Maki 6:12-39

¹²Wuane lea-kola, balana disaipolo alesa akali tupamane poto, wandakali tupa lamawuato, yakama yamapane peke lalapa leainipia.

¹³Wuane loto, utupane-mane sipitisa koo kambua peyo wataka, olipi dini ipane tupa wandakali siki pelene kambua tupanga aiya amawuato, utupanena siki tupa mo atu yaka peainipia.

¹⁴Jisasato metekolo piape kambua piki pua atea-kola, wandakali kambua-mane balana gene oko laiyu leainipia. Yangi-mane akali okone bala Ilainja ateya leainipia. Yangi-mane bala potopesa akali wamba ateaini okonepene mindi ateya leainipia. Yangi-mane pii waka mindi loto, Goteto ipa peya-maiyane akali Jone malinga ika laya wato, bala minu tai laya eya-kola, balato katulo metekolo piape utupane pua atalua leainipia. Wuane leai-kola, kiŋi Etoteto ale wato, wamba nambato Jone maa pai lewa oko bala malinga ika lapia yalua leaipia.

¹⁷Anu peakale Etoteto Jone maa pai leaipiape. Wamba Etoteto balana amene Pilipi okona wetene Etoti-yasa oko tondo moto, kee lea-kola, Joneto Etote lamawuato, nimbato wanda oko tondo moto, kee lalu atele okomane Gotena loo oko angowa atele okonde lo lamaiki peaipia. Wuane lo lamaiki pea-kola, Etoti-yasato Jone towa yataka wato, bala peyo ome lokale nembo teane tekeko, Etoteto Jone bala Gotena akali epene tika-pene mindi ya lo nembo teaipia. Wuane nembo toto, bala ando yukuwa atoto, balana pii ale wato, nembo kambua teane tekeko, balana pii epelewa ale aka peaipia. Tene okonena, Etoti-yasato Jone peyo ome lolane lo yuku wato, Etoteto ami yanda yene minditupa lamawuato, mindimane Jone peyo ome lolane. Yakamato bala katapusa pua aindaka loto, bala ando atalapape lea-kola, Etoti-yasato katulo Jone peyo ome naleaipia.

²¹Matili Etote bala angini-mane mandeane oto oko epea-kola, Etoteto tomo kambua yangalapa loto, gapomane piape akali gene yene tupapi, ami ando atalaini akali tupapi, Galili disitiki okona akali kawane tupapi, utupane bala towa atu tomo nolo epeakale leaipia. Utupane epoto, tomo no peteai-kola, Etoti-yasa wanane oko epoto, danisa lea-kola, Etotepi, bala towa atu tomo no peteaini tupapi, utupane-mane andoto, epele yainipia. Epele wato, kiŋi Etoteto balana weno minuto, wana okone lamawuato, nimbato minditaka mindi mokale gii leendo, enene wete, nambato okone gukale. Yuu nambato ando atalawane oko tombo peyoto, yangisa gii leendo, nambato yangisa gukale leaipia. Wuane lea-kola, wana okone bala takita poto, balana angini tipa puato, nambato aki mindi gii loape leaipia. Wuane lea-kola, Etoti-yasato Jone peyo ome lolane asia mindi eya ya lo andoto, nimbato ipa peya-maiyane akali Jone okona kawane gii lape leaipia.

²⁵Wuane lea-kola, wana okonemane kiŋi oko peteanga kapoyale peke loto, epapu oko angi teke, ipa peya-maiyane akali Jone okona kawane oko pelesa andane mindina yata wato, namba gula leaipia.

²⁶Wuane lea-kola, kiŋi oko bala mini kenda wete yane tekeko, akali utupane pitaka towa pituto, weno minuto, nimbato minditaka mokale gii leendo, enene wete nambato okone gukale lalo oko nembo toto, wana okona pii tanga na-lokale nembo teaipia.

²⁷Wuane nembo toto, okone angi teke, kiŋi okomane ami yanda yene mindi lamawuato, nimbato Jonena maa oko pai loto, balana kawane oko mo awua ipu leaipia. Wuane lea-kola, ami yanda yene okone bala katapusa andaka poto, Jonena maa pai leaipia.

²⁸Pai loto, balana kawane oko pelesa mindina yata wato, awua epoto, wana oko maya-kola, wana okomane kawane oko balana angini oko mayaepia.

²⁹Etoteto Jone peyo ome lea-kola, Jonena disaipolo tupamane ale wato, balana umbuaini oko mo awua poto, mali peainipia.

³⁰Matili Jisasana aposolo akali alesa tupa peke loto, bala ateanga epo amunguli puato, utupane-mane piape waka-waka peaini tupapi, pii mana lamai-yaini tupapi, utupane pitaka bala lamai-yainipia.

³¹Okone angi, wandakali kambua wete Jisasa ateanga po ipu pua ateai-kola, Jisasapi, balana disaipolo tupapi, utupane yakama tomo nolane oto mindi yaa napeaipia. Yaa napea-kola, Jisasato balana disaipolo tupa lamawuato, nanima angu wandakali napalene yuu mindina poto, gii ukupini mindi oto mo atamakale ipulupa leaipia.

³²Ipulupa lea-kola, utupane angu sipi mindina pitiyu, wandakali napalene yuu mindina makale loto, peainipia.

³³Utupane yakama angu sipi mindina pitiyu peaini tekeko, wandakali kambua-mane Jisasapi, balana disaipolo tupapi, utupane ukusane poyale peyai lo andeaini-pia. Andoto, tano tupa pitakana tane wandakali kambua asini tai loto, Jisasa poyale peane yuu okonena yakama wamba ini ingane poto ateai-kola, Jisasapi, balana disaipolo tupapi, utupane matili epeainipia.

³⁴Epoto, Jisasa bala sipi oko tepa alu, ipa matene okona poto andea-kola, wandakali kambua wete ateaini tupa sipisipi yatawa atalane akali mindi ata napene gulo ateainga andoto, balato utupane ondo wato, pii mana kambua lamai-yaepia.

³⁵Matili nai andaka poyale pea-kola, balana disaipolo tupamane bala ateanga poto, wua leainipia: Wandakali napalene yuu mindina ateyama-kola, andipa ole leya-ko.

³⁶Wandakali utupa tano aŋako mindina yandopi, wandakali mindina eenga yandopi, okonelapo mindina poto, yakamana ulia nolane tupa kambea-kalenga, nimbato utupane peakale laa leainipia.

³⁷Wuane leai-kola, Jisasato utupanena pii okone yano peyoto, yakama tane wandakali utupa tomo neakale maiyapa leaipia. Wuane lea-kola, balana disaipolo tupamane akali angu tausene yaupi mindi ongane ateainga andoto, nanimato mindisa poto, muni kambua wete-mane betesa kamboto, wandakali utupa pitaka-mane neakale maipe-penepe lo bala tipa peainipia.

³⁸Tipa peai-kola, balato utupane lamawuato, yakamanga betesa aki-tupi eyape lo andolo pulupa leaipia. Wuane lea-kola, utupane-mane andolo poto, nanimanga betesa yau, pisa lapo eya leainipia.

³⁹Wuane leai-kola, balato utupane lamawuato, wandakali tupa yomo waka-waka gulo tani kaka-ene okona peteakale lalapa leaipia.