Mak 6:12-39

¹²Wal detlot wekinmen bin go ebriweya, en deibin dalimbat ola pipul blanga tenim miselp brom ola nogudbalawei blanga olabat,

¹³en deibin andimwei dibuldibul brom insaid langa loda pipul, en deibin rabum loda sik pipul garram det oil medisin, en deibin meigim detlot sik pipul gudbala.

¹⁴Wal det nyus blanga Jisas bin spredat ebriweya, en King Herod bin irrim det nyus. Wal sambala pipul bin tok, “Jisas garram pawa blanga dumbat olkain klebabala ting, dumaji im na det Jon Beptis. King Herod bin kilim im ded. Bat imbin gidap laibala.”

¹⁵Bat najalot pipul bin tok, “Nomo. Im det speshalwan mesinja blanga God hubin jidan longtaim neim Ilaija.” En najalot pipul bin tok, “Nomo. Im speshalwan mesinja jis laik ol detlot najalot mesinja hubin wokaran iya bifo.”

¹⁶Wal wen King Herod bin irrim detlot wed, imbin tok, “Im na Jon Beptis. Aibin kadimof im hed. Bat imbin gidap laibala brom dedbala.”

¹⁷Wal Herod bin jinggabat na wanim imbin dum langa Jon Beptis bifo. Imbin dalim im wekinmen olabat blanga go en grebum im en taiyimap im garram tjein en pudum im langa jeil.

¹⁸Herod bin dum lagijat langa Jon Beptis, dumaji imbin merrit langa im ron braja Filip waif neim Herodiyas, en Jon Beptis bin dalimbat im, “Yu kaan pulumat det gel brom yu braja en merrit langa im. Im nomo rait.”

¹⁹Wal det gel bin heidim Jon brabliwei, en imbin wandi kilim im. Bat Herod nomo bin larram im kilim im, dumaji imbin bradin langa Jon.

²⁰Imbin sabi Jon bin gudbala men en imbin speshalwan wekinmen blanga God, en im nomo bin larram enibodi ardim Jon. Imbin oldei laigim irrim Jon toktok. Bat wen imbin oldei irrim det wed, det wed bin oldei meigim im nogudbinji langa im main.

²¹Afta na det gel neim Herodiyas bin abum tjens. Wen King Herod bin abum padi blanga im bethdei, bigmob pipul bin deya, en det doda blanga Herodiyas bin densdens blanga olabat. Wal King Herod en ola gabman bos en ola ami bos en ola boswan lida brom Gelali, deibin ol gudbinji wen deibin luk det gel dens, en afta King Herod bin tok langa det gel, “Yu gin askim mi enijing yu wandim, en ai garra gibit yu.

²³Ai pramisim yu enijing yu askim mi. Enijing yu wandim, ai garra gibit langa yu.”

²⁴Wal det gel bin go, en imbin askim im mami, “Wanim ai garra askim im, Mami?” En im mami bin tok, “Yu askim im blanga det hed blanga Jon Beptis.”

²⁵Wal streidawei det gel bin go langa King Herod, en imbin askim im lagijat na, “Ai wandim det hed blanga Jon Beptis langa pleit.”

²⁶Wal det king bin brabli nogudbinji na. Bat imbin lafta duwit, dumaji imbin meigim det pramis langa det gel wen ol detlot boswan bin deya.

²⁷Wal King Herod bin jandim wan solja langa det jeil, en det solja bin kadimof Jon Beptis hed,

²⁸en imbin pudum im hed langa pleit, en imbin bringimbek det pleit garram det hed, en imbin gibit langa det gel, en det gel bin gibit langa im mami.

²⁹Wal wen detlot wekinmen blanga Jon Beptis bin irrim det bednyus blanga Jon, deibin go en gajim im bodi, en deibin berrim im.

³⁰Bambai na ol detlot speshalwan mishanri blanga Jisas bin kambek langa im, en deibin dalim im blanga ol detlot ting weya olabat bin dumbat en blanga ebrijing weya olabat bin titjimbat langa detlot pipul ebriweya weya deibin go.

³¹Wal bigismob pipul bin kaman deya langa olabat, en olabat nomo bin abum taim blanga dagat daga, en Jisas bin dalim im wekinmen olabat, “Kaman na. Wi lafta gowei samweya langa kwaitwan pleis blanga abum spel.”

³²Wal deibin gowei garram olabat bout langa kwaitwan pleis.

³³Bat loda pipul bin luk olabat deya langa det bout, en deibin sabi olabat, en loda pipul brom ol detlot taun bin go futwok lida langa olabat, en detlot pipul bin kamat langa det pleis bifo olabat bin kamat.

³⁴Bambai na wen Jisas bin kamat brom det bout, imbin luk detlot bigismob pipul, en imbin fil sori blanga olabat, dumaji wen imbin luk olabat, deibin jis laik ship nomo garram enibodi blanga maindimbat olabat. En Jisas bin stat titjimbat olabat olkain ting.

³⁵Wal wen imbin gulijap sangodan, ola wekinmen blanga Jisas bin kaman langa im, en deibin tok, “Dijan im leitbala na, en wi longwei brom taun.

³⁶Wal yu jandimwei dislot pipul wulijim dei gin go langa detlot gulijapwan fam en taun blanga baiyim olabat daga.”

³⁷Bat Jisas bin tok, “Yumob na garra gibit olabat daga.” Wal wen Jisas bin tok lagijat, detlot wekinmen bin hatjamp, en deibin tok, “Wanim yubin tok? Yu wandim melabat blanga weistimbat wan yiya weijis blanga baiyim naf daga blanga dismob pipul iya?”

³⁸Wal Jisas bin dalim olabat, “Yumob go en luk haumatj daga yumob garram.” Wal deibin go en luk, en deibin dalim im, “Wi garram faibala damba en dubala fish.”

³⁹Wal Jisas bin dalim im wekinmen olabat blanga kadimat detlot pipul en meigim olabat jidan langa lilwanlilwan grup ebriweya langa det grinwan gras,