Maleko 9:2-41

²Lahai faligigi esega mulidi yai Pita, Diyemsi yo Diyon, Yesu ya foya hudoꞌiyedi be sa lau tuꞌa lofalofana yai. Sa itaꞌita lau na Yesu nenena ya lau hudoꞌi.

³Ana leli sa kafu wananaha be sa famata anꞌan. Hige gonowana tanoꞌubu yai te sai laꞌi i ankaisu be ti kafu doha.

⁴Yo fede Ilaidiya yo Mose sa taumahata be maꞌedi Yesu sa libaliba.

⁵Pita iyen, Tanuwaga, ya loholoho wananaha be ai amaiteꞌi! Haba gwaꞌu faihona ꞌe ginaulidi. Um em, Mose ena, yo Ilaidiya ena.

⁶(Sa ꞌwasabu wananaha be Pita ya libaliba gaibu.)

⁷Habahim yada ya laoma be ya fakoudi na ganahewana yai alina hudoꞌi sa atahi iyen, Itete Natugu, E fanuha wananahai. Au ataꞌatahi lau lisina!

⁸Yo fede sa itaꞌita asiꞌasi na hige sai laꞌi ti ita. Yesu moho maꞌedi.

⁹Tuꞌa yai sa letama, Yesu ya laugagayoꞌedi iyen, Somo ami ita tabu sai laꞌi au faliba ya lau wee–, Doga Natuna ya obiyo fuyo peꞌi yai.

¹⁰Ena laugagayo sa lau watan na iti ibodi moho sa lau fadosi tiyen, “Obiyo fuyo peꞌi yai” aniyona somo?

¹¹Yo fede Yesu sa fatiꞌoi, iyen, Sidohana be laugagayo tau lau faꞌataenna tiyen, “Ilaidiya haba ya laoma bwaꞌi?”

¹²Alinadi ya bui iyen, Moꞌisa, Ilaidiya haba ya bwaꞌi, be ginauli mahudoꞌina ya faloholoho bodai. Buka Tabuna yai sa libaen mate, “Yau, Doga Natuna, haba E ankamkamna suꞌusuꞌu yo haba sa ꞌwaiyoꞌoꞌegu?”

¹³E falibamiu mate Ilaidiya haꞌa ya laoma be dodoga sa fahisu faheyaya doha Buka Tabuna ya libaen.

¹⁴Fuyanna Yesu maꞌana hewali faihona tuꞌa yai sa fuyoma baiwa laꞌilaꞌi haidadi sa gana fataꞌiꞌilidi na maidadi laugagayo tau lau faꞌataenidi sa faifaibayaho sa itadi.

¹⁵Maihalana yai baiwa Yesu sa ita be sa tauhiti. Sa lautafo lau lisina be sa lautoꞌiyen.

¹⁶Yesu ana hewahewali ya fatiꞌoidi, iyen, Somo ami faibayahoꞌen maidamiu dodoga ni?

¹⁷Taumoho hesa pwalu yai, iyen, Tanuwaga, natugu E leyama lisim paꞌana yaluwa heyaheyayana lisina yai be hige i libaliba.

¹⁸Yena ya luhufi haba ya lofe lidiyen ai tanohi yo ya gwasagwasa pulo na moꞌana ya nalididiꞌi yo tauna sa siꞌololo. Am hewahewali E falibadi bena sa liba dui. Na hige gonowadi.

¹⁹Yesu dodoga ya falibadi, iyen, Gwama ni au leyama lisigu. Tau kawawananaha gesa hitimiu, hige emi sunuma. Ai lisimiu haba E miya lofana doha somo? Ma fisa haba emi mwahu E bahei?

²⁰Yo fede sa leyama lisina. Maihalana yai Yaluwa heyaheyayana ya itaꞌita lau be Yesu ya ita yo fede yaluwa ni, gwama ya pei lidiyen tanohi yai be ya tapitapi pili yo ya gwasagwasa pulo.

²¹Yesu ya fatiꞌoi iyen, Atasina yai ya fatubu? Gwama tamana iyen, Ma kiukiuna ya fatubu.

²²Fuya ouꞌouli ya pei lawen ai oyagi alaꞌalana yo ai hoꞌowa be bena ya wunui. Aee–, yena gonowam u nuwatohatohaimai be u saguhimai.

²³Yesu iyen, Sidohana be wa liba, uwen, “Yena gonowam?” Tau sunuma gonowana ginauli mahudoꞌidi ya ginaulidi.

²⁴Yo fede gwama tamana ya yoga lau, iyen, E kawawananaha! In moho egu kawawananaha hige i laꞌi, be u saguhigu.

²⁵Pwalu ya suꞌusuꞌuma Yesu lebena yai yo fede ya libalau yaluwa heyaheyayana lisina iyen, Um yaluwa doꞌodoꞌona yo libaliba gesana, E falibam gwama ni u kalamahano afulen na tabu u luhu fuyoi.

²⁶Yaluwa heyaheyayana ya ꞌwalaꞌui na gwama ya kamfafatabubu na ya kalamahano. Gwama itaꞌitana doha doga peꞌipeꞌina be mahudoꞌidi tiyen, Haꞌa ya peꞌi!

²⁷Yesu ya abilau gwama nimana yai be ya faꞌobiyo.

²⁸Habahim, sa lau luma ganahewana na ana hewahewali sa fatiꞌo modigafui, Sidohana be yaluwa heyaheyayana ni hige ai liba dui?

²⁹Yesu iyen, Hige somo laꞌi gonowana. Lauꞌuꞌula moho gonowana yaluwa heyaheyayadi doha ite ya duidi sa lau ganamuli.

³⁰Nuꞌu ni sa lau afulen na sa lau Galili. Yesu hige i fanuha bena sai hesa i sibai mate in somo yai,

³¹paꞌana tau famuli watanina, ya fatalahadi. Ya libalau lisidi iyebom, Doga Natuna haba sa fele lawen dodoga dodoga nimadi yai, be sa wunui na lahai fafaihonana yai haba ya mwahuli fuyo.

³²In moho liba te aniyona hige ti nuwatuhu lobahi. Sa ꞌwasabu be hige ti fatiꞌoi.

³³Kapanayum nuꞌuna yai sa mahano lau be sa lau luma ganahewana. Habahim Yesu tau famuli watanina ya fatiꞌoidi iyebom, Edaꞌeda yai somo ami faibayahoꞌen?

³⁴In moho hige alinana ti bui paꞌana edaꞌeda yai ibodi sa faifaibayaho mate sai haba ya hasai wananaha.

³⁵Yesu ya taꞌai na habahim ana hewahewali safuhudohudoꞌi luwaga ya yoga gogondima na ya falibadi iyen, Yena sai ya fanuha ya bwaꞌi mate bena ya mulita wananaha yo in mate dodoga mahudoꞌidi edi tau lau fayofayo.

³⁶Yo fede wawaya kiukiu hesa ya faꞌobiyo atiꞌatipudi yai. Ya fagado bainewaꞌen na ya falibadi iyen,

³⁷Sai laꞌi hesagu yai wawaya doha itete ya yoga hitin mate, yau hinaga ya yoga hitinigu, yo sai ya yoga hitinigu, mate tau fatamaliguma hinaga ya yoga hitin. Hige ibogu moho!

³⁸Diyon ya libalau Yesu lisina iyen, Tanuwaga, doga hesa ꞌe ita hesam yai demoni ya liba duidi. Yo fede ꞌe lau biliyen paꞌana in hige i laulau watanida.

³⁹Yesu ya falibadi iyen, Tabu au lau biliyen paꞌana hige sai laꞌi noꞌo laulaudi hesagu yai i lau ginauli na haba feula i liba faheyayagu.

⁴⁰Sai hige i ꞌwaiyoꞌoꞌeda mate eneheda.

⁴¹E faliba dudulaimiu mate yena sai hoꞌowa ya felemiu, paꞌana umi enehegu, haba maisana ya abi.