Mak 6:12-39

¹²dlanea i Gode wengo ometniba moniba bib mak bib mako haabianiba naka mak unang maki omkaye bianiba baabeniba Ib bobol temo deskinaniba omoniba Gode omaline ge oye bianiba

¹³eka hob misiami fotebenaye bianiba eka gembib biamo naka unangi wel aayo tang kunin ayamo oloniba i gabamon dimo alibeniba klaubeiba ayam an biam bliba okok kebinibbiobe.

¹⁴Amo yo dimo Yesuse okoko nabeo weng sango bib mak bib mako alukum onon tlanoa balianoa wenteniba tekein ke tlanabiba eka Yudai komok sume Helot esa wentenanabea naka mak unang maki obianiba Yone aa fuayemin nakae sino anaiba kaanebuo memalo imin hanane kesoa e titil omonea okok sumo sino ni mo watemim blimo klabea ni watemebuobo gesib

¹⁵eka maki baaniba Gode weng omkeimalin nakae Ilaiya eta imin hana tebiebo gesib eka maki baaniba E Gode weng omkeimalin nakabo, e makob sinanggwano Gode wengo omkeima binebio etabo gesib namsiba

¹⁶Helote Yesuse weng sango wentenea baanea Sino ne awa genalin nakae dabaia monea Yone gabame waisanea kaanebu eta memalo imin hana bianeta okok kebebo ge baasebe.

¹⁷Sino Helote e heke Filibe alelo omeisane kesoa Yone Helote baabanea Kobo keb heke alelo omeisaneb yole hekmel wengo welanebobo ge baabasea Helodiaso Yone dobsuanasoa Helote awa genalin nakai dlanea moniba Yone afuniba klabuto ge debeb moniba klabut am daibbua

¹⁹Helodiaso dobsuananoa ananang genamsoa Helote tolobo gesebe.

²⁰Niminbabe, Helote tekein kenea Yone naka kiningobe. E bobol tem funino ayam kesoa e Yone tolo tosiananea tolobo genebua kima bianea e wengo wentenea e bobol asusu fumbianea E wengo fatnamine? gabianea e bobol temo ilum omfubabio otane e Yone wengo kla wentehamonsebe.

²¹Helodiaso Yone deibanobua sinanoa Helote e biemo dobmikinobuo amo tlo kesoa naka sum sumi e okoko daaha binabib isa eka awa genalin nakai komokwal isa eka Galili seli naka gang isa baabenea Ibo tliba falo ga dowonomo ge baabene kesoa Helodiaso funanoa I imeno unalaib dimo Yone anaine ge funanabua

²²i dli tete tlaniba imeno unalib dim ole Helodiaso moono tamnoa biin tam unanoa komokwali imen wembibi kin dim ye biin tla blanhasoa Helot esa e bekeb isa kla goboniba komok sume Helote unang sou olo baaboneo Obo nimin dlang genebte? Obo inamin namino dlano gabeb biamo baatnenebta ne doklano ge baabonea

²³e Gode niniino taisanea baabonea Obo baaneba Kobo inamin namino donene genemebo ne doklamabibe. Obo ne baatneneba Kobo inamin namino kima biebo atosino mo waneba kimanano geneb mole waklamabibo gesea

²⁴unang sou olo wentenoa tamnoa awok osu tam unanoa baabonoa Ne fatnamin ota mo baabaita doneke? gesoa awoko baabonoa Obo taneba Helote baabaneba Yone aa fuayemin nakae gabam eta waisa ofutneneta obutne tele ge baabosoa moono wentenoa hebmamsab imin tamnoa komok sume

²⁵Helot esu tam unanoa baabanoa Kobo memale Yone gabame waisaneba flet kwame tem daak ofaneba obutne tele ge baabasobe. O funanoa Ne Yone gabame atemnita bain kaanebe genano genota weng olo Helote inangge baabasobe.

²⁶E wentenea e bobolo ilum omfubano otane e Gode niniino taisanea naka maki e temna imeno wembibi i kin dimo baabonea Ne inamin namino doklamabibo ge baabone kesoa e unang sou olo wengo mo ombiabueim blimobe.

²⁷E wentenea awa genalin naka make baabanea Kobo moneba Yone gabame waisa obeb tele ge baabanea dabanea monea klabut am unanea Yone gabame waisa obonea

²⁸flet kwame tem daak ofakanea obeb tenea unang sou olo obuensea eka unang sou osak obeb tamnoa awoko obuensobe.

²⁹I inaniba Yone gabame waisaiba e okok aleyemin nakai wenteniba teniba dame debeb moniba dofaibbiobe.

³⁰Yesuse okok dlasanin nakai dlanea unibbuei imin teniba Yesus esu ele tlaniba i okoko nabianiba Gode wengo nakaia unangai omkayebi tlibo wengo Yesuse baabasiobe.

³¹Nakaia unangai homoni unebe tlebe bliba daaye bianea Yesus esa eka e okok aleyemin naka isa i imeno mo dowonomabibba kesoa Yesuse e okok aleyemin nakai baabenea Ibo hebkeiba nibo monoba naka blim ibuantem ye unanoba ibo sinaibte ge baabe dletnea

³²i weseme obetniba moniba naka blim ibuantem ye unib

³³otane naka homon unang homoni yatemiba i unib kesoa yatemniba nakaia unangai bib sum sumo blibi alukum dalo obetniba Yesuse mema weseme tem bebea ita sin gaisaniba moniba ibuantem ye bebiba

³⁴Yesuse weseme obeb watnea ken wat obanea daak tlanea temea naka homon unang homoni teniba waisa blib kesoa yatenea kla dohalilanea funanea I makob eil sibsibi i kimanini blim bliba nabinabibi ulabobo genea e Gode weng homono omkaye monsebe.

³⁵E inayebea afoko dawabbanoa e okok aleyemin nakai teniba baabaniba Betan olo naka blim kesoa afoko dawabbanang gobo

³⁶kobo nakaia unangai dlaneba moniba bib gwab gwabo meb meb ele buo olo imeno mo walo doweine gesiba

³⁷Yesuse baabenea Ibo i mo dlaiba unaibe! Ibmaye imeno oyine gesea e okok aleyemin nakai baaibo Kobo fumbebo ni K200 o fatda olonobta imeno walonobta nakaia unanga eli oyomabbione? gesiba

³⁸Yesuse baabenea Ib bleto fatnamin olaibbione? Moniba watemine gesea i moniba watemniba baaibo Blet gwabo 5 olanoba eka aningi asu olananobbiobo gesiba

³⁹Yesuse wentenea baabeneo Ibo nakaia unangai baabeiba teniba bukuban dim ele heba toun heba toun bianiba maki 100 toula maki 50 toula bisibte gesea i baabeiba inaniba toulasiba