Ježiš korkores.

⁹Sar avenas tele pal o verchos, phenďa lenge o Ježiš, hoj oda, so dikhle, ňikaske te na vakeren avri, medik o Čhavo le Manušeskero na ušťela andral o meriben.

¹⁰On doľikerde oda, so lenge o Ježiš phenďa, ale phučenas jekh avrestar: “So oleha gondoľinel, sar phenel, hoj ušťela andral o meriben?”

¹¹A phučle lestar: “Soske phenen o zakoňika, hoj ešeb (peršo) mušinel te avel o Eliaš?”

¹²Ov lenge odphenďa: “Čačipen hin, hoj o Eliaš avela ešebno a prikerela sa. Ale soske hin pisimen pal o Čhavo le Manušeskero, hoj mušinela te el odčhido a but te cerpinel?

¹³Phenav tumenge, hoj o Eliaš imar avľa, ale kerde leha, so kamle, avke sar pal leste hin pisimen.”

¹⁴Sar avle pale paš o učeňika, dikhle pašal lende but manušen a hoj varesave zakoňika pes lenca vesekedinen.

¹⁵Ola manuša, sar dikhle le Ježiš, igen radisaľonas a avle les te pozdravinel.

¹⁶O Ježiš lendar phučľa: “Pal soste pes lenca vesekedinen?”

¹⁷Jekh ole manušendar leske odphenďa: “Rajeja, anďom ke tu mire čhas, bo hin andre leste o ňemo duchos a našťi vakerel.

¹⁸Všadzik, kaj pre leste oda avel, čhivkerel leha, marel leske pro muj o peni, randel le dandenca a ačhel sar kašt. Phenďom tire učeňikenge, hoj les te traden andral leste avri, no našťi oda kerde.”

¹⁹O Ježiš lenge odphenďa: “Ó, manušale bi o pačaben! Mek dži kana tumenca avava? Dži kana tumen mek zľikerava? Anen les ke mande!”

²⁰Ande les paš leste a sar oda duchos dikhľa le Ježiš, čhivkerelas le čhavoreha. Ov peľa pre phuv, kuľinelas pes a pro muj leske marelas o peni.

²¹O Ježiš phučľa leskere dadestar: “Kanastar hino ajso?” Ov odphenďa: “Ciknorestar.

²²Buterval les čhivelas andre jag the andro paňi, hoj ča les te murdarel. Te šaj vareso keres, av jileskero ke amende a pomožin amenge.”

²³O Ježiš leske odphenďa: “Soske phenes: ‘Te šaj?’ Oda, ko pačal, savoro šaj kerel!”

²⁴Ole čhaveskero dad takoj zvičinďa: “Pačav, Rajeja! Pomožin mange, hoj feder te pačav!”

²⁵Sar o Ježiš dikhľa, hoj pes mek buter manuša skiden, pokarhinďa ole nalačhe duchos a phenďa leske: “Tu ňemo the kašuko duchona, prikazinav tuke: Av andral leste avri a šoha buter andre leste ma dža!”

²⁶O duchos leha čhivkerelas, vriskinelas a paľis geľa avri. O čhavoro sas sar mulo, vašoda but džene phende, hoj muľa.

²⁷Ale o Ježiš les chudľa vastestar, hazdňa les a ušťiľa.

²⁸Sar o Ježiš avľa andro kher a imar sas korkore le učeňikenca, phučle lestar: “Soske les amen našťi tradňam avri?”

²⁹Odphenďa lenge: “Kajse demonen našťi te tradel avri, ča la modľitbaha the le postoha.”

³⁰Paľis gele het odarik a džanas pašal e Galileja. O Ježiš na kamelas, hoj alestar vareko te džanel.

³¹Bo le učeňiken sikavelas a phenelas lenge: “O Čhavo le Manušeskero ela dino andro vasta le nipenge a murdarena les, ale pro trito džives ušťela andral o meriben.”

³²O učeňika na achaľonas ole laveske, ale te phučel lestar pal oda pes daranas.

³³Avle andro Kafarnaum. Sar sas andro kher, phučľa lendar o Ježiš: “Pal soste vakerelas maškar peste, sar avahas pal o drom?”

³⁴Ale on sas čhit. Bo sar avenas pal o drom, vakerenas pal oda, ko hin lendar nekbareder.

³⁵O Ježiš peske bešľa, vičinďa le dešudujen a phenďa lenge: “Oda, ko kamel te el ešebno, mi el posledno a mi služinel savorenge.”

³⁶Paľis iľa čhavores a ačhaďa les maškar lende. Sar les iľa pro vasta, phenďa:

³⁷“Sako, ko prilela jekhes kajse čhavorendar andre miro nav, man prilel. A sako, ko man prilel, na man prilel, ale Oles, ko man bičhaďa.”

³⁸O Jan leske phenďa: “Rajeja, dikhľam varesave manušes, sar andre tiro nav tradelas avri le demonen a na domukahas leske ada, bo na phirel amenca.”

³⁹Ale o Ježiš lenge phenďa: “Ma braňinen leske! Bo ňiko, ko kerel andre miro nav zazraki, našťi vakerel takoj namištes pal mande.

⁴⁰Bo ko na džal pre amende, hino amenca!

⁴¹Čačipen phenav tumenge, hoj sako, ko tumen dela te pijel jekh poharis paňi andre miro nav, bo san le Kristoskere, čačes chudela peskeri odmena.”