Maga 6:12-39

¹²Amala säi amo nabala ili afialahilä udia dolö amolima dili asigi besumalola säla ïïa nawesa nelo.

¹³Ilia amala säsäla nawesa nea udia dolö yafie mugabe fedai nefolalo amoli nesiladigiladigi. Udia dolö yafie olola nowei difolalo amoge ilia weli söga negesebegi, wahisa maadei.

¹⁴Udia dolöea Yesuïe ëi säsäi asi ameada beaha aligilo Gini Heledoea nabi. Odoaea sähalea, Ödägi gelo Yone dafidi baagoi amo bu nowelahilä obëgëla misi amea geloi melëlo made gadoi hamosa neamelëla säha nelo.

¹⁵Odoaea sähalea, Eda Elaia neala säi. Odoaea sähalea, Eda bea sälo siiba nelo amo gadoi gabula säi.

¹⁶Heledoea ado amo nabalahilä sähalea, Yoneda na muugi damui amo bu obëgëla maala neagowalea gabula säi.

¹⁷Helodiasa eda dafidi Heledoïe edoo Filibiïe udia sulo amo hobeala Heledoea fedela nii. Amala hamosebegi, Yonea Heledoma sähalea, Dia didooïe udia fedela neala dibalä sebego dofea made hamoimelëla säi. Amala säsebegi, Heledoea ami dolö nefolalo amolima sähalea, Yone gaumolö mosalola säi. Amalebe ilia e nafodolahilä galabaia mosöa negei. Heledoea ïe udia Helodiasa obeägïmäia amala hamoi.

¹⁹Ïe udia Helodiasaea Yonema habobalahilä e baagomäia abilia nufulödula helësësa sulo. Amai gaso, nufulö fu made melï.

²⁰Amasebegi, Heledoea Yoneda dolö hedabi, Godea hïle nafolai neebe amo helësëla bedälahilä idihë nelo. Ea Yonea ado säi amo nabalahilä obeägïlo amogi e asigi säosäola helësësa nelo.

²¹Heledo e ägüla misi segeyo beala gamane sigi aligilo nefolalo amolimage ami sigi aligilo nefolalo amolimage Galili segeïe dafidilo nefolalo amolimage ea sähalea, Molö nudulä gegedomalola säi. Amala sälahilä molö giasolo amo gala Helodiasaea Yone nufulö dibe fu beagolei.

²²Segeyo amo gala udia Helodiasa hïle idiwi amo maalahilä sigoi. Ea sigoi amo bealahilä Heledoeage dolö odoaeage hedabola obeägï. Obeägïsa maadesebegi, Heledoea dolïsä amoma sähalea, Sigosegoïe nelebo afädë ïmose amo gadoi ïmolömelëla säi.

²³Ea naabo migalïa diigisalea dolïsä amoma sähalea, Nelebo afädë ïmoseda, na sege edefade beaha neebe amogi mogogi nofela ïmolömelëla säi.

²⁴Amala säsebegi, dolïsä amo segea doadigila awälahilä emema nabahalea, Ne edo ïmola sämolödula nabi. Amala nabasebegi, emea sähalea, Ödägi gelo Yoneïe busa damula ïmola sämalola säi.

²⁵Amala säsebegi, dolïsä amo Heledo neebea fodolofalï baluluia obëgëla awälahilä ema sähalea, Ödägi gelo Yoneïe busa damula falodaia gaula maala walio ïmäia hamesamelëla säi.

²⁶Amala säi amo nabalahilä Heledoea edefademalä bobasëla asigii gaso, dolö molö molö mofiai amoli sidaia migalïa diigila säi amo fisimola sämolöi made gabula helësëi.

²⁷Amala helësëlahilä Heledoea fodolofalï idihë aligilo afädëma sähalea, Yoneïe busa damula gaula obëgëmolö mosöla säi. Amala säsebegi, ea galabaia mosöa awälahilä Yoneïe busa damula

²⁸falodaia negela gaula obëgëlahilä dolïsä amoma ï. Ïasebegi, dolïsä amea emema ï.

²⁹Amala hamoila säi amo nabalahilä ïe bëgëla aulo amolia ïe domalo neala gaula awäla igi äbägi negei.

³⁰Abosolo dolö amoli Yesu neebea obëgëlahilä ilia hamoi amoge mala olelei amoge sulubadela ema säla ïaha nelo.

³¹Udia dolö afu mafusalea ili molö molö fu made beasebegi, Yesuea ilima sähalea, Udia dolö madeido dihilido hele namolö mofiamalola säi.

³²Amala säsebegi, hilido ödä dudaia filahilä udia dolö madeido afiai.

³³Ili awäha nebegi, udia dolö yafiea bealahilä ili awäha gabula helësëi. Amala awäha gabula helësëlahilä ili gaamu elögi elögila nagadabodo baluluia awälahilä ili moholö awäsebea ami ilidale dafidi awäla beselagalai.

³⁴Ili awäla e ödä agesua aliga alogolahilä beahamelebe udia dolö yafie nefolalebe melï. Ili sugua sibi sigi aligilo madesalea hilido aligilo amo gadola neebe amo bealahilä ili bobasëi. Amalebe ea ado mala yafie ilima olelesa nelo.

³⁵Segeyo amo gala deadisebegi, ïe bëgëla aulo amolia e neebea maalahilä ema sähalea, Sege udia dolö maadeiawi nebegimu hä deadifalï gabumelë.

³⁶Udia dolö nefolalebe goli afialahilä hili molö bidia nimolö sagai mosö dibea amige gaamu holöfalï dibea amige hogola afiamalamola säi.

³⁷Amala säsebegi, ea ilima säla obëgësalea, Ili molö muäia dilia ïmalola säi. Amala säsebegi, ilia ema säla obëgësalea, Muni gina hädali äudäea beledi ili muäia neala ïmolö afiadulela nabi.

³⁸Ea ilima sähalea, Beledi aboläia ägüi walebelela bea mosöla säi. Bea awälahilä ilia ema sähalea, Beledi bia seme äudäla amomu ägülubela säi.

³⁹Amala säsebegi, ea ilima sähalea, Udia dolö giisidaia gegedola fifigimalamalola säi.