Mak 6:12-39

¹²Baing ina naga, dila dibaxanga ba lipudi duxugia hatumingadinga.

¹³Disuka xaunga xumana mala, disabaxaya guxenga mana lipu busingamdi saing libudi disok xai.

¹⁴Xaitamoxi Herot Antipas lungu axamang longgalo Yesu libudi ba, namua na Yesu naxuyanganoa tubu. Lipu teladi daharua ba, “Ina Lipu Suguangama Yon naga mesa muli mana matiyua. Mana namua naga ina sanga ba libu axamang haringinadi ba.”

¹⁵Ne teladi daharua ba, “Ina Elaitsa.” Baing teladi daharua ba, “Tegu, ina Urana lipuxing suxunguxunguam tela, bila Urana lipuxing suxunguxunguam mugauamdi.”

¹⁶Ne bungina Herot lungu haruanga baguli, harua ba, “Yon ba, lipua ngaximguti waxungtuanoa ba, mesa muli saing wa!”

¹⁷Harua bila ba namua na yau Herodias, sabanganoa Pilip haininoa. Binabu Yon hanaunau hanaunau Herot ba, “Kubolua oxop sabangama haininoa sangaʼm daxangua te.” Baing ina naga, Herodias atin disala mana Yon saing bo ba ung mati. Sai daxanga tela baing tegu, namua na Herot maxuwa mana Yon, bagu Yon lipu maringina Urana mogu naina binabu wasa mana. Herot hatuminganoa mauxana bungina harua rangua Yon, ning murunauyu mana lungu. Ne bo ba libu Herodias yaha, binabu soxi lipuxing haungingamdi ba dituxu Yon, digoxi dita salak yabania.

²¹Baing ina naga, Herodias bagu gananganoa sok mana. Mana xaidapka Herot hatumia nianinoa, ina tongtongia taunga saing gugunia lipuxing yanamindi, lipuxing haungingam yanamidingdi xaung Galili lipu toxondi, ding dima diyaha rangua.

²²Baing Herodias nanuhanginoa luxu mala saing siga xai maxadingia. Baing Herot gabu lipudi dima taungania ba diyaha sibuna mana. Binabu xaitamoxi harua na haing nanunoa ba, “Bagula ngalibu baru maung? Baraxinta ung murum mana saing uxusunga mana, bagula ngasina naung.”

²³Baing xaitamoxi xusunga Urana ba hanggalangia nabu su mana haruanganoa te, saing harua ba, “Baraxinta uxusunga nga mana ba, bagula ngasina naung. Nabu ubo ba ngahata yonggaxigua mana hataing luwa saing ngasina tela naung, bagula ngalibu.”

²⁴Baing sok mala saing xusunga bauna ba, “Ngaxusunga mana baraxinta?” Baing bauna haxuya ba, “Uxusunga mana Lipu Suguangama Yon toxona ba.”

²⁵Goxoya mala sap rangua xaitamoxi saing harua ba, “Ngabo ba uximguti Lipu Suguangama Yon waxungtuanoa, uta toxona minia saing usina nanga hata sibuna li.”

²⁶Baing xaitamoxi hatumia, ne gamonoa mauxana buk. Ne mana namua harua maxung sibuna lipuadi dima taungania maxadingia, baing bo ba sukoxoya haruanganoa te.

²⁷Binabu hata sibuna li tabina lipu haungingam tela, soxi mala bu xap Yon toxonoa ma. Lipu haungingamga ba ila ximguti waxungtuanoa salak yabania.

²⁸Baing ta toxonoa minia saing rai ma, sina na haing nanunoa, saing sina na bauna.

²⁹Bungina lipuxindi dinaxu mana dilungu, dila daxap Yon sangganoa mala saing dikimang guhia gobagobia.

³⁰Aposeldi digoxoya ma rangua Yesu saing dibaxanga mana oxata longgalo dilibu xaung ditubatuba baru.

³¹Baing lipu xumana dila dima mua, sanga ba ganangang te mana Yesu gabu lipuxindi dinaxu mana daxang, binabu bala lipuxindi dinaxu mana ba, “Ang ganim ama tala long xoliania, tayagua to.”

³²Baing ding ganiding dahaing wagia dila long xoliania.

³³Ne bungina dila, lipu xumana dibagudi saing daxabiadi ba, baing lipu xumana mana long longgalo diluki kidingia mala, saing disok muga manadi.

³⁴Yesu ri titia, bagu buranga sabanga, baing gamona usingadi, namua na duwa bila sipsipdi doxola lipuxiding wasangama. Baing ungguti tubatubadi mana axamang xumana.

³⁵Bungbung sibunauba, baing lipuxindi dinaxu mana dima rangua, saing daharua ba, “La li long olang, saing yambongguba.

³⁶Usoxi lipudi dila mana long teladi duwa singia sanga mana digim anginga nading bu daxang.”

³⁷Ne Yesu haxuya haruangadinga ba, “Ang ba auliadi bu daxang.” Baing daharua na ba, “Si, am gala am gagim baru? Giminaginoa sanga mana lipu tela waxata sobak 8!”

³⁸Baing harua nadi ba, “Ang salangaimdi baru? Ala abagu to.” Dititi laing sup baing digoxoya ma rangua Yesu saing dibala ba, “Salanga luwadi luwadi hiliadinga xaung song luwa.”

³⁹Baing Yesu bala lipu xumang sibuna ba dirung gugunianga gugunianga tatubang gamatania.